Read Banggai EZRA 5 Bible Online

EZRA 5 - Banggai bible

EZRA 5

¹ Doi tempodoo lua komian konabi, doiyamo Hagai tukon Zakharia, Ido napau, yanila tambuuno mobasilingan luwe Israel miano na Mian Bisa sambuno doi Yahudi miano mo dungol doi Yehuda tukon doi Yerusalem.

² Salataa Zerubabel Sealtiel napau tukon Yesua Yozadak napau yanila lengele donabidoo molua nateteba yanila tukon soisobiton tambuuno mobangune koikoidan ko TEMENENO Na Bonua doi Yerusalem, tukon donabidoo molua tomboniiyo yanila.

³Bai Tatnai, propinsi Efrat taalikon talise nagubernur, polaing tukon Syetar-Boznai tukon tula-tulanoila lubat doi Yerusalem tukon masadai doi Yahudi miano tukon bantile, “Indee komo sumboliiyo komuyu mobangune tukon molengkapiyo Nabonua kaleda nia?”

⁴Tukon yanila masadaikene koidan kosambu-sambuno sasaibino komian mo tomboniiyo yanila mokekendenge TEMENENO doo Na Bonua.

⁵Bai ko Mian Bisa palaatikanggene tukon loolainge kokatua-katua Yahudidoo, sahingga sasaibino kosambu Persia yanila mangala meeng kokaputusan baikon yanila aki namangala tindakan kalu akiyoon napo makapatu surat doi Darius tukon talimayo kona potimbili.

⁶Naiyamokai kolapuran yanila mokapatuwo doi Tomundo.

⁷“Doi Tomundo Darius salaano. Boliisi Tuan namaparenta tukon aman!

⁸Boliisi Tuan natoiyo, baikon kami lapamo taus doi propinsi Yehuda tukon kami kitayomo baikon ko TEMENENO Na Bonua, Mian Bisa Mo Babasal, daanoon mobinangun koikoidan batu-batu mobabasal tukon beto-betoon mo linapis kayung. Dolimangoo linakukon tukon teliti tuuno tukon mondok konalinimangan.

⁹Doibundu kami masadaikene doi sasaibino kokatuano dobangsadoo tukon kami bantile, indee komo lapamo beena izin doi yanila mobangune koikoidan do Bonua Kaledadoo tukon komo lengkapiyo.

¹⁰Kami mansadaikene koidan kopai sambu-sambuno sulano mai moola lapurkanggene doi Tuan indee komo katuaiyo dolimangoo.

¹¹Yanila timbiliyo, ‘Kami nia Mian Bisa napeleani mokuasaiyo kodunia tukon sasaibino koantoko. Kami daanoon mobangune koikoidan ko TEMENENO Na Bonua mokinokondong tukon linengkapi doi bubula kolono kotaun molapa luwedoi meeng kotomundo Israel mo babasal.

¹² Bai sabab sasaibino kotumbunggami lapamo olubatene ko Mian Bisa nanggimalan mokuasaiyo kosurgaa, maka yana salakanggenemo yanila doi Nebukadnezar, tomundo Babel nakakuasaan moluwedoi katurunan Kasdim. Yana manase do Bonuadoo tukon akute komai bangsa doi Babel.

¹³ Doibundu Kores tealimo tomundo doi Babel tukon doi taun komeengo doi nabapamarentaan, yana tobuatene koparenta sulano nabinangun koidan do TEMENENO Na Bonua.

¹⁴Polong koidan inabalikon sasaibino kopakakas mosoni tukon perak mo pinake doi TEMENENO Na Bonua lalomo tukon komo Nebukadnezar nainala luwedoi Yerusalem maka nausekene doi banoua bapulian lalomo doi Betel. Tomundo Kores salakanggene dopakakas-pakakasoo doi meeng komian mo sinombuikon Sesbazar, mo lapamo yana oduduke teali gubernur doi Yehuda.

¹⁵Tomundo sumboliiyo yana sulano nandokiiyo dopakakas-pakakasoo tukon naabalikene doi TEMENENO Na Bonua doi Yerusalem, tukon nabangune koikoidan do Bonuadoo.

¹⁶Sambuno lapa doiya Sesbazar lubat doi Yerusalem tukon kubaiyo kopondasino do TEMENENO doo Na Bonua. Tambuun doi tempodoo polong budodoiya dobangunanoo tataapo binanggadudukon, bai akiyoon koidan nalapa.’

¹⁷Kalu Tuan pataikene, kami usulkanggene sulano nainadakanggon kopenyelidikan doi Babel nabatomundoan nabundel-bundel lalomo. Tukon kalu bunodoiya moola natinoy oilakai bisa daano Tomundo Kores naparenta sulano nabinangun koikoidan ko TEMENENO Na Bonua doi Yerusalem nia. Tukon koidan kami mangkabi bilita tentang Tuan nakaputusan mengenai dopalakaladoo.”