Read Banggai 2 TUNDUNAN 32 Bible Online

2 TUNDUNAN 32 - Banggai bible

2 TUNDUNAN 32

¹Sambuno lapa Tomundo Hizkia lakukene kolangge-langge motudoikene kona kesetiaan doi TEMENENO, Sanherif Tomundo Asyur lobosiyo ko Yehuda. Yana lobosiyo kokota-kota modaano bentengo tukon parentayo konapasukan sulano nalambase.

²Salataa Hizkia toiyo baikon Sanherif natetel molobosiyo ko Yerusalem,

³yana polaing sasaibino kopagawe tukon nakatua-katua putusiyo tuuk tutupe kopaisu natampat-tampat doikota tonggulungo konaminakisuut sulano ko Asyur miano naaki namalaat paisu kalukai yanila polong doi Yerusalem. Badaang tuuno komian mosinumbolii sulano natutupe sasaibino kopaisu matano mo lomba doi kota tonggulungo.

⁵Maka tomundo keenggele kokota napertahanan tukon kindendeke kobetoono, kekendenge kobadagaiyan-badagaiyan doi bunggono tukon bangune kobetoono bailon doi tonggulung. Sangalaasan doiya yana kindendeke kobenteng mokinokondong doi buta motinimbuni bunggono taalikon doi tolopot kokota Yerusalem tumbeno. Yana koidan mosumboliikene nakinubai kopandong mobadaang tuuno tukon tombide.

⁶Yana mongoduduk katua-katua sulano nakapalaiyo sasaibino komian mala-malane doi kota lalomo, tukon sumboliiyo yanila napototongi doi kota lapangano tataapono mo babasal salaano. Maka yana bantile doi yanila.

⁷“Posabar tukon manganggamo; inaikai momatakut doi tomundo Asyur kai doi napasukan. Kobukuanan taalikon doi kita lobioniiyo kobukuanan taalikon doiyanila.

⁸Konabukuanan tongo luwedoi banggapi, bai doi kita daano konda TEMENENO Mian Bisa moteali tomboniiyo tukon mopolobosi tuuk kita.” Sala lapa yanila lengele donapai tomundodoo nabantilan, korayat tealimo barani.

⁹Bubula kotempo doibundu salataa Sanherif polaing polaing konapasukan daano doi Lakhis, yana mosumbolii bito-bito doi Hizkia tukon Yehuda miano modaano doi Yerusalem sulano napelenggene nateteba nia.

¹⁰“Yaku Sanherif tomundo Asyur, yase masadai oila kosababpo komuyu mobaranimo tuuk tataap dungol doi Yerusalem modaano molinobosi.

¹¹Oilanokai Hizkia bantile baikon ko TEMENENO Mian Bisa naikon osobiiyo komuyu luwedoi mai kakuasaan? Inai poanggayo, sabab yana tolongo kokoliiyo komuyu. Yana naikon osobiiyomokai komuyu pomate malaal tukon molou.

¹²Yanamokai komo manase kotampat-tampat kaledaan tukon balabaan-balabaan tuuk TEMENENO, maka sumboliiyo ko Yehuda miano tukon Yerusalem nabakaleda tukon mosua kamangian doi meeng kobalabaan tolong.

¹³Oilanokai komuyu aki potoiyo oila komo lapamo yaku lakukene tukon kumbumbu doi bangsa-bangsa bailon? Akiyoon nabiasa koilah-ilah bangsa bailon mosobiiyo konabangsa luwedoi tomundo Asyur nakakuasaan!

¹⁴Indee luwedoi yanila komo biasa lakukene dolanggedoo? Aki namoola komu ilah moola salamatene komuyu!

¹⁵Inai posobiikene komutomundodoo nakokoliiyo tukon kubaiyo bodoh komuyu! Inai mangangga doiyana! Sabab aki nabiasa indeemo kobangsano napilogot mosanggup osobiiyo konabangsa luwedoi tomundo Asyur nakakuasaan. Tantumokai komu pilogotoo koidan aki naikon namoola osodiiyo komuyu!”

¹⁶Daano badaang kobantilan-bantilan bailon ko Asyur nabito-bito mo bantile tuuk mototulaiyo ko TEMENENO Mian Bisa tukon Hizkia. TEMENENO napelelanidoo.

¹⁷Tomundo Asyur koidan tulise kosulat motantaange ko TEMENENO, Israel miano na Mian Bisa sinosubai. Bunonaiya dosuratoo nabantilan, “Sasaibino kobangsa bailon napilogot-pilogot aki namoola sobiiyo konabangsa luwedoi kukakuasaan, bunomo koidan doi Hizkia nailahdoo aki namoola osobiiyo konabangsa luwedoi kukakuasaan.”

¹⁸Do Asyuroo nabito-bito wokonggene sasaibino doiya doi silingan Ibrani lalomo sulano naoto-otokutiyo tukon lotoyo ko Yerusalem tumbuno nasamangat mo daanomo doi kota betoono bunggono, sulano yanila namoola lambase tukon ambang tuuno dokotadoo.

¹⁹Yanila basilinganggene ko Mian Bisa mo sinosubai doi Yerusalem tongo pokakana kobangsa-bangsa bailon nailah-ilah, doiyamo timbalang-timbalang banggapi mokubaiyo.

²⁰Maka Tomundo Hizkia tukon Nabi Yesaya Amos napau yanila sambeang. Yanila wookon kabiyo ko Mian Bisa natulungiyo.

²¹Maka ko TEMENENO mobintokon meeng komalaekat moakateyo ko Asyur nasuludadu-suludadu tukon suludadu kapalano. Tukon mamaa tuuno Tomundo Asyur abalimo doi natano. Doi meeng kooloyo salataa yana daanoon doi nailah nabonua lalomo, bubula luwedoi napau susuungo lubat akateyo yana tukon nasabel.

²²Bunomokai doiya ko TEMENENO nakubaiyano sulano naolupute Tomundo Hizkia tukon ko Yerusalem tumbuno luwedoi Sanherif tomundo Asyur nakakuasaan, tukon luwedoi yanila namusu-musu bailon. Ko TEMENENO beekene doiyanila kotuboan moaman akiyo komogangguwe luwedoi negara-negara napololanikonan yanila.

²³Badaang komian molubat doi Yerusalem momababa sosubakon tuuk TEMENENO tukon hadia mobineekon doi Hizkia, tobikon tambuun doiya sasaibino kobangsa odotiiyo yana.

²⁴Doiya kotempono Tomundo Hizkia masakit. Konasakitoo babalat tuuno tobikon baino soisik yana mate. Yana sambeang, maka ko TEMENENO beena tanda doiyana baikon yana naikon tangalin.

²⁵Bai sabab yana babanggaal, yana aki nabatalimakase doi natangalinan TEMENENO mo beekene doiyana. Tobikon doiya ko TEMENENO nggimoliiyo ko Yehuda tukon Yerusalem.

²⁶Bai doibundu Hizkia tukon Yerusalem tumbuno kependeyo kobutongo, maka doi nadaanoan Hizkia motubo doukumanoo aki nainambakonggon.

²⁷Tomundo Hizkia teali kaasa tuuno, tukon sasaibino komian odotiiyo yana. Yana mokubai kombiang-kombiang teali mangabosan nabuat doiyamo: mosoni, suasa, batu-batu permata, lamba-lamba, tombide tukon barang-barang modaano koanggano bailonggon.

²⁸Yana daano konagudang-gudang teali nabangabosan asi hasilo buno: gandum, anggur, tukon zaitun lisisono koidan kandang-kandang tuuk nasapi-sapi tukon nadomba-domba mobadaang tuuno.

²⁹Sanglaasan doiya yana kekendenge koidan badaang kokota. Ko Mian Bisa beena kaasaan molobi-lobian doiyana.

³⁰Tomundo Hizkia doiyamo komo pepete ko Gihon paisuno matano nalombaan, maka olombakene kopaisuno loloiyo kosausalul doi buta lalomo doi kota Yerusalem lalomo. Sasaibino Hizkia nalobo kinubai daano kohasilo.

³¹Tukon doi tempo dobito-bitodoo luwedoi Babel lubat sulano namasadaikene doiyana tentang natangalinan moajaib, ko TEMENENO sobiikene Hizkia natindokiiyo susuungo sulano namoola ujio konoano.

³²Kosalitano bailonggon tentang Tomundo Hizkia tukon tentang naseseangano ko TEMENENO tinulis doi buku Inokitakon Lalomo luwedoi Mian Bisa Doi Nabi Yesaya Amos Napau, tukon doi Tomundo-tomundo Yehuda tukon Israel Nabuku Tundun lalomo.

³³Hizkia mate, maka kinibul doi tomundo-tomundo nakinibulan doi buta nasakanggonan. Sasaibino ko Yehuda tukon Yerusalem miano beena pongodotii mobabasal doiyana doi tempo namatean. Konamalane Manasye teali tomundo posobolino yana.