Read Banggai 2 TUNDUNAN 30 Bible Online

2 TUNDUNAN 30 - Banggai bible

2 TUNDUNAN 30

¹ Kolamean Paskah akiyoon nalaate korayat kubaiyo doi bituwon komeengo sabab doiyamo kotempono, sabab koimam-imam molapamo koliyousiyo kobutongo tolongo soisik konakadaang tukon akiyoon nabadaang komian mo pototongi doi Yerusalem mopomeenggon sulano nalamekene do Paskahdoo doi bituwon koluano, tukon yanila sasaibino sanaang tukon dona rencanadoo. Maka Tomundo makapatu surat doi sasaibino komian posaapon ko Israel tukon Yehuda. Koidan doi Efraim tukon Manasye. Sasaibino ko Israel miano moluwedoi Dan benseno nalipu taalikon doi lembet polong doi Bersyeba taalikon doi lalom, inundang doi Yerusalem doi TEMENENO Na Bonua sulano nalamekene ko Paskah tukon odotiiyo ko TEMENENO Israel na Mian Bisa buno motinantukanggono doi Musa nahukum-hukum lalomo. Akiyoon nabiasa kopaskah linamekon bunodoiya.

⁶Doi Tomundo naparenta tukon napagawe kinapatumo kotusan-utusan doi posaapon ko Yehuda tukon Israel tuuk babayo dosurat-suratoo mobuno naiya konabantilan, “Israel miano! Komuyu luputo luwedoi Asyur miano nakakuasaan. Dibudodoo tadukai komuyu poabali mangangga doi TEMENENO, Abraham na Mian Bisa sinosubai, Ishak, tukon Yakub, sulano yanakai abali motulungiyo komuyu.

⁷Inaimokai pobuno tumbumuyu tukon Israel mian-miano bailon mo aki nasetia doi napai TEMENENO Mian Bisa. Komuyu lapamo kitayo susuungo bulaando konababalatan yana naukumano yanila.

⁸Inaimokai namatikas konoamu buno yanila, bai taatiyomo ko TEMENENO. Lubatokai doi Yerusalem, doi TEMENENO Na Bonua mo lapamo TEMENENO mu Mian Bisa alaase tuuk butongo sidutu-posidutukon. Maimo ndabakaleda doi Yana sulano nambeeng Konanggimalan doi komuyu.

⁹Kalu komuyu abali mangangga doi TEMENENO, maka komian-mian moakute komotolutusan salaku tawanan, naikon lubat konaseang tukon pataikene yanila abali. TEMENENO mu Mian Bisa doiyamo Mian Bisa momonondok tukon mamaasikene; Yana naikon talimayo komuyu kalu komuyu abali doi Yana.”

¹⁰Salataa doutusan-utusanoo taus luwedoi kota taus doi kota doi Efraim benseno nalipu tukon Manasye polong doi lembet potimbang Zebulon benseno nalipu, yanila kinokumbit tukon tinotulai.

¹¹Bai, daano koidan komian-mian moluwedoi Asyer benseno, Manasye, tukon Zebulon moiyase lubat doi Yerusalem.

¹²Doi Yehuda kai ko Mian Bisa balimang tukon pomeenggene korayat noano sulano natutuu taat doi Mian Bisa namongiasan tukon loingiyo tomundo tukon napagawe-pagawe naparenta.

¹³Doi bituwon koluano badaang tuuno korayat mopototongi doi Yerusalem tuuk molamekene Kooloyo Babasal Roti Moakiyo ko Ragino.

¹⁴Kobalabaan-balabaan doi Yerusalem mo pinake tuuk mososubakonan sosubakon tukon mosuaan kamangian doi pilogot-pilogot, sasaibino inala tukon sinakukon doi Kidron Pepelakono lalomo.

¹⁵Doi tanggal 14 dobituwonoo yanila metembel domba-domba tuuk sinosubakon salaku sosubakon Paskah. Sasaibino koimam tukon Lewi mianoila modaano madikit teali mamaa tuuno. Yanila koliyousiyo kobutongo sulano namoola mososubakon sosubakon mo sinua doi TEMENENO Na Bonua.

¹⁶Yanila suwe-suwele mangala tampat doi TEMENENO Na Bonua mololoi katurunan-katurunan mo totulis doi Musa nabuku Hukum-hukum lalomo. Sauh luwedoi sosubakon-sosubakonoo ko Lewi miano salakanggene doi sasaibino koimam, maka yanila kundongiikene doi balabaan.

¹⁷Badaang luwedoi antara mian mo daano idoo akiyoon nakoliyousiyo kobutongo, jadi yanila aki namoola tembele kodomba teali sosubakon Paskah. Tobikon doiya tolongokai do Lewi mian-mianodoo komo lakukene dolanggedoo tuuk yanila tukon sosubakene doi TEMENENO.

¹⁸Kobailonoo, doi antara Efraim mian-miano, Manasye, Isakhar, tukon Zebulon, badaang komo lubat akiyoon nakoliyousiyo kobutongo. Jadi yanila lamekene ko Paskahdoo tukon aki naloloiyo koaturan. Tobikon doiya Tomundo Hizkia sambeanggene yanila, konabantilano,

¹⁹“TEMENENO, tumbunggami na Mian Bisa ngginaal, boliisi naluwedoi namonondokan konoamu ikoo ompuniyo yanila modaano bakaleda doikoo tukon totubo konoano, maukai yanila naakiyoon nakoliyousiyo kobutongoila.”

²⁰Ko TEMENENO ndongoliiyo Hizkia nasambeang. Yana ompuniyo domian-mianoo tukon aki naukume yanila.

²¹Pitu kooloyo konakalumbit, tukon tedes tuuno komian-mian mopototongi doi Yerusalemoo nalamekanano kolamean Roti moakiyo koragino. Sasamba kooloyo ko Lewi mian-miano tukon sasaibino koimam ngganggaale ko TEMENENO tukon tutuuno.

²²Lewi mian-mianodoo pandoi tuuno mokatuaiyo kokaledaan doi TEMENENO, tobikon Hizkia nggaale yanila. Sambuno lapa 7 kooloyo konakalumbit yanila nikmatiyo kokinaan luwedoi lameanoo tukon mososubakon sosubakon tuuk bakinatauwan doi TEMENENO, tumbunoila na Mian Bisa;

²³yanila sasaibino putusiyo tuuk banggadukene dolameanoo 7 kooloyo koidan. Maka yanila lamekene koidan tukon tedes.

²⁴Tomundo Hizkia sumbangkanggene ko 1.000 kosapi langgilo, tukon 7.000 kodomba. Hizkia napagawe-pagawe sumbangkanggene ko 1.00 kosapi langgilo tukon 10.000 kodomba. Sasaibino doiyayonoo bineekon doi rayat sulano natinembel tukon kinaan. Badaang tuuno koimam mokoliyousiyo kobutongo.

²⁵Ko rayat Yehuda, sasaibino koimam, Lewi mian-miano tukon mian-mian molubat luwedoi taalikon doi lembet tukon mian-mian molulubaton motataapo doi Israel tukon Yehuda sasaibino rasaiyo sanaang.

²⁶Kokota Yerusalem lame tuuno sabab doi tempo Salomo Daud namalane, akiyoon nabiasa teali kokadadian mobuno doiya.

²⁷Koimam-imam tukon Lewi mianoila makabikene TEMENENO nabalakaat tuuk doi rayat tukon luwedoi natampat dungolan doi surgaa ko Mian Bisa lengele yanila nasambeang tukon talimayo napai kakabi.