Read Banggai 2 TUNDUNAN 6 Bible Online

2 TUNDUNAN 6 - Banggai bible

2 TUNDUNAN 6

¹Tomundo Salomo sambeang, “Ode TEMENENO, ikoo yase tuuno dungol doi bunom lalomo nakalipokanan.

²Diabudodoo yaku bangune komeeng kobonua momonondok tuuk doi Ikoo, tuuk tampat dungolan sidutu-posidutukon.”

³Lapa sambeang, tomundo mbalenge doi sasaibino korayat modaano mokondong idoo, maka yana mangkabi kene balakaat doi Mian Bisa tuuk yanila.

⁴ Yana bantile, “Loluk TEMENENO lapamo baladandi doi tamanggu Daud buno naiya, ‘Tambun Yaku babayo Daku umat sumbut luwedoi Mesir sampe oloyo nia, doi lipu Israel akiyo komeeng kokota Daku linilik teali tampat doi yaando sio kona binangunan kobonua tuuk tampat kaledaan doi-Koo, tukon akiyo komeeng komian kai Daku lilik tuuk mopimpine Daku umat Israel. Bai diabudoo Yaku lilike Yerusalem salaku tampat kaledaan doi Yaku. Tukon ikoo, Daud Daku lilike tuuk parentayo Daku umat.’ Nggale kai TEMENENO Mian Bisa Israel molapamo tapatio Kona perjanjian doo!”

⁷Banggadudul Salomo bantile, “Tamanggu Daud lapamo pikikene tuuk bangune ko bonua tampat kaledaan doi TEMENENO Israel miano na Mian Bisa.

⁸Bai TEMENENO bantil doiyana, ‘Komu makisud doya mondok.

⁹Bai, bolikon ikoo, bai mupaumo naikon mobangune daku bonua doo.’

¹⁰Diabudodoo TEMENENO lapamo tapatio kona paladandian yaku lapamo teali tomundo Israel sobolio kotamanggu, tukon yaku lapamo koidan bangune ko bonua tuuk tampat kaledaan doi TEMENENO, Israel miano na Mian Bisa.

¹¹Doi TEMENENO Na Bonua lalomo doo lapamo kusadiayo ko tampat tuuk Peti Perjanjian ko antoko batu paladandian antara TEMENENO tukon umat Israel.”

¹²Salomo lapamo makabai panggung tambaga doi TEMENENO Na Bonua kintalo tanga-tangano. Kona kobulus tukon kokinobintingo 2,2 meter, tukon nakatandak 1,3 meter. Doi rayat mohadir salaano komo daano, Salomo liba doi panggung doo, tukon kokondong sasalane kobalaban. Saibino komian moola kitayo. Doi bundu yana bapintuul, maka bingkate loluakon kolimano tukon tidekene kolimano doi timbu tukon sambeang,

¹⁴“TEMENENO, Israel miano na Mian Bisa! Doitimbu kai doi buta akiyo komo buno Ikoo! Ikoo tapatio Mu perjanjian tukon tudoikene Komu seang doi Muumat mo satia tukon taat tukon noa tutuu doi Komuyu.

¹⁵Ikoo lapamo tapatio Komu perjanjian doi tamanggu Daud. Oila daku dinandikonoo lapamo kukabayo oloyonia.

¹⁶ Ikoo koidan lapamo paladandi doi tamanggu baikon kalu nakatulunan tutuu taat doi Muhukum buno yana, maka tuuk sidutu-posidutukon meeng komian luwe nakatulunan naikon maparentah salaku tomundo doi Israel. Dia budodoo, ode TEMENENO Israel miano na Mian Bisa, tapatio koidan saibino komo lapamo Ikoo dandikene doi tamanggu Daud Domu atadoo.

¹⁸ Bai, ode Mian Bisa, bulandokon Ikoo moiyase dungol doi dunia nia doi antara bangkapi? Mau nabulaandomo kotimbu naluasan bai aki Mumoola tongusokon, bainokai kalu tolongo nabonua nia kaledaku bangune!

¹⁹Ode TEMENENO Mian Bisa, yaku Muata! Bai ndongoliiyomo kai daku sambeang, tukon daano kene dakukakabi.

²⁰ Boliisi kooloyo popook Ikoo mulindungiyo nabonua nia molapamo Ikoo lilike salaku tampat kaledaan doi Komuyu. Boliisi luwedoi tampat Mudungolan doi surgaa Ikoo mondongoli tukon ompunio yaku tukon umat Israel, Domu umatoo, kalu kai ikami sasalanemo na bonuania tukon sambeang doi Ikoo.

²²Kalu kai meeng komian linait mosalah doi mian bailon tukon binaba doi Mubalaban doi Mu Bonua lalomo nia tuuk basumpah baikon yana akio konasalah.

²³Ode TEMENENO siokai mundongoliiyo doi surgaa tukon putusiyomo namu ata-ata nia napalakala. Hukumemo komo salah tukon bebaskanggene komo akiyo kona salah.

²⁴Kalu kai Muumat Israel kona musuh-musuh kalayomo sabab yanila baladosa, maka yanila manasalo tukon odotiyomo Ikoo koidan salaku TEMENENO, doibundu lubat doi Mubonua nia tukon sambeang makabi ampun doi Ikoo,

²⁵boliisi Ikoo mundongoliyo yanila doi surgaa. Boliisi Ikoo ompunio Komu umat nalalim tukon babayo yanila abali doi nalipu molapamo Ikoo bekene doi yanila tukon doi yanila nambumbu.

²⁶Kalukai Muumat baladosa doi Ikoo tukon Ikoo hukume yanila tukon aki lubatene koudan, maka yanila balatobat luwedoi yanila lalim tukon odotiyo Ikoo salaku TEMENENO, doibundu mangadap doi Mu Bonua nia tukon sambeang doi Ikoo,

²⁷ode TEMENENO doi surgaa ndongoliiyomokai yanila. Tukon ampunio Muata-ata umat Israel nalalim. Otunggule yanila lakukanggene oilakomo kana. Lapa doiya, ode TEMENENO, lebesenggenemo koidan doi Mulipu nia, lipu Ikoo mobekene doi Muumat tuuk teali tumbuno sidutu-posidutukon.

²⁸Kalu kai lipu nia kanakon malalan kai panakit, kai komosinakakon-sinakakon mombul, pital monas molusake ulat kai betek, kai Komu umat musuh lobosio, kai kanakon panakit,

²⁹boliisi Mundongolio yanila nasambeang. Kalu luwedoi antara Muumat Israel daano komo susah konoano sambeang doikoo tukon tidekene kolimano taalikon doi Mu Bonua nia,

³⁰boliisi Domu dungolanoo lalomo doi surgaa ndongoliiyo tukon ompunio yanila. Tolongo Ikoomo komo tingoniiyo kobangkapi noano atoko. Tobikon doiya lakukenemo samba ko mian pokakana kona kakabai-kakabai,

³¹sulano Komu umat namatakut tukon taat doi Ikoo sidutu doi napodaanoan modungol doi lipu Ikoo mo beekene doi kami nambumbu.

³²Kalu kai meeng komian lubat doi lipu moodon sabab lengele komu Babasalan nangganganan tukon Mubukuanan kaliangano, tukon baikon Ikoo sidutu siap tuuk motombonii, maka yana lubat doi mubonua nia tuuk sambeang doi Ikoo,

³³boliisi luwedoi Mudungolan doi surgaa Ikoo ndongolio kona sambeang tukon daano kene kona kakabi. Tukon buno doiya saibino ko bangsa posapon nai dunia nia tangano tingoniiyo Ikoo tukon taat doi Ikoo buno Muumat Israel. Yanila naikon toiyo baikon nabonua nia yaku mobangune tampat tuuk bakaledaan doi Ikoo.

³⁴Kalu kai Ikoo parentayo Kumu umat nataus polobosi molawane ko musuh, maka inando yanila nadanoan, yanila mangadap doi kota Mulinilik nia tukon sambeang sasalane nabonua nia molapamo yaku bangune tuuk Ikoo,

³⁵boliisi doi surgaa Ikoo mulengele yanila nasambeang, tukon beena kamanangan doi yanila.

³⁶Kalu kai Muumat sambeang doi Ikoo — konatutuan akiyo komeeng komian mo akiyo konalalim — maka sabab Munggimalan Ikoo sodikenemo yanila musuh nalungguyo tukon binaba salaku tawanan doi meeng kolipu moddoon kai mololani,

³⁷boliisi Ikoo mondongolii yanila sambeang, kalu kai doi lipu doo yanila tinggale yanila lalim-lalim, tukon sambeang doi-Koo tukon akuyo baikon yanila baladosamo tukon makabai mo lokis, ndongoliyomo yanila sambeang, ode TEMENENO.

³⁸Kalu doi lipu doo yanila sanang tutuuno tinggale yanila nalalim-lalim, tukon sambeang doi-Koo tukon sasalane doi lipu nia yaku mobeekene doi naimbumbu taikon doi Mukota linilik tukon bonua kaledaan molapamo yaku bangune tuuk doi-Koo nia,

³⁹maka luwedoi Mudungolan doi surgaa siokai Ikoo mundongoliyo yanila nasambeang tukon seseange yanila. Ompunio Muumat nalalim saibino.

⁴⁰Dia budodoo ode ku Mian Bisa, palaatikanggenemo kami tukon ndongoliyomo kosambeang-sambeang mopinolonggon doi-Koo luwedoi tampat tia.

⁴¹ Bangun diabudodoo, ode TEMENENO Mian Bisa! Tukon polainggene Peti Perjanjian mopinokakanakon Komukuasa tukon Ikoo usokiyomo Domubonua nia tukon dungol dimbaa sidutu-posidutukon. Balakatiomo saibino koimam-imam nalimang, tukon boliisi saibino Muumat monondok sabab Ikoo mondok doi yanila.

⁴²TEMENENO Mian Bisa, inaimo Mutolake tomundo molapamo Ikoolilike nia. Neneekekai naikon Komu seang doi Muatadoo.”