Read Banggai 2 TUNDUNAN 9 Bible Online

2 TUNDUNAN 9 - Banggai bible

2 TUNDUNAN 9

¹ Tomundo boine doi tano Syeba lalom yana lengele Salomo natiningonian kaliangano. Maka yana lubat doi Yerusalem tuuk ujio Salomo tukon pasadai momaling-maling, yana lubat linolaing meeng kotambuno komian mobadaang tukon unta mo ano kona muatan rampah-rampah, batu montotilan, tukon badaang tuuno komosoni. Doi tempo pososung tukon Salomo, tomundo doo pelenggene badaang korupano kopasadai momola yana pikikene.

²Sasaibino dopasadaidoo Salomo moola jawape tukon akiyokai komeeng dopasadaidoo yana morasayo sulit.

³Dotomundodoo boine sakisiyo susungo bulando Salomo napandoiyan. Yana kitayo kokamali Salomo bangune,

⁴kona aturano kona pagawe-pagawe mobalimang doi nakamali, tukon konapo pakean pokakana tukon konapo bonua bai pokakana, Yana kitayo koidan kokinaan mosinidak, tukon pakean saibino ko pelayani momeleleani doi laeman; yana kitayo koidan sosubakon-sosubakon Salomo mososubakene doi TEMENENO sasaibino doiya kabaiyo dotano Syeba natomundo boine masainding tukon aki nabiok.

⁵Maka yana bantil doi Tomundo Salomo, “Saibino daku linongol doi kulipu sinungan tentang Tuan tukon Tuan napandoiyan, bisamo tuuno!

⁶Loluk yaku aki kumangga, bai sambuno yaku lubat tukon sakisiyomo saibino tukon matanggu susunggu, maka sodo kuanggayo. Kona tutuan saibino daku linongolo akiyon sangobos luwedoi kukinita diabudodoo. Tokitamo Tuan napandoiyan tukon kasaan lobian, modoon kona babasalan luwedoi mopinolonggon doi yaku.

⁷Bukan maen kona mujuran kopagawe-pagawe moleleaniyo Tuan tukon sidutu yanila balimang tuuk doi Tuan susungo sampe yanila moola lengele luwedoi Tuan susungo sasaibino kootunggul mobijaksana!

⁸Tanggaalokai ko TEMENENO, Tuan Na Mian Bisa! Tukon oduduke Tuan nateali tomundo tuuk mabapamarentah luwedoi sambuno, Yana tudoikene bulando Kona sanangan motuuk doi Tuan. Sabab yana seseange ko umat Israel tukon yase Salomo yanila tataap daano, maka yana lapamo oduduke tuan teali yanila na tomundo, sulano Tuan moola kenggele ko hukum tukon kaadilan.”

⁹Doibundu koidan dotano Syeba doo natomundo boine yana serakanggenemo doi Salomo kohadia-hadia yana mobabayo, doiyamo komosoni lobian 4.000 kokilogram tukon koidan badaang tuuno kobatu permata tukon rempah-rempah. Salomo akiyon nabiasa mantalima rempah-rempah mobuno doiya kona mondokan tuuno buno dotano Syebadoo natomundo boine mobekene doi yana. (

¹⁰Tomundo Hiram namian tukon Tomundo Salomo namian mokanggi mosoni luwedoi Ofir tuuk Salomo, koidan mababa batu permata tukon kayung candana.

¹¹Kayung doo Salomo pakeo tuuk makabai tukal doi TEMENENO Na Bonua tukon doi nakamali, koidan tuuk makabai kasapi tukon gambus tuuk saibino kopanani. Akiyon nadaano komo buno doiya doi tano Yehuda.)

¹²Sangalasan kohadia-hadia pabalaso mobiasa Salomo bekene, Salomo koidan beena doi tomundo boinedoo moluwe doi tano Syeba sasaibino kona kinabi. Sambuno lapa doiya maka dotumundodoo boine yana mulemo doi natano polaing-laing sasaibino komian mololainge yana.

¹³Samba kotaun Tomundo Salomo matalima kabi 23.000 kilogram komosoni,

¹⁴akiyon natangait kolulu-lulu moluwe doi saibino sasaibino kopadagang mobabasal tukon padagang mopopoisik. Tomundo-tomundo Arab tukon gubernur-gubernur Israel koidan beena mosoni tukon suasa doi yana.

¹⁵Salomo makabai 200 kotombide babasal luwedoi mosoni motinutuk. Sasamba dotombidedoo moinobosi mosoni adukon 7 kokilogram kona babalatan.

¹⁶Yana koidan makabai 300 kotombide mosoni molobian popoisik. Mosoni mopinake tuuk samba kotombide popoisik doo kona babalatan adukon 3 kokilogram, saibino luwedoi mosoni motinutuk. Tombide-tombide doo inabos doi bonua kosambuno Bunoa Lipu Libanon.

¹⁷Tomundo koidan makabai meeng kokadela batomundoan mobabasal mokinabai luwedoi kayung mobeet tukon binubuangai tukon mosoni tuleng.

¹⁸Kadela doo daano kolimano tukon sembeleng doi sembeleng daano kotimbalang singa. Kadela doodaano konom kokilolino, tukon meeng tampat aino moilapis tukon mosiu aino doo tampato teali meeng tukon kadelano.

¹⁹Doi bobo bunduno tukon doi bakalinga bunduno samba kokilonino Kadeladoo daano kotimbalang singa — saibino songulolua. Kion nadaano kokadela mobuno doiya doi yaya kobatomundoan.

²⁰Saibino Salomo napakakas monginuman luwedoi mosoni, tukon saibino kopakakas doi bonua Mosolat libanon doo kinabai luwedoi mosoni tulen doi tempo Salomo nabatomundoan, suasa inanggon akiyo ko anggano

²¹Salomo badaang kona kapal mo babasal motalabut doi ndalangon babasal polaing Tomundo Hiram nakapal-kapal. Tolu kotaun idan kapal-kapal loo abali mababa mosoni, suasa, kayung mobeet, bande, tukon tomisi melak.

²²Tomundo Salomo kaasa tuuno tukon pandoi tuuno luwedoi yaya kotomundo doi dunia.

²³Saibino kotomundo kakaate pososung Salomo tuuk mondongoli otunggul pandoiyan Mian Bisa mobeke doi yana.

²⁴Yanila suwe-suwele lubat tukon mababa palaseng tuuk Salomo. Yanila beena barang-barang buno, mosoni, pakean, sejata, rempah-rempah, adalan tukon bagal. Bunomodoiya taun doi taun.

²⁵ Tomundo Salomo koidan daano kona kandang adalan tukon kereta 4.000 kona kandang. Adalan polobosi daano 12.000 kosongobos inabos doi Yerusalem, tukon kolabino doi momoiya kota tadean kona kereta-kereta polobosian.

²⁶ Yana balakuasa saibino ko tomundo doi wilayah motobuka luwedoi Efrat Paisuno batango poloong doi lipu Filistin tukon pakalatanan ko Mesir.

²⁷ Doi loonudoo Salomo nabapamarentaan lalomo, suasa tongo buno barang biasa doi Yerusalem, pokakana buno batu, tukon kayung cemara libanon badaang tuuno buno kayung ara biasa.

²⁸ Salomo mongusokon adalan luwedoi Mesir tukon luwedoi samba kolipu bailon.

²⁹Salomo salitano kaliangano bailon luwedoi tumbe polong doi bunduno lapamo tinulis doi buku lalomo Nabi Natan Salitano tukon doi buku lalomo Nabuatan Ahia Silo miano, tukon doi buku lalomo Wahyu Nabi Ido, koidan mousekene ko salitano Yerobeam tomundo Israel nabapamaretaan.

³⁰Sangkap polono kotaun konakalumbit Salomo mamparentah doi Yerusalem doi posaapon ko Israel.

³¹Doi bundu yana mate tukon kinibul doi Kota Daud. Maka kona malane Rehabeam teali tomundo soboliyo yana.