Read Banggai 2 TUNDUNAN 34 Bible Online

2 TUNDUNAN 34 - Banggai bible

2 TUNDUNAN 34

¹ Yosia sodo 8 kotaun konaumur yana tealimo tomundo Yehuda, tukon yana maparenta doi Yerusalem 31 kotaun konakalumbit.

²Yana lakukene komo sanaanggene ko TEMENENO noano; yana loingiyo komo monondok luwe Tomundo Daud tumbunoila, tukon loingiyo sasaibino ko Mian Bisa nahukum tukon tutuu.

³Sambuno lapa 8 kotaun tomundo doi na umur mongula tuuno, Yosia tambuun bakaleda doi Mian Bisa tumbunoila Tomundo Daud mososubaiyo, 4 kotaun doibundu yana tambuun momanase kotampat-tampat sosubaan doi pilogot, Pilogot boine Asyera, tukon pilogot-pilogot bailonggon.

⁴ Timbalang-timbalang tukon pilogot-pilogotoo Yosia naanak bua manasemo maka yanila tipase koabuno doi mian-mian kibulo bunggono mo mososubakon sosubakon doi pilogot-pilogotoo. Ko Baal nabalabaan-balabaan tukon balabaan-balabaan kamangian kamangian motalaat idoo yanila lubange.

⁵ Doibundu Yosia suayo doi balabaan bunggonodoo sasaibino koimam buku-bukuno mo leleaniyo dopilogot-pilogotoo. Tukon buno doiya yana kubaiyo ko Yehuda tukon Yerusalem moola koidan bakaleda doi TEMENENO.

⁶Langge mopokakana yana lakukene koidan doi kota-kota tukon doilipu-lipu molapamo manas doi Manasye, Efraim nalipu, tukon Simeon polong doi Naftali doi lembet.

⁷Kobalabaan-balabaan tukon timbalang-timbalang Asyera posaapon Kobabatomundoan Lembet Yosia lubange, maka konatimbalang-timbalang tukon sasaibino kobalabaan Kamangian yana manase. Lapa doiya Yosia mulemo doi Yerusalem.

⁸Doitaun kosongulono alu Yosia nabasambuan, sambuno lapa yana manase kabus kososubaan doi pilogot luwedoi TEMENENO Na Bonua tukon sasaibino kolipu, yana sumboliiyo ko 3 komian tuuk mokindendeke ko TEMENENO Mian Bisa Na Bonua. Tolu domianoo doiyamo Safan Asarya napau, Maaseya gubernuur Yerusalem, tukon Yoah Yoahas napau, meeng kopagawe motatandak.

⁹Ko Lewi mian-miano padagai TEMENENO Na Bonua Tataapono, salakanggene doi Imam Babasal Hilkia, kodoy molapamo yanila pototongikene. Dodoydoo luwedoi Efraim miano tukon Manasye tukon luwedoi rayat bailon doi Batomundoan Lembet, tukon luwedoi rayat Yehuda, Benyamin tukon Yerusalem.

¹⁰Dodoydoo doibundu Imam Babasal Hilkia salakanggene doi tolu komian mosinumbolii tuuk modagaiyo ko TEMENENO Na Bonuadoo mo kinindondok. Lapa doiya yanila beena doy

¹¹doi sasaibino kotukang kayu tukon tukang bangunan mo sio namongoli batu tukon kayung sulano nakindendeke kogedung-gedung tomundo-tomundo Yehuda mobatadikenemo narusak.

¹²Komian-mian mokubaiyo dobakindondokanoo jujur tutuuno. 4 ko Lewi miano komo kapalaiyo yanila: Yahat tukon Obaja luwedoi Merari miano, tukon Zakharia maka Mesulam luwedoi Kehat miano. Ko Lewi mian-miano, mosasaibino pandoi maen musik,

¹³binee limang naawasio kobangakutan barang-barang, komo kapalaiyo koburu doi moisalomo kokaliangano kobalimangan, kubaiyo administrasi, tukon padagai tataapon.

¹⁴Doi tempo dodoydoo bantuan nakinalual luwedoi tampat nainabosan, Hilkia pososuunggene ko TEMENENO Nabuku Hukum, doiyamo hukum-hukum Mian Bisa mobeekene doi Musa.

¹⁵Bantilokai Hilkia doi Safan, “Yaku pososuunggene ko TEMENENO Nakitab Hukum doi TEMENENO Na Bonua,” maka dokitabpoo bineekon doi Safan.

¹⁶Safan talimayo dokitabpoo, maka taus doi tomundo tukon bantile, “Sasaibino kotomundo napinalentakon lapamo kami lakukene.

¹⁷Kami lapamo mangala doy mo inabos doi TEMENENO Na Bonua, tukon salakanggene doi sasaibino komobalimang tukon napadagai-padagai.”

¹⁸Doibundu yana suungiyo, “Hilkia beekene nakitab nia doi yaku.” Maka Safan basakene dokitabpoo doi tomundo.

¹⁹Molongol dokitabpoo antoko, tomundo bending-bendinge konapakean sabab poloon.

²⁰Maka tomundo beekene naparenta nia doi Hilkia, Ahikam Safan napau, Abdon Mikha napau, Safan sekertaris negara, tukon Asaya tomundo napangawal.

²¹“Tausokai masadai doi TEMENENO tuuk yaku tukon tuuk mian-mian mo daano doi Israel tukon Yehuda kaliangano nakitab nia antoko. Ko TEMENENO nggimoliiyomo doi kita sabab kotumbunggita ampakonggene koparenta-parenta mototulis doi lalomo.”

²²Maka tausokai Hilkia, Ahikam, Abdon, Safan tukon Asaya makabi otunggul doi meeng koboine kosambuno Hulda. Yana meeng konabi modungol doi bakambungan boolu doi Yerusalem. Konalangkai kosambuno Salum Tikwa napau Harhas natumbu. Yana pongulus pakean kaledaan doi TEMENENO Na Bonua. Sambuno lapa Hulda molongolii yanila nakatalangan,

²³yana sumboliiyo yanila abali doi tomundo tukon pelenggene nateteba nia, “Ko TEMENENO, Mian Bisa Israel miano mososubaiyo bantile,

²⁴‘Yaku naikon ukume ko Yerusalem tukon sasaibino kotumbuno tukon totopi-totopi mototulis doi kitab lalomodoo binasakon doi tomundo.

²⁵Yanila tinggalemo yaku tukon mososubakon sosubakon doi ilah-ilah bailon. Sasaibino yanila nalinakukon lubatenemo dakunggimalan. Yaku nggimoliiyo ko Yerusalem, tukon daku nggimalan aki nanggoola pinosoi.

²⁶Bai tentang Tomundo Yosia, naiyamo daku teteba, Israel na TEMENENO Mian Bisa: Sambuno lapa ikoo mondongolii oila komo totulis doi kitabpoo lalomo,

²⁷ikoo manasal tukon kependeyo kobutomu doi salaanggu. Yaku lapamo ancame tuuk ukume ko Yerusalem tukon komo dungoliyo, bai salataa ikoo lengele tentang daku ancamanoo ikoo kokiil tukon bendinge komupakean salaku palosan susa. Yaku lengele komu sambeang,

²⁸sabab doiya doi Yerusalem aki naikon nateali kalu ikoo daano motubo. Ikoo naikon kupataikene mate tukon dame.’ ” Maka dobito-bitodoo abali doi tomundo tukon pelenggene dotetebadoo.

²⁹Tomundo Yosia uange sasaibino kokatua Yehuda tukon Yerusalem,

³⁰maka taus tukon yanila doi TEMENENO Na Bonua. Polaing yanila malaing koidan sasaibino koimam, Lewi miano tukon sasaibino korayat, mau motalalais maukai mokaasa. Doi yanila sasaibino salaano, loolani kotampat moinalaas tuuk tomundo-tomundo kokondong tukon basakene tukon alalo mobabasal sasaibino kokitab paladandian molapamo pinosuunggon doi TEMENENO Na Bonua lalomo. Doibundu tomundo mokubai paladandian tukon TEMENENO tuuk taat doiyana tukon ampakonggene tukon totubo konoano tukon sasaibino konatuboan sasaibino koparenta tukon nahukum-hukum, tukon tulutiyo kopaladandian nakakabi antara TEMENENO tukon naumat mototulis doi kitabpoo lalomo.

³²Sasaibino ko Benyamin miano tukon sasaibino komian bailon modaano doi Yerusalem yana sumboliiyo paladandi tuuk motaatiyo dopaladandianoo. Maka ko Yerusalem mian-miano taatiyo kopalatulan-palatulan doi paladandian doi paladandianoo lalomo, doiyamo paladandian antara yanila tukon Mian Bisa tumbunoila.

³³Pilogot-pilogot mominosikiton, motalaat doi tampat-tampat motongusokon doi Israel miano nawilayah, sasaibino Tomundo Yosia manasemo. Maka yana sumboliiyo konarayat bakaleda doi TEMENENO, tumbunoila na Mian Bisa. Maka doi nadaanoan Yosia motubo, korayat tataap taat doi TEMENENO.