Read Banggai 2 TUNDUNAN 35 Bible Online

2 TUNDUNAN 35 - Banggai bible

2 TUNDUNAN 35

¹Lapa doiya Yosia lamekene ko Paskah doi Yerusalem tuuk odotiiyo ko TEMENENO. Domba tuuk dolameanoo tinembelo doi tanggal 14 bituwon komeengo.

²Yosia ebese doi sasaibino koimam kolimang-limang mosio yanila nalimange doi TEMENENO Na Bonua tukon yana bontiikene sulano yanila nalimange tukon monondok.

³Ko Lewi mian-miano molapamo inalaas tuuk TEMENENO, tukon moteali guru-guru Israel malaat naparenta nia luwedoi Yosia, “Abesemokai ko Peti Perjanjian mo moliyous nia doi TEMENENO Na Bonua lalomo Tomundo Salomo mokekendenge doiyamo Daud namalene. Inaimokai pobiye-biyele koidan. Leleaniyomokai ko TEMENENO mu Mian Bisa tukon bangsa Israel Naumat.

⁴ Basadiamokai doi TEMENENO Na Bonua manurut muregu-regu pokokonoi tukon obosano kotugas motinatapkanggon doikoo luwedoi Tomundo Daud tukon namalane Tomundo Salomo.

⁵Atulemo komu regu-regudoo bunodoiya kotambongo maka sidutu daano luwedoi komuyu komo moola tulungiyo sasamba ko Israel miano nakolompok doi TEMENENO Na Bonua.

⁶Komuyu siopomokolot domba tuuk lamekanano ko Paskah. Tobikon doiya sodiiyomokai kobutomu sulano musosubaiyo ko TEMENENO, tukon sodiiyomo koidan kososubakon-sosubakon mo sio nasinosubakon doi TEMENENO, sulano tukon buno doiya ko Israel mian-miano bailon moola ampakonggene oila ko TEMENENO napinalentakon lolodoi Musa.”

⁷Sulano komian-mian mo daano doi lamean Paskahdoo namososubakon Paskah, Tomundo Yosia mebeekon luwedoi doi naiyayon susuungo 30.000 kodomba, domba napau, tukon mbembe mongula, tukon 3.000 kosapi langgilo.

⁸Sasaibino Yosia napagawe mebee sumbangan tuuk imam-imam, tukon Lewi miano luwedoi sasaibino korayat. Kopagawe-pagawe mobinee tanggung jawab tuuk TEMENENO Na Bonua, doiyamo Imam Babasal Hilkia, tukon Zakharia, tukon Yehiel, domo toluiladoo mebeekon doi sasaibino koimam 2.600 kodomba napau tukon mbembe mongula tukon 3.000 kosapi langgilo sulano nasinosubakon doi lameanoo lalomo.

⁹Sasaibino ko Lewi miano katuano, doiyamo: Konanya, Semaya tukon Netaneel doiyamo utuso, Hasabya, Yeiel tukon Yosabad, mebeekon doi Lewi miano 5.000 kodomba tukon mbembe mongula tukon 500 kosapi langgilo sulano nasinosubakon doi lameanoo lalomo.

¹⁰Sambuno lapa sasaibino siapo tuuk lamean Paskah, koimam-imam tukon Lewi miano naregu-regu mangala tampat suwe-suwele tomundo napinalentakon.

¹¹Maka yanila metembel iyayon tuuk lamean Paskah; Lewi miano komo konitiyo tukon sasaibino koimam tiposiikene koiyayon sauhnodoo doi balabaan bunggono.

¹²Sasamba kokolompok kaluargaa modaano idoo malaat meeng luwedoi iyayon-iyayon naikon mosinosubakon salaku sosubakon mosinua. Tukon buno doiya yanila moola mososubakon sosubakon mololoi palaturan mototulis doi Musa nakitab hukum lalomo.

¹³ Maka ko Lewi mianoila tapayo dososubakon Paskahdoo doi aung bunggono, pokokonoi tukon palatulan tukon tibuluwo kososubakon-sosubakon moilalas doi tobunan lalomo tukon balanga, doibundu dosailoo moso-mosobit inobos doi mian-mian.

¹⁴Lapa doiya sodokai ko Lewi nasiapkanggene koobos tuuk yanila susuungo tukon tuuk sasaibino koimam Harun nakaturunan. Sabab polong popook sasaibino koimam doo banggadudul balimang mososubakon iyayon-iyayon salaku sosubakon mosinua, mosua inak luwedoi doi sosubakon-sosubakonoo.

¹⁵ Sasaibino komo toiyo komusiik luwedoi Asaf namian Lewi benseno lalomo daanoon doi tampat balimangan molapamo Tomundo Daud tantukanggene tuuk yanila. Naiyamo yanila sambu-sambuno: Asaf, Heman, tukon Yedutun, meeng konabi mobalimang tuuk tomundo. Sasaibino kopadagai tataapon-tataapon babasal aki namoola yanila tinggale konapos, sabab yanila malaat lamean Paskah doi tampat balimangan yanila tukon Lewi mian-miano bailon napotomboni.

¹⁶Doi oloyodoo yanila lakukene sasaibino komo pinalentahkon luwedoi Tomundo Yosia tuuk lamean Paskah, tongusokon mosinosubakon-sinosubakon doi balabaan.

¹⁷ Pitu kooloyo konakalumbit sasaibino korayat Israel modaano idoo lamekene ko Paskah tukon Lamean Roti Moakiyo Koragino.

¹⁸Paskah mobuno doiya akiyon puna linamekon koidan doi masa Nabi Samuel. Akiyo komeeng komian kai luwedoi tomundo-tomundo akiyon nalamekene ko Paskah buno mo moilamekon,

¹⁹taun songulono alu lalomo Yosia namaparentahan doo, tomundo doo susuungo polaing koimam-imam, Lewi miano, Yehuda miano tukon Israel, tukon modungoliyo ko Yerusalem.

²⁰Salataa Tomundo Yosia lakukene saibino doo tuuk TEMENENO Na Bonua; Nekho tomundo Mesir pimpine konapasukan tuuk polobosi doi Karkemis lolani ko Efrat Paisunobatango. Yosia usahakanggene moalangiyo yana,

²¹bai Nekho makapatu silingan nia doi Yosia, “Polobosian nia aki nasangkute ikoo, tomundo Yehuda! Yaku lubat bolikon tuuk lawane ikoo, baikai tuuk lawane dakumusuh-musuh, tukon ko Mian Bisa sumboliiyaku mosobit tindokiiyo. Komian Bisa daano doiyaku, tobikon doiya inaimokai mohalangiyo yana, sulano naaki musinilakai.”

²²Bai Yosia tataap molawane, tukon aki naiyase tulutiyo oila ko Mian Bisa nabinantil mololo doi Tomundo Nekho. Yosia babunokon mian bailon maka usokiyo kopolobosian doi Megido Pepelakono.

²³Doi polobosianoo lalomo Yosia kanakon pana. Maka yana parentayo konaata-ata sulano yana nabinaba kalual luwedoi polobosian sabab yana babasalo konapakol.

²⁴Yanila bingkate yana luwedoi nakereta tukon biele doi kereta bailon modaano idoo, doibundu binabamo doi Yerusalem. Indaa yana mate tukon kinibul doi tomundo-tomundo nakinibulan. Sasaibino korayat Yehuda tukon Yerusalem susa sabab Yosia momatemo.

²⁵Nabi Yeremia karange komeeng konanian mandaungan tuuk Tomundo Yosia. Sampe diabudoo donanianoo pinake doi Israel luwedoi sasaibino kopenyanyi, mau malane maukai boine, tuuk Yosia namatean nainingatan. Donanianoo lapamo inusokon doi pototongian mananian-mananian mandaungan lalomo.

²⁶Salita bailon tentang Yosia, tentang naseangano ko TEMENENO, tukon nataatan doi TEMENENO nahukum-hukum,

²⁷konapalusan sasaibino kosalitano natuboan kaliangano luwedoi tumbeno polong doi napupusan, lapamo tinulis doi Tomundo-tomundo Israel tukon Yehuda Nakitab Tundun lalomo.