Read Banggai 2 TUNDUNAN 7 Bible Online

2 TUNDUNAN 7 - Banggai bible

2 TUNDUNAN 7

¹ Sambuno lapa Tomundo Salomo sambeang, aung obulus luwedoi timbu suayo sosubakon-sosubakon mo sinosubakon doi TEMENENO. Maka kolaango TEMENENO nadaanoan posaapon TEMENENO Na Bonua doo,

²sampe saibino ko imam aki namoala mongusoki.

³ Salataa korayat Israel kitayo aung mo obulus luwedoi timbu tukon TEMENENO nadanoan kolaango posaapon TEMENENO Na Bonua, yanila nggalaup doi soan maka sosubaiyo tukon nggale ko Mian Bisa, sabab Yana monondok tukon Naseang moakiyo kona pupusan.

⁴Lapa doiya Tomundo Salomo tukon saibino komian mopototongi idoo mososubakon sosubakon doi TEMENENO.

⁵Tuuk sosubakon paladamean Salomo mososubakon 22.000 kosaapi tukon 120.000 kodomba. Bunomo doiya tomundo tukon saibino kona rayat makabai upacara bonua kaledaan nasinalakanggonan doo doi TEMENENO.

⁶Saibino ko imam kokondong doi tampat motinatapkanggon tuuk yanila; posasalaan tukon Lewi miano monggale ko TEMENENO tukon pakakas musik Tomundo Daud mokabaiyo, tukon mananikene konamian “Naseang Akiyo Konapupusan!” pokonoi tukon Daud naotunggul. Saibino ko imam puuke ko trompet saibino ko rayat daanon mokokondong.

⁷Maka taikon doi tanga luwedoi kintal doi bonua doo kaleda salaano doo Salomo salakanggene doi TEMENENO. Doi bundu yana sosubakene idoo sosubakon mosinua sosubakon gandum tukon iyayon inakko tuuk sosubakon paladamean. Saibino doo sinosubakon idoo sabab balabang tambaga molapamo yana kabaiyo todul popoisik tuuk saibino dososubakonoo.

⁸Salomo tukon saibino ko umat Israel makabai Lamean Sandung Moinalatoi Loon pitu kooloyo kona kalumbit. Badaang tuuno komian nakadang mopototongi doi lameanoo. Yanila molubat luwedoi daerah moodoon Loloon Hamat doi lembet polong doi napokolatanan ko Mesir doi lalom.

⁹Pitu ko oloyo kona kalumbit yanila pototongi tuuk upacara baselaan TEMENENO nabalabaan doi bundu pitu ko oloyo koidan tuuk Lamean Sandung Moinalatoi Loon doi oloyo labino kinabai kolamean ponutup.

¹⁰Tukon modoakon kooloyono, doi tanggal 23 bituwon kopituno, Salomo sumboliyo mian badangoo mule. Yanila tedesene doi saibino komonondok TEMENENO nailakukanggon doi Naumat bangsa Israel, doi Daud tukon doi Salomo.

¹¹Sambuno Salomo berhasilo alapayo kopambangunan TEMENENO Na Bonua tukon tomundo nakamali pokonoi tukon nalencana.

¹²TEMENENO okitakene kobutongo koidan doiyana doi tempo popook. TEMENENO bantil doiyana, “Musambeang Yaku lengelemo tukon Yaku talimayo bonua nia salaku tampat mo inalas tuuk mososubakonan sosubakon tuuk Yaku.

¹³Kalu kai Yaku aki Kulebesenggene koudan kai Yaku kapatuwo kobetek tuuk mo akabuse ko dunia antoko kai lubatene kopanakit podonggiti doi Kuumat,

¹⁴maka Kuumat mopakeo Kosambunggu doya totulaiyo kobutongo, tukon sambeang maka lubat doi Yaku tukon tinggale yanila kakabai mokulokis, maka luwedoi surgaa Yaku naikon lengele yanila na sambeang. Yaku naikon ompunio yanila nalalim-lalim tukon tealikene yanila nalipu abali makmul.

¹⁵Yaku naikon tataap Okitese Daku Bonua nia tukon siap mondongoli saibino kosambeang moilibakon luwedoi tampat tia.

¹⁶Saibino doo naikon Kukabayo sabab tampat nia lapamo Kulilike tukon Kualase teali tampat kaledaan doi Yaku tuuk sidutu posidutukon Yaku naikon okitese tukon lindungiyo doi loonu popupuuson.

¹⁷Kalu ikoo, buno tamamu Daud, tubo loloyo Daku mongiasan tukon taat doi Kuhukum-hukum tukon lakukene saibino Daku pinalentakon doi koo,

¹⁸ maka naikon Yaku tapatio Daku paladandian doi tamamu Daud baikon sidutu naikon daano meeng komian luwedoi nakatulunan moteali tomundo doi Israel.

¹⁹Bai kalu ikoo tukon murayat molongol hukum-hukum tukon Ku parentah-parentah, tukon sosubaiyo koila-ilah bailon,

²⁰maka Yaku naikon kaluale ikomiu luwedoi lipu molapamo Kubukene doi komiu. Yaku koidan naikon tinggalemo nabonua nia molapamo Kutataap kanggene teali tampat kaledaan doi Yaku. Doi yaya bonua nia naikon tinotulai tukon kinokumbit.

²¹Bonua kaledaan nia diabudodoo inodoti tuuno, bai doi tempo doo samba komian moalo idoo naikon masainding momokita. Yanila naikon bantil, ‘Bulaando TEMENENO mokubai buno naiyo natania tukon nabonua nia?’

²²Maka komian naikon motimbili, ‘Sabab yanila tinggalemo ko TEMENENO napo Mian Bisa, molapamo antekene yanila nambumbu sumbut luwedoi Mesir. Yanila sosubayo tukon paladandi satia doi ilah-ilah bailon. Doiyamo ko sababpo TEMENENO lubatene kobalaa nia doi yanila.’ ”