Read Banggai NEHEMIA 4 Bible Online

NEHEMIA 4 - Banggai bible

NEHEMIA 4

¹Salataa Sanbalat ndongoliyo baikon kami Yahudi mianno daanon mokindedeke kota betono, yana nggimal tuuno tukon tambuno sosiboliyo kami.

²Doi tula-tulano salaano tukon suludadu Samaria, yana bantile, “Oila ko Yahudi mianno nakinubai silakaan moakiyo ko oi-oilano? Oilakai yanila yase bangune koidan kota nia? Yanila toiyo limang doo tolongo meeng kooloyo lalomo lapamo, tolongo mososubakon sosubakon? Oilakai dolimbutoo moinatambun molapamo tosua doo moola yanila tealikene batu-batu beton?”

³Maka Tobia mokokondong doi bibilo bantil koidan, “Kitayo yanila nabeton kinubai! Asu lobokai moola nalubange!”

⁴Maka yaku sambeango, “Ode Mian Bisa, ndongoliyomokai bulaando kami motinotulai! Sokulikenemokai totulai doo doi yanila oluno bunggono. Sodiiyomokai saibino yanila koona naindikuk tukon yanila inakut bunokai tawanan doi tano modoon.

⁵Inai moompunio yanila nakulokisan tukon inai motoliminggene yanila lalim, sabab yanila lapamo totulaiyo kami modaano mobangune nia.”

⁶Kami daanon banggadudul mokindedeke beton doo, tukon lapa doiya aki namalumbit saibino beton doo lapa kinindok polong sembeleng kona katandak, sabab korayat balimang tukon kokobukuan tuuno.

⁷Salataa Sanbalat, Tobia tukon mian-mian moluwe doi Amon tukon Asdot maka Arab mianno molongol baikon beton Yerusalem kinindoko pollokon maju tukon baikon buang-buang doi beton doo lapamo tinambun motinutup, yanila teali nggimal tuuno.

⁸Yanila pomeenggon molobosiyo Yerusalem tuuk monggabute.

⁹Tobikon doiya kami sambeang doi kami Na Mian Bisa tukon padagai kota doo oloyo tukon popook.

¹⁰Bai Yehuda mianno mananikene kolagu masadaian nia: “Bukunggita kabus tuuk mangakutan moinalakit, sabeakai limbut daano badaang kotambuno. Aki ndatendenge balimang bunonia mobangune kota nia betonno.”

¹¹Komai musuh doo daanon mopikikene tuuk molobosiyo kami sosinggot-singgot, maka akateo kami tobikon komai limang tade.

¹²Bai Yahudi mianno modungol lolani yanila, badaang lunggon nalubat doi kami tuuk mopelenggene do musuh doo naniat.

¹³Tobikon doiya yaku ebe-ebese sabel, pandong tukon panah doi rayat, maka yanila tampatkanggene mololoi benseno suwe-suwele doi beton tonggulungo, doi tampat-tampat moakiyon nalapa kininondok.

¹⁴Salataa kukitayo baikon rayat matakut, yaku bantil doi yanila tukon doi sasaibino kosambu tukon saibino kokatua, “Inai matakut doi musuh! Neneekekai koi TEMENENO mobukuan tukon bukuan tuuno, tukon baladuangkai tuuk utus-utusomu, pau-pau, boloki tukon mubonua!”

¹⁵Komai musuh-musuh molongol baikon yanila naniat kami lapamo toiyo. Maka yanila sadalo baikon mian Bisa lapamo akienggene yanila naniat doo. Lapadoiyo kami saibino abali balimang mokindedeke beton doo.

¹⁶Bai tambun doi oloyo doo tolongo sembeleng daku suludadu balimang, bai kosembeleng koidan bada-badagai tukon bapake kalambi polobosian tukon kona sinapang, pandong, tombide tukon panah saibino komo katuaiyo korayat dukunge tuuno korayat,

¹⁷modaanon kindeke kobeton doo. Saibino komotanggunge bangunanno nabahan limangemo limang doo tukon meeng komian, bai komian bailon tanio kosinapang.

¹⁸Tukang-tukang batu balimang tukon sabel doi oako. Mopuuke kotolompet silaakan palosano banggadudul daanon doi bibilonggu.

¹⁹Maka yaku bantil doi rayat, saibino kosambu tukon saibino mokatuaiyo. “Limang nia moloaso polong moddoon koantango, tobikon kita tanga-tangalaas doi beton nia nakinobulusan, meeng komian moddoon luwedoi bailonggon.

²⁰Jadi kalu molongol tolompet mobulungan, mosobit pototongi boilingio kami dimbaa. Nda Mian Bisa naikon polobosi tuuk kita,”

²¹Bunomo doiyakai kami balimang tambun luwedoi dodoa soono polong kobituwon-bituwon pauno tokita doi timbu. Sembeleng luwedoi rayat mokindedeke kobeton baikai kobailon bada-badagai tukon pandong doi limano.

²²Tempodoo nakalumbit saibino kopadagai tombonio yanila, kusumboliyo momoolo doi Yerusalem. Tukon buno doiya doi popook kami dagaiyo kota tukon oloyo bangune kona beton

²³Yaku susunggu, tula-tulanggu, kusuludadu tukon kupadagai-padagai sidutu popakeo kopakean balimangan, mau oloyo maukai popook. Kami nandodoong lalomo banggadudul tataap siap tanio kosinapang.