Read Banggai EZRA 9 Bible Online

EZRA 9 - Banggai bible

EZRA 9

¹Sambuno lapa sasaibino doiya linaksanakanggon, moimoiya kopaubakalinga doi bangsa Israel lubat doiyaku. Yanila pelenggene doiyaku baikon korayat doi Israel, tongusokon sasaibino koimam, tukon ko Lewi miano aki napo yase poalaas luwedoi bangsa-bangsa modungol doi napolaloolanikonan idoo, doiyamo bangsa Amon, Mesir, Kanaan, Het, Feris Yebus tukon Amori. Tukon koidan sasaibino koimam tukon ko Lewi miano koidan bakubai bunodoiya koidan. Yanila sasaibino lakukanggene kokokubai-kokubai mo lokis do bangsa-bangsadoo mo lakukanggene.

²Ko Yahudi mala-malaneno osowaan tukon bangsa molulubaton naboine, sahingga ko TEMENENO naumat mo tangalaas teali akimo natulen. Baanggokai komo lakukanggene tumbe doiya doiyamo sasaibino kopaubakalinga tukon sambu-sambu doi Israel.

³Salataa yaku lengele dolanggedoo, yaku manasal tuuno sahingga yaku siake dakupakean tukon yaku bubutiyo dakubuuk tukon daku simbil, maka kuosulang tukon noanggu mo susah tuuno.

⁴Yaku osulang bangga-banggadudul polong doi tempo mososubakon sosubakonan kinobian. Doibundu lubatokai komian badaang mo tikume yaku. Yanila matakuto sabab neneeke ko Israel miano na Mian Bisa naancaman motuuk doi mian-mianoo nadosa mo lapamo abali luwedoi napoinaisonan doi Babel.

⁵Salataa kososubakon kinobian tambuuno mosinosubakon, yaku banggadudul mokokondong luwedoi lipu kuosulangan susaanoo tukon kupakean motebendengo, yaku somba tukon ulule kolimanggu doi TEMENENO ku Mian Bisa.

⁶Yaku bantile, “Oh daku Mian Bisa, yaku nia mammaa mobenggete koolunggu doi salaamu. Komai dosa posusun-susunimo doi olunggami bunggono tukon polong singgile kotimbu.

⁷Doi tumbunggami nalonu polong budodoiya, kami nia muumat mo baladosa doikoo. Doiyamokai komo mangaanikene kami, sahingga sasaibino kotomundo tukon sasaibino komai imam kotomundo-tomundo molulubaton lungguiyomo yanila. Kami inakate, linambok tukon kami inakut salaku mian mo tinaan. Kami tinotulai polong pokabus-kabuson, pokakana kondondoongo doi oloyo nia.

⁸Bai budodoiya, oh TEMENENO komai Mian Bisa, ikoo sodo budodoiya nia namonondok konoamu kami. Ikoo osodiiyo komoimoiya komian doi antara kami luwedoi naitaiyan sulano napo malaat tuboan mo aman doi lipu mosinadiakon nia. Ikoo beena kami tuboan boolu.

⁹Doi tempo mai inataiyan lalomo, ikoo aki mutinggalami. Ikoo tealikene kotomundo-tomundo Persia naseange kami tukon pataikene mai tubo tukon bangune koikoidan Mu Bonua mo totinggal buno buta timbunan. Ikoo beenggami soopan naimbaa doi Yehuda tukon doi Yerusalem.

¹⁰Bai budodoiya, oh TEMENENO Mian Bisa, sambuno lapa sasaibino dokadadianoo, oila komo moola mai bantile? Kami lalaikanggenamo koidan Mu parenta-parenta,

¹¹Ikoo mobeekenemo kami lolo doi sasaibino konabi, mupeleleani-peleleanidoo. Yanila bontiikanggami baikon kobuta kami naikon modungoliyodoo aki nabilisii sabab sasaibino kotumbuno luwedoi bunduno polong doi bunduno kubaiyo kolimang momanggilit tukon lokis.

¹² Donabi-nabidoo pantane kami moosowaan posombuli tukon domian-mianoo kai motomboniiyo yanila teali sanaang tukon aman. Kalu kami loingiyo, kami naikon teali bukuan tukon butadoo nahasil kami moola lasakanggene tukon koidan moola mai olusikene doi mai katurunan polong sidutu-posidutukon.

¹³Kami baladosamo tukon lumbaiyomo Komuukum, tukon Ikoo lapamo ukume kami. Bai kami toiyo, oh Ikoo komai Mian Bisa, baikon doukumanoo Ikoo mo beekene doi kami aki napokakana konamotoongan tukon komo pantas kami talimayo, bai Ikoo daanoon mosalamatene kami.

¹⁴Jadi, aki namungkin kami molailainggene Mu parenta-parenta koidan tukon osowaan posombuli tukon domian-mianoo mo lokis? Kalu kami lakukanggene, pastikai Ikoo naikon nggimoliiyo kami sahingga akateyo kabus kami sasaibino tukon aki musobiiyo sulano nadaano komeeng komiankai motubo.

¹⁵TEMENENO, Israel miano na Mian Bisa, Ikoo adil, sabab Ikoo daanoon mosobiiyo kami tubo koidan. Kami akuiyo koidan komai kasalahan doi-Koo; akiyo komai haak tuuk momangadap doi salaa-Mu.”