Read Banggai 2 TUNDUNAN 33 Bible Online

2 TUNDUNAN 33 - Banggai bible

2 TUNDUNAN 33

¹Manasye sodo 12 kotaun konaumur yana tealimo tomundo Yehuda tukon yana maparenta doi Yerusalem 55 kotaun konakalumbit.

² Yana baladosa doi TEMENENO, sabab loingiyo kobangsa-bangsa nakabiasaan-kabiasaan molokis TEMENENO mosiikayo luwedoi Kanaan doi tempo Israel miano nausokiyano dotanodoo.

³Yana bangune koidan kotampat-tampat mososubaiyan pilogot, molapamo tamano Hizkia manase, yana bangune kobalabaan-balabaan teali bakaledaan doi Baal, tukon yana mokubai Pilogot Boine Asyera timba-timbalango, tukon sosubaiyo koiyayon-iyayon.

⁴ Ko TEMENENO lapamo bantile baikon tuuk sidutu-posidutukon doi Yerusalem daano kotampat tuuk bakaledaan doiyana, bai indaa, doi TEMENENO Na Bonuadoo, Manasye lapamo kekendenge kobalabaan-balabaan tuuk doi ilah-ilah.

⁵Doi loluakon do TEMENENO doo Na Bonua basaleano yana mokokondong balabaan-balabaan teali mososubaiyan iyayon-iyayon.

⁶Yana sosubakene konapau-pau salaku sosubakon mosinua doi Hinom Pepelako. Yana koidan lakukene konacara-cara basupaan, tukon bapulosonan, motoiyan, tukon makabi potudoikon doi roh-roh. Yana baladosamo tuuno doi TEMENENO tobikon lubatene ko TEMENENO nanggimalan.

⁷ Yana abese kopilogot timbalango doi TEMENENO Na Bonua lalomo, baanggokai kaliangano dotampatoo lapamo TEMENENO bantile doi Daud tukon namalane Salomo, “Dakubonua doi Yerusalem nia, molapamo yaku lilike luwedoi antara songulo lua ko Israel benseno nawilayah, doiyamo tampat yaku motantukenemo salaku tampat kaledaan doiyaku tuuk sidutu-posidutukon.

⁸Kalu Israel miano loingiyo sasaibino daku parenta tukon tulutiyo kohukum-hukum molapamo Musa kupeleleani beekene doiyanila, maka yaku aki naikon kusodiikene yanila nasiniika luwedoi tano molapamo kubeekene doi tumbunoila.”

⁹Manasye mangaanikene korayat doi Yehuda molakukene kolalim-lalim molobian lokis luwedoi bangsa-bangsa nalalim linakukon doiyamo bangsa-bangsa TEMENENO mosiikayo luwedoi Kanaan doi tempo TEMENENO naumat usokiyo dotanodoo.

¹⁰Ko TEMENENO anuukene Manasye tukon narayat, bai yanila aki nayase molongol.

¹¹Tobikon doiya ko TEMENENO lubatene sasaibino ko Asyur nasuludadu talengano sulano nalobosiyo ko Yehuda. Manasye linako pakait, maka binoboi tukon kinanggi doi Babel.

¹²Doi nasakisaawan lalomo yana kependeiyo kobutongo doi TEMENENO Mian Bisa tukon sambeang makabi potombonii.

¹³Ko Mian Bisa talimayo Manasye nasambeang tukon abalinggene yana doi Yerusalem sulano namaparenta koidan. Sabab kadadianoo Manasye teali mangangga baikon ko TEMENENO doiyamo ko Mian Bisa.

¹⁴Doi bundu Manasye katandake kobeton doi tonggulung taalikon tolopot doi Daud nakota yana tambuun luwedoi meeng kotampat loolani ko Gihon paisunobatango maka banggadudul taalikon lembet polong doi Tataapon Babasal Ikan tukon taalikon kota mosinombuikon Ofel. Doi sasamba kokota modaano konabenteng doi Yehuda, yana tampatkanggene koidan komeeng kosuludadu talengano.

¹⁵Yana alaase koila timba-timbalango bangsa bailon koona tukon pilogot-pilogot molapamo inabos doi TEMENENO Nabonua. Yana bongkare kobalabaan-balabaan pilogot modaano doi bunggul ko TEMENENO Na Bonua, tukon doi tampat-tampat bailon doi Yerusalem. Sasaibino doiya yana babayo doi kota tonggulungo maka sinakukon.

¹⁶Doi bundu yana kindendeke kobalabaan tampat kaledaan doi TEMENENO, maka sosubakene idoo kososubakon paladamean salaku sosubakon sukur. Sasaibino ko Yehuda miano sinumbolii bakaleda doi Israel na TEMENENO Mian Bisa.

¹⁷Rakyat daanoon momososubakon sosubakon doi tampat-tampat sosubaan bailon, bai domo sinosubakonoo doiyamo tuuk TEMENENO.

¹⁸Salita kaliangano bailonggon tentang Manasye, tukon kaliangano kona sambeang doi Mian Bisa, tukon Mian Bisa nateteba-teteba mopinolonggon doi yana luwedoi nabi-nabi tukon TEMENENO sambuno, Israel na Mian Bisa, sasaibino lapamo tinulis doi Tomundo-tomundo Israel Nabuku Tundun lalomo.

¹⁹Doi Nabi-nabi Nabuku lalomo salitano lapamotinulis koidan Manasye nasambeang tukon Mian Bisa napotimbili doi sambeangoo, tukon salita tentang nalalim-lalim moakiyoon yana nabertobat, tampat-tampat mososubaiyan pilogot tukon timbalang-timbalang Ilah Asyera boineno kona kinubai tukon pilogot-pilogot nasinosubai.

²⁰Manasye mate tukon kinibul doi kamali. Konamalane Amon teali tomundo posobolino yana.

²¹Amon teali tomundo Yehuda salataa yana konaumur 22 kotaun, tukon yana maparenta doi Yerusalem lua kotaun konakalumbit.

²²Buno tamano yanakai baladosa doi TEMENENO. Yana sosubaiyo kopilogot, tamano napilogot sinosubai tukon mososubakon sosubakon doi pilogot-pilogotoo.

²³Bai posasala tukon tamano, Amon aki nakependeyo kobutongo tukon aki naabali doi TEMENENO; yana pololokon baladosa lobioniiyo kotamano.

²⁴Tomundo Amon napagawe-pagawe pomeenggon molawane yana tukon moakateyo doi kamali.

²⁵Bai ko Yehuda miano akateyo sasaibino komian moakateyo doi Tomundo Amonoo, maka oduduke Yosia teali tomundo.