Read Banggai NEHEMIA 13 Bible Online

NEHEMIA 13 - Banggai bible

NEHEMIA 13

¹ Doi tempo Musa nahukum binasakon doi rayat, ilaatkai kokatalangan nia; Amon Miano tukon Moab aki namoolakai pototngi tukon Mian Bisa namian;

² sabab bangsa Israel salaata ampakon sumbut luwedoi Mesir, lua doo kobangsa aki nabeena kaan tukon paisu doi bangsa doo. Tolongokai yanila tambeo Biliam tuuk batotopikene bangsa Israel, bai nda Mian Bisa boliyomo donatotopi doo teali balakaat.

³Salataa bangsa Israel ndongoliyo yanila doo moalase saibino komian molulubaton luwedoi Israel namian.

⁴Akiyoon doiya Imam Elyasib, mosinumboli modagaiyo kombiang-kombiang pelbekalan doi TEMENENO Na Bonua daanon patoikan monondok tukon Tobia,

⁵Elyasib bekeene doi Tobia meeng kombiang babasal kona bisaan minasadiakon kusus tuuk mangabosan perpuluhan gandum, kamangian, pakakas-pakakas mopinake doi TEMENENO Na Bonua, mosinosubakon tuuk saibino koimam, soobos doi songulo koobos gandum, anggur tukon zaitun lisosono, naikon inobosdoi Lewi mian-mianno, saibino kopamain musik tukon padagai TEMENENO Na Bonua tataapono.

⁶Salataa langge doo teali, yaku akiyo doi Yerusalem, sabab doi taun tolu kolono lua Artahsasta, tomundo Babel, yaku taus doi Babel tuuk lapure doi tomundo, Sodo bubula kotempo lapa doiya yaku pinataikono,

⁷tuuk abali doi Yerusalem. Napolongan dimbaa, yaku heran mongotoi baikon Elyasib bekenemo doi Tobia meeng kokombiang doi TEMENENO Na Bonua.

⁸Yaku nggimal tuuno tukon lambitene doi tonggulung saibino Tobia nabarang.

⁹Lapa doiya yaku abalinggene sumboliyo sulano nadinaanokon upacara babilisian tuuk kombiang-kombiang doo. Lapa doiya yaku abalinggene idoo saibino mosinosubakon gandum tukon kamangian tukon pakakas-pakakas TEMENENO Na Bonua.

¹⁰ Bailonggon doo kulaate baikon saibino kopamaen musik tukon lewi mian-mianno tinggalemokai ko Yerusalem tukon abali doi naasi-asi suwe-suwele, sabab korayat aki nasukup yanila nakapalaluan.

¹¹Maka kuanukene saibino kolakai-lakai sabab yanila sodiikenemokai TEMENENO Na Bonua aki lapa. Maka kuuange abali ko Lewi mian-mianno tukon saibino kopamain musik doo tukon kusumboliyo balimang koidan.

¹² Lapa doiya saibino korayat Israel tambunno koidan beekene meeng koobos doi songulo koobos gandum, anggur, tukon zaitun likisono tukon babayo doi kombiang-kombiang mundal doo.

¹³Yaku bitekene mian-mian nia modagaiyo kombiang-kombiang mundal do: Imam Selemya, Zadok meeng komian pandoi Hukum tukon Pedaya meeng ko Lewi mianno. Hanan Zakur napau tukon Matanya natumbu kusumboliyo balimang motomboniiyo yanila. Yaku toiyo baikon mian-mian doo moola nainangga tukon naikon mouluse baobosan langge-langge doo doi tula-tulano mobalimang tukon jujul.

¹⁴Oh Ku Mian Bisa, neneekekai saibino molapamo kulakukene tuuk Mu Bonua tukon nabaleleanian.

¹⁵ Doi tempodoo yaku kitayo baikon doi Oloyo Tadean bubula komian doi Yehuda mopiise koanggur. Daano komian bailon koidan momuate kogandum, anggur, koanggur saohno, koara saohno tukon barang-barang bailon doi nakeledai bunggono tukon babayo doi Yerusalem. Yaku pantane yanila ampakon balukene doi Yerusalem.

¹⁶Bubula komian luwedoi Tirus modungol doi Yerusalem makanggi ikan tukon lupa-lupa kobarang mopinalekon doi Yerusalem doi Oloyo Tadean tuuk mobinalukon doi Yahudi mianno.

¹⁷Ku anukene saibino kokatua Yehuda tukon kubantile, “Aki potoiyo komuyu baikon lapamo kubaiyo kokulokisan sabab kodikitio ko Oloyo Tadean?

¹⁸Tobikon sabab lalim bunomo naia maka Mian Bisa lapamo ukume konda mbumbu tukon manase nakota nia. Oilakai diabudodoo komuyu yase sungio ko Mian Bisa nanggimalan doi Israel tukon mokulokisene ko Oloyo Tadean?”

¹⁹Tobikon doiya kubitekene sulano doi oloyo tambunan samba ko Oloyo Tadean, doiyamo dumat popook tataapon-tataapon babasal kota mosobit tinatapikon sodo kinobian tukon akimo namoola binuka akiyon nalise ko Oloyo Tadean, doi oloyo konoomo popook. Kutampatkanggene bubula daku padagai tataapon-tataapon babasal doo tuuk moawasio sulano doi Oloyo Tadean akiyo kobarang mobinalukon mobinaba usok doi kota lalomo.

²⁰Bai danoon kotempono bubula kopadagang tukon mo mabalukon barang-barang bamolokon doi beton tonggulungo doi oloyo dumat popook.

²¹Yaku bantil doi yanila, “Palasuma komuyu mototili polong dodoa idoo. Awas, kalu komuyu kubaiyo doiya idan koidan, yaku naikon tindokio tuuno!” Tempodoo yanila aki nabiasa lubat koidan doi Oloyo Tadean.

²²Maka Lewi mianno kusumbolio mokubaiyo koupacara mokumesian butong tukon padagai tataapon-tataapon babasal tuuk awasio sulano mianno odotio ko Oloyo Tadean. Yaku sambeang, “Ode Mian Bisa, neneekekai doi yaku sabab langge doo koidan, tukon mamasikenekai yaku mopokonoi tukon Mumaasih mobabasal.”

²³ Doi popooko yaku kitayo koidan baikon badang ko Yahudi mianno moosoano tukon boi-boine moluwe doi bangsa Asdod, Amon tukon Moab.

²⁴Soobos luwedoi yanila napau-pau aki namangalatikene kobahasa Yahudi, baimokai bahasa Asdod kai bahasa molulubaton bailon.

²⁵Kuanukene tukon kubatotopikene yanila. Daano daku pinukul kunggulange konabuuk. Lapa doiya yanila kusumboliyo batotopi doi Mian Bisa sambuno baikon yanila tukon napau-pau aki naikon naosoan posombuli koidan.

²⁶ Kubantilan, “Bolikono kai lalim nia koidan tomundo Salomo nakinubai? Akiyokai kotomundo doi dunia nia molobian babasal luwedoi yana. Mian Bisa mamasikene yana tukon tealikene tomundo doi posaapon ko Israel. Maukai nabuno doiya yana lapamo koboiboine bangsa molulubaton budukio tuuk mokubai lalim.

²⁷Tutuu lokis mukakabai! Komuyu barani lawane ko Mian Bisa tukon kilayo koboiboine luwedoi bangsa molulubaton!”

²⁸ Yoyada Elyasib Imam babasal napau, bai meeng Yoyada napau tealimo Sanbalat namonianan luwedoi kota Bet-Heron. Tobikon doiya Yoyada kusikayo luwedoi Yerusalem.

²⁹Yaku sambeang, “Ode, Ku Mian Bisa, neneekekai bulando domiano mokodikitio kosambu imam tukon Mupaladandian doi saibino ko imam tukon Lewi mianno!”

³⁰Bunomokai doiya kubilisiio kobangsa Israel luwedoi sasaibino kolobo mo lulubaton. Kutataapkanggene aturan-aturan tuuk saibino koimam tukon Lewi mianno, tobikon yanila suwe-suwele daano konalimang susuungo.

³¹Kuatule koidan sulano doi tempo-tempo motantu, kayung posua tuuk sosubakon mosinosubakon sinadiamo tukon rayat makanggi dunia hasilo tempono mosinosubakon. Doibundu Yaku sambeang, “Ku Mian Bisa neneekekai saibino nia tukon balakaatio Yaku.”