Read Banggai 2 TUNDUNAN 36 Bible Online

2 TUNDUNAN 36 - Banggai bible

2 TUNDUNAN 36

¹Yehuda miano molilik tukon mongoduduk Yoahas teali tomundo doi Yerusalem soboliyo Yosia, dotamano.

²Yoahas konaumur 23 kotaun salataa yana teali tomundo Yehuda, tukon maparenta doi Yerusalem 3 kobituwon konakalumbit.

³ Nekho tomundo Mesir tawane tukon oduduke Yoahas doi Mesir, maka yana sumboliiyo Yehuda beale kolulu konakadaang 3.400 kokilogram kosuasa tukon 34 kokilogram komosoni. Doibundu yana oduduke Elyakim Yoahas utuso teali tomundo, tukon boliiyo Elyakim sambuno teali Yoyakim. Doibundu Yoahas kinanggimo doi Mesir.

⁵ Salataa Yoyakim teali tomundo Yehuda yana sodo umur 25 kotaun, tukon yana maparenta doi Yerusalem 11 kotaun konakalumbit. Yana baladosa doi TEMENENO na Mian Bisa.

⁶ Salataa Nebukadnezar tomundo Babel lambase ko Yehuda, yana lakoyo Yoyakim, tukon yana babayo toboboi doi Babel.

⁷Songobos kobarang-barang modaano koanggano doi TEMENENO Na Bonua Nebukadnezar akutemo tukon inabos doi kamali lalomo doi Babel.

⁸Salita kaliangano bailon Yoyakim, tongusokon konakokubai-kokubai molokis tukon nakulokisan-kulokisan lapamo tinulis doi Tomundo-tomundo Israel tukon Yehuda Nakitab Tundun lalomo. Yoyakim namalane teali tomundo posobolino yana.

⁹Salataa Yoyakhin konaumur 18 kotaun yana teali tomundo Yehuda, tukon yana maparenta doi Yerusalem 3 kobituwon 10 kooloyo konakalumbit. Yana koidan baladosa doi TEMENENO.

¹⁰ Doi napaisobolian kotaun, Tomundo Nebukadnezar kanggiyo Yoyakhin doi Babel salaku tawanan, tukon barang-barang modaano koanggano doi TEMENENO Na Bonua yana babayo koidan. Doibundu Nebukadnezar oduduke Zedekia, Yoyakhin napinatama, teali tomundo doi Yehuda tukon Yerusalem.

¹¹ Salataa Zedekia naumur 21 kotaun yana teali tomundo Yehuda. Yana maparenta doi Yerusalem 11 kotaun konakalumbit.

¹²Yana koidan baladosa doi TEMENENO na Mian Bisa. Yana aki naiyase kependeyo kobutongo tukon aki natulutiyo Nabi Yeremia mopelenggene ko TEMENENO nateteba doiyana.

¹³ Tomundo Nebukadnezar pakisaayomo Zedekia sulano nabatotopi lolo Mian Bisa sambuno baikon yana naikon molole doi Nebukadnezar. Bai doibundu Zedekia nggimalo doi Nebukadnezar. Zedekia otikase konoano doi TEMENENO, Israel na Mian bisa. Yana aki naiyase mootinggale konalalim-lalim tukon aki naiyase abali doi TEMENENO.

¹⁴Kobalino doo ko TEMENENO Na Bonua molapamo inalaas luwedoi TEMENENO susuungo tuuk butongo, luwe katua-katua Yehuda; imam-imam tukon rayat, sabab yanila malaing mososubaiyo kopilogot tukon moloingi cara tuboan mobaladosa luwedoi bangsa-bangsa mopotikunggon yanila.

¹⁵Ko TEMENENO tumbunoila na Mian Bisa, lapamo seseket kapatuwo konabobintokon-bobintokon tuuk moingotiikene Konaumat, sabab yana seange doiyanila tukon doi Nabonua.

¹⁶Bai yanila maenggene do Mian Bisadoo nabobitokon-bobitokon, tukon kokumbite kona nabi-nabi tukon aki napusinggene kona bantilan-bantilan. Konapupusan ko TEMENENO nggimal tuuno doi yanila tobikon aki nadaano koidan kololoon kaluar doi yanila tuuk luput luwedoi naukuman.

¹⁷ Ko TEMENENO unggete tomundo Babel noano sulano nalobosiyo yanila. Dotomundodoo akateyo ko Yehuda tabo-tabono, tongusokon yanila modaanoon doi TEMENENO Na Bonua lalomo. Yana aki namamaasikene maukai meeng komiankai, motua kai taboan, mala-malane kai moluko, masakit kai makalikodong. Ko Mian Bisa salakanggene yanila sasaibino doi tomundo Babel.

¹⁸Ko TEMENENO Na Bonua pakakas-pakakaso, tukon barang-barango mo daano koanggano, koidan buat tomundo nabenda tukon sasaibino kona pagawe, sasaibino tomundo Babel lambase maka binaba doi Babel.

¹⁹ Yana manase ko Yerusalem betoono, tukon suayo dokotadoo, tongusokon ko TEMENENO Na Bonua tukon sasaibino kokamali polaing kobarang-barang modaano koanggano modaano doi kamali-kamalidoo lalomo.

²⁰Korayat moluput inakuto doi Babel. Indaa yanila teali ata tukon nakaturunan ata sampe doi tempo batomundoan Persia nabalakuasaan.

²¹ Bunomokai doiya konatealian oila ko TEMENENO nabinantil mololodoi Yeremia baikon dotanodoo naikon akiyo komotubo 70 kotaun konakalumbit salaku posoboli tauntaun Sabat moaki napinusinggon.

²²Doi taun komeengo Kores nabapamarentaan tomundo Persia, TEMENENO kubaiyo oila komo lapamo yana bantile loloiyo doi Nabi Yeremia. Ko TEMENENO nggieke Kores noano sulano nakaluale komeeng koparenta mobinasakon doi posaapon konabatomundoan. Koantoko bunonaiya:

²³ “Naiyamokai Kores naparenta tomundo Persia! Ko TEMENENO, Mian Bisa balakuasa doi surgaa lapamo tealikene yaku tomundo doi posaapon kodunia, tukon mobeena limang yaku tuuk mobangune kobonua tuuk yana doi Yerusalem doi lipu Yehuda. Jadi, komuyu sasaibino moteali Mian Bisa naumat sio naabali dombalaa! Boliisi ko TEMENENO mu Mian Bisa naosoope komuyu.”