Read Banggai NEHEMIA 1 Bible Online

NEHEMIA 1 - Banggai bible

NEHEMIA 1

¹Naiamokai Nehemia Hakhalya napau nalapulan tentang kona kinubai-kinubai. Bituwon Kislew lalomo doi taun koluakolono Artahsasta namaparentaan salaku tomundo doi Persia, yaku, Nehemia daano doi Susan, pusat kota, batomundoan.

²Doi tempodoo, utusonggu Hanani, lubat luwedoi Yehuda polaing bubula komian. Maka kusadaiyo yanila tentang Yerusalem nandodoong tukon Yahudi mianno mo abalimo luwedoi masakukonan doi Babel.

³Yanila salitayo baikon komian-mian mosinakukono abalimo doi nabuta sinuunga doo, diabudodoo tubo sakisaa tukon bangsa-bangsa molulubaton totulaiyo modaano pokolanian. Koidan kai baton-beton Yerusalem daanon manas tukon natataapon-tataapon mobabasal akiyon nakinubai tambun doi mosinuan doi tempo loluk.

⁴Mondongolii salita doo, yaku osulang tukon kokil. Oloyo poisoboli ko oloyo kona kalumbit konoanggu nasusan. Yaku banggadudul bapuasa tukon sambeang doi Mian Bisa,

⁵“Oh TEMENENO Mian Bisa mokuasaiyo kosurgaa. Ikoo Mian Bisa mo Babasal tukon kami mangadap doi koo tukon matakut tuuno. Ikoo tataap tobos tukon mataani muperjanjian doi mian mokilakene komuyu tukon loingiyo Muparentah.

⁶Kitayomokai yaku oh TEMENENO tukon ndongoliyokai daku sambeang moliba doi salaa-Mu, madialang tukon popook tuuk umat Israel, muata-ata doo. Yaku mangaku baikon kami, umat Israel, mobaladosamo; yaku tukon saibino daku mbumbu baladosamo koidan.

⁷Kami baladosa doi-Koo tukon akimo loingiyo Mu parentah-parentah. Kami akimo loingiyo Mu ukum-ukum molapamo Ikoo bekeene doi kami mololo doi Musa Muata doo.

⁸ Oh TEMENENO neneekekai Mubantil-bantilan Musa mobantile doi Muparentah baikon kalu kami umat Israel, aki natotobos doi-Koo, kami naikon kupoalas-alasene doi antara bangsa-bangsa bailon.

⁹ Bai kalu kami abali koidan doi-Koo tukon totobos doi Muparentah-parentah, maka kami molapamo tatangalas-tangalas doo naikon Ikoo pototongikene koidan, maukai kami daano doi dunia bundu-bunduno. Maka kami naikon Ikoo abalinggene doi tampat molapamo Ikoo lilike tuuk teali tampat bakaledaan doi-Koo.

¹⁰TEMENENO, kami nia Muata-ata Muumat susumu molapamo Ikoo salamatene tukon kuasa tukon Mubukuanan tuuno.

¹¹Ndongoliyokai daku sambeang tukon sasaibino Muata bailon sambeang, moiyase odotiyo Ikoo. Beenamokai Mupotombinii sulano doi oloyo nia Muata nia malaat luwedoi tomundo namaasi.” Doi tempodoo yaku daanon mouluse kotomundo naininum.