Read Banggai NEHEMIA 5 Bible Online

NEHEMIA 5 - Banggai bible

NEHEMIA 5

¹Bubula kotempo lapadoiya badaang ko Yahudi mianno mau mala-malane maukai boiboine, tambuno mobantil-bantil tentang nabangsa mian mianno.

²Daano komobantile, “Daku pau badaang. Kami palalu gandum tuuk motubo.”

³Daano koidan komo bantil, “Yaku terpaksa bagadekene koasi, anggur asino tukon komai bonua tuuk mongoli gandum sulano aki namate malaal.”

⁴Tukon daano koidan mo bantil, “Kami bapijamo doy tuuk mobeale kabus koasi, tukon anggur asino nalulu tomundo motantukanggene.

⁵Bolikonokai kami koidan Yahudi mianno? Bolikonkai komai pau pokakana tukon pau-pau Yahudi kobailon? Maukai bunodoiya terpaksa kami sodiikenemo komai pau-pau teali ata. Kokoidan komai pau boine daano komo binalukon teali ata. Kami akiyono kodaya sabab komai asi tukon anggur asino kami lapamo bagadekene.”

⁶Molongol yanila nabantilan doo yaku teali nggimal tuuno

⁷ tukon putusiyo tuuk motindokiyo. Maka kuteguule saibino kosambu tukon mokatuaiyo korayat. Kubantile, “Komuyu pikikene koutus-utusomu susumu!” Lapa doiya yaku kobayo kolapat umum tuuk motanganio langge doo, tukon bantile,

⁸“Tukon kokobukuan lapamo kita beale konda utus-utus Yahudi mianno mopakisayo balukene kobutongo doi bangsa bailon. Bai diabudodoo komuyu nia mopakisayo yanila balukene kobutongo doi komuyu banggo kai komuyu koidan Yahudi mianno!” Saibino kokatua doo aki nalaate timbiliyo mau meeng kobantilan.

⁹Maka kubantil koidan, “Mokokubai doo aki namonondok! Siokai komuyu tubo tukon matakutene ko Mian Bisa. Tukon buno doiya ndamusuh moakiyo konaTemeneno inai komuyu beena kasampatan tuuk mototulayo kita.

¹⁰Yaku susunggu, utus-utusonggu tukon tula-tulanggu molapamo pindomio doy tukon gandum doi rayat. Kami akimo naikon abalinggene.

¹¹Tadukai komuyu koidan pohapusemo kosamea-samea rayat doi komuyu doo, mau mobuno doy kai gandum, maukai anggur kai zaiton likisono. Abalinggenekai tukon mosobit asi, anggur asino zaiton asino tukon yanila nabonua!”

¹²Saibino kokatua doo timbiliyo, “Otinau doo naikon kami loingiyo. Kami naikon abalinggene saibino tukon aki naikon nakabiyo kobealo oi-oilah luwedoi yanila.” Maka kuuange saibino ko imam tukon kusumboliyo katua-katua budoo batotopi doi imam-imam doo sulano, baikon oila molapamo yanila bantile doo, tutuu naikon yanila kabaiyo.

¹³Lapa doiya kubukayo kosalempang doi oakonggu maka kukipasene tukon bantile, “Bunonia tadukai Mian Bisa motipasene samba komian moaki natapatio kona paladandian. Mian doo naikon teali talalais, bonua tukon saibino konabuat naikon Mian Bisa alayo!” Saibino korayat timbiliyo, “Amin!” maka nggaale ko TEMENENO. Maka saibino kokatua doo tapatio yanila napaladandian.

¹⁴Yaku tealimo gubernur Yehuda songulomo lua kotaun konakalumbit, tambun luwedoi taun koluakolono polong taun tolu kolono lua Tomundo Artahsasta namaparentaan. Tempodoo namalumbitan yaku tukon utus-utusonggu aki namangala daku gaji salaku gubernur.

¹⁵Gubernur-gubernur moakiyon yaku, tealimo rayat nabeban sabab yanila makabi 40 doy perak meeng kooloyo tuuk kinaan tukon anggur. Bisakai yanila pegawe-pegawe koidan pipiike korayat. Bai aki kuyase makabai bunodoiya sabab yaku matakutene doi Mian Bisa.

¹⁶Saibino kobukunggu kubekene doi bangunano beton tukon yaku aki namalaat buta soisik doo salaku posoboli, maukai saibino daku potomboni malaing balimang doi pambangunan doo.

¹⁷Sakat lima kolono yahudi mianno tukon sasaibino yanila nakatua biasamo kubeena Kaan doi kubonua, akiyon tangait tamu-tamu luwedoi bangsa-bangsa pokolani kami.

¹⁸Samba kooloyo kusadiayo kupobeal susunggu meeng kosaapi, noom kodomba momalanak tukon badaang komanuk. Doiya koidan doo, tiap songulo kooloyo kusungio daku anggur inabos. Maukai nabuno doiya aki kuyase makabi gaji sambu gubernur sabab yaku toiyo baikon korayat nabeban sukupo babalat.

¹⁹Yaku kabiyo coode Mian Bisa, neneekekai saibino molapamo yaku kubaiyo tuuk bangsa nia tukon balakaatiyo yaku.