Read Banggai 2 TUNDUNAN 5 Bible Online

2 TUNDUNAN 5 - Banggai bible

2 TUNDUNAN 5

¹ Sambuno lapa Tomundo Salomo bangune TEMENENO doo Na Bonua, yana mangabos doi gudang-gudang bonua doo lalomo saibino ko suasa, mosoni, tukon barang-barang bailon molapamo Daud tamano sosubakene doi TEMENENO.

² Lapa doiya Tomundo Salomo sumboliyo saibino kotua benseno tukon luwedoi bangsa Israel mianoo pototongi doi Yerusalem tuuk mobiele TEMENENO Na Peti Perjanjian luwedoi Sion, Daud Na Kota doi TEMENENO Na Bonua.

³Maka yanila saibino lubato doi oloyo Lamean doi Sandung Moinalatoi Loon.

⁴Lapamo saibino katua doo pototongi, Lewi miano bingkate Peti Perjanjianoo,

⁵tukon babayo doi TEMENENO Na Bonua. TEMENENO Na Sandung tukon saibino komosinadia komian Imam tukon Lewi miano biele koidan doi TEMENENO Na Bonua.

⁶Tomundo Salomo tukon saibino rayat Israel pototongi doi Peti Perjanjian salaano doo maka mososubakon doi TEMENENO domba tukon saapi moakimo natangait konakadaang.

⁷Lapa doiya saibino komian usekene Peti Perjanjian noo doi TEMENENO Na Bonua lalomo tukon binggakene doi timbalang malaekat bilito doi Luangan Momoliyous lalomo.

⁸Timbalang-timbalango kapilo tabuka tonggupio peti doo tukon kayung-kayung patanggungo.

⁹Kayung patanggung doo moloas tuuno, sampe tubo-tubono tokita luwedoi Kombiang Momoliyous tuuno salaano, bai aki natokita luwedoi tonggulung. (Polong oloyo nia kayung-kayungdoo daano idoo.)

¹⁰ Doi Peti Perjanjianoo lalomo akiyo kolobo meeng modaano tolongo lua kobatu tela. Batu-batu doo lapamo musa bekene idoo doi Sinai Bunggulo, salataa TEMENENO makabai perjanjian tukon bangsa Israel doi tempo yanila naampakonan lalomo luwedoi Mesir doi lipu Kanaan.

¹¹ Saibino komian modaano idoo, luwedoi saibino kolompok, lapamo sadiayo kobutongo tuuk doi upacaradoo. Saibino kopanani tukon mobamusik doi Lewi nobenseno lalomo, doiyamo Asaf, Heman, Yedutun tukon saibino yanila naanggota benseno, mapake pakean luwedoi toik lenan. Lewi miano daango kokondong doi balaban taikon doi tolopot tukon matani simbal tukon kacapi. Yanila polaing daano 120 komian mopuuke kotrompet. Saibino kopanani kona mananian pololoi tukon tumpukan musik torompet, simbol tukon pakakas musik bailon. Naiyamo bantilan-bantilan manggaalan yanila mo mananikene tuuk TEMENENO: “Nggale ko TEMENENO, sabab Yana mondok, Konaseang sidutu-posidutukon.” Doi tempo saibino koimam tobuat luwedoi TEMENENO Na Bonua doo, sosinggot Bonua doo moono tukon cahaya nadaanoan ko TEMENENO, sampe yanila aki namoola banggadukene koupacara kaledaan.