Read Banggai 2 TUNDUNAN 31 Bible Online

2 TUNDUNAN 31 - Banggai bible

2 TUNDUNAN 31

¹Salataa lapa dolameanoo, sasaibino korayat taus doi sasamba kokota doi Yehuda maka manase kopilogot timbalang-timbalango, lubange kotimbalang-timbalang mokinokondong tuuk Pilogot Asyera, tukon akabuse kobalabaan-balabaan tukon tampat mososubaiyan pilogot. Yanila lakukene bunokai doiya koidan doi tampat-tampat bailon doi Yehuda tukon doi Benyamin nalipu, Efraim, tukon Manasye. Lapa doiya yanila sasaibino mule doi yanila natampat-tampat suwe-suwele.

²Tomundo Hizkia tampatkanggene koidan koregu-regu sasaibino koimam tukon Lewi miano mololoi nainobosan konapai limang. Dolimang-limangoo doiyamo langge-langge nia: mososubakon sosubakon mosinua tukon sosubakon podamean, leleaniyo kobakaledaan doi TEMENENO Na Bonua, tukon nggaale tukon bakinatauwan doi TEMENENO doi moisalomo kotampat doi TEMENENO Na Bonua lalomo.

³ Luwedoi naiyayon piniala susuungo yana beekene koiyayon-iyayon mo pinalaluu teali sosubakon mosinua samba kododowa tukon samba kokinobian, tukon sosubakon mosinosubakon doi oloyo Tadean, doi Bituwon Boolu lameano, tukon doi lamean-lamean bailon buno motinantukono doi TEMENENO nahukum-hukum lalomo.

⁴ Sangalaasan doiya tomundo sumboliiyo modungoliyo ko Yerusalem namababa mosinosubakon mo tinantukono tuuk sasaibino koimam tukon Lewi miano, sulano yanila namoola tataapkanggene yanila sasaibino napalahatian doi peleleani TEMENENO Na Bonua buno mototulis doi TEMENENO nahukum-hukum lalomo.

⁵Sambuno lapa pinolonggon doparentadoo, ko Israel miano mababa luwedoi yanila nabuta hasilo tumbeno, mobineekon-bineekon doi TEMENENO Na Bonua doiyamo tarigu, anggur, zaitun lisisono, dokot tukon buta hasilo bailonggon. Yanila mababa koidan meeng koobos luwedoi meeng koobos luwedoi napai langge.

⁶Sasaibino komian modungol doi kota-kota Yehuda mababa meeng koobos luwedoi songulo koobos luwe iyayon piniala tukon yanila nadomba, tukon mobineekon-bineekon bailon koidan badaang tuuno; maka sasaibino doiya yanila sosubakene doi TEMENENO napo Mian Bisa.

⁷Domo bineekon-bineekonoo tambuun napolubatana doi bituwon kotoluno, tukon banggadudul lubat sampe bituwon kopituno.

⁸Sambuno Tomundo Hizkia kitayo dobantuanoo mobadaang, yana tukon napagawe-pagawe kabasale ko TEMENENO sambuno tukon nggaale kona rayat Israel, doiyamo Naumat.

⁹Salataa tomundo basilingan tukon sasaibino koimam tukon Lewi miano tentang dolobo-lobodoo mobineekon,

¹⁰Imam Babasal Azarya Zadok nakaturunan bantile, “Tambuun korayat naantokanano kona sosubakon-sosubakon doi TEMENENO Na Bonua, kami aki mai kakulangan kinaan, bai lobian, tobikon daano badaang kopalasadiaan. Sasaibino doiya kami talimayo sabab ko TEMENENO balakatiiyomo Konaumat.”

¹¹Luwedoi Tomundo naparenta, yanila siapkanggene kogudang-gudang potikunggon ko TEMENENO Na Bonua,

¹²maka abese sasaibino komo bineekon tukon meeng koobos moluwedoi songulo koobosoo doi gudang-gudangoo lalomo. Meeng ko Lewi miano kosambuno Konaya inoduduk teali pangawas, tukon Simei utuso pioto teali napotombonii.

¹³Doi yanila nakatuaiyano daano ko 10 ko Lewi miano bailon mobinotokon, doiyamo: Yehiel, Azozya, Nahat, Asael, Yerimot, Yosabad, Eliel, Yismakhya, Mahat, tukon Benaya. Sasaibino langgedoo Tomundo Hizkia tukon Imam Babasal Azarya tinatapkanggon.

¹⁴Kore Yimna napau, meeng ko Lewi miano moteali kapala pototooli doi TEMENENO Na Bonua Tataapono Babasal Tolopot, bineekon kotanggung jawab sulano natalimayo dolobodoila mobinaba mosinosubakon doi TEMENENO, maka naebe-ebese.

¹⁵Doi kota-kota bailon koimam-imam natampat dungolan, ko Lewi miano bailon tomboniiyo Kore doiyamo: Eden, Minyamin, Yesua, Semaya, Amarya, tukon Sekhanya. Bahan-bahan kinanoo inobos pokakana doi antara sasaibino ko Lewi benseno mau momotuamo maukai motatabokon mololoi yanila nalimang.

¹⁶Sasaibino komala-malane mo 30 lobian kotaun konaumur, momalaat obos limang samba kooloyo doi TEMENENO Na Bonua, koidan binee obos suwe-suwele mololoi nalimang tukon naregu.

¹⁷Sasaibino koimam tinulis mololoi nabenseno, tukon Lewi miano mo 20 lobian kotaun konaumur menurut nalimang tukon naregu.

¹⁸Yanila sasaibino tinuliso polaing-laing tukon napai boloki konapau, tukon naanggota-anggota bailon doi nabonua lalomo, sabab yanila siokai nabasadiamo samba kotempo sulano nalimange konapai limang-limang motinantukono tuuk TEMENENO.

¹⁹Doi antara imam-imam modungol doi kota-kota motinantukono tuuk Harun nakaturunan, kai doi padang-padang potikunggon dokota-kotadoo, tinantukono komo bali-balimang sulano naebe-ebese kobahan mokinaan doi sasaibino komala-malane imam nakaluargaa, tukon doi samba komian mototulis doi Lewi benseno lalomo.

²⁰Doi posaapon ko Yehuda, Tomundo Hizkia jalanggene kokaadilan, jujur, tukon sanaanggene ko TEMENENO Mian Bisa noano.

²¹Yana berhasil, sabab sasaibino konakinubai tuuk TEMENENO Na Bonua kai tuuk loingiyo ko TEMENENO nahukum-hukum inapakonggon tukon noano tuutuu tukon kilakene kona TEMENENO Mian Bisa.