Read Banggai 2 TUNDUNAN 8 Bible Online

2 TUNDUNAN 8 - Banggai bible

2 TUNDUNAN 8

¹Salomo bangune ko TEMENENO Na Bonua tukon tomundo nakamali 20 kotaun kona kalumbit.

²Kota-kota mobinekon Tomundo Hiram doi yana bangune koidan, maka sumboliyo ko Israel mianno dungol idoo.

³Yana rebuute kodaerah Hamat tukon Zoba,

⁴tukon kobukuanggene kota Tadmor doi padang bone, maka bangune koidan saibino ko pusat bangabosan ndemel doi Hamat.

⁵Kota Bet-Holon-Atas tukon Bet-Holon-Bawah yana bangune koidan teali kota modaano kobentengo tukon tataapon babasal mo sinempang tataapon.

⁶Koidan yana abali bangune kota Baalat, tukon saibino kota mangabosan ndemel, tukon kota-kota kereta polobosi tukon adalan natadean. Saibino kona rencana kobangunan doi Yerusalem, Libanon tukon posaapon kona wilayah kakuasaan lapamo laksanakene.

⁷Saibino kokatulunan bangsa kanaan Israel miano moaki nalaate akateo kabus salataa yanila dungoliyo lipu doo, Salomo sumbolio tuuk balimang pinakisa. Yanila danoon Het miano, Amori, Felis, Hewi tukon Yebus. Polong diabudodoo yanila nakatulunan daano komo teali ata.

⁹Israel mianno aki nasinumboli balimang pakisa; yanila binee limang salaku suludadu, suludadu kapalano, mokapalaiyo kereta polobosi, suludadu pasukan adalan.

¹⁰Lua kosakato lima kolono kopegawai mo bine tanggung jawab doi mian dango molakukene kolimang mopinakisa doi rupa-rupa koproyek mobinangun.

¹¹Salomo biele konaboloki, doi yamo tomundo Mesir naboune, luwedoi Kota Daud doi bonua yana mokekendenge. Sabab Salomo bapikil, “Kuboloki aki namoola dungol doi Daud nakamali, tomundo Israel, sabab saibino kotampat doi yando Peti Perjanjianoo nainabosan daanon tampat momoliyous.”

¹²Salomo mososubakon sosubakon mosinua doi TEMENENO doi balabaan bunggono mobinangun doi TEMENENO Na Bonua salano.

¹³ Sosubakon-sosubakonoo sinosubakon mololoi Hukum Musa tuuk samba kooloyo babasal; oloyo Tadean, oloyo Babasal Bituwon Boolu tukon tulo kooloyo babasal taunan, doiyamo oloyo Babasal Roti Moakiyo Konaragi, oloyo Babasal Bapupuian, tukon oloyo Babasal ko Sandung Moinalatoi Loon.

¹⁴Pokonoi tukon Daud tamano paraturan-paraturan, Salomo atule konalimang-limang oloyo tuuk saibino koimam tukon tuuk Lewi miano sio namananikene ngga-nggale ko TEMENENO tukon tombonio saibino ko imam mokabaiyo upacara-upacara kaledaan lalomo. Koidan saibino kopadagai TEMENENO Na Bonua inobos regu-regu tuuk samba kotataapon babasal, pokonoi tukon Daud naotunggul Mian Bisa Naata.

¹⁵Saibino Daud naotunggul doi saibino ko imam tukon Lewi mianno kaliangano gudang-gudang tukon lobo-lobo bailon, lolainge tukon taatio.

¹⁶Sambuno lapa koproyek bangunan Salomo morencanakakene saibino kolimang; tambun luwe bapundasian sampe nalapaan do TEMENENO doo Na Bonua ilimang tukon mondondok.

¹⁷Lapa doiya Salomo taus doi Ezion-Geber tukon Elot, kota-kota, pelabuhan doi Hol Akaba doi lipu Edom.

¹⁸Tomundo Hiram makapatu doi yana kapal-kapal Tomundo Hiram, namian komojalanggene susungo polaing komobalimang doi kapal modaano kona pangalaman. Yanila talabut doi lipu Ofir polaing Salomo namian tukon mangala luwe imbali 15.000 kokilogram komosoni maka yana babayo doi Salomo.