Read Banggai NEHEMIA 6 Bible Online

NEHEMIA 6 - Banggai bible

NEHEMIA 6

¹Sanbalat, Tobia, Gesyem tukon komai musuh-musuh bailon molongol baikon kami lapamo kinendeke kobeton, tukon baikon saibino kobuango tinutupo, maukai doi tempodoo kami akiyon nakonoikene kotataapon doping-dopingo doi tataapon-tataapon Babasal kota.

²Maka Sanbalat tukon Gesyem kilime kopokolo doi yaku sulano lubat kubaiyo kolapat tukon yanila doi meeng kodesa doi Lembah Ono. Bai yaku toiyo baikon yanila yase silakakene yaku.

³Tobikon doiya yaku kilime potimbili nia doi komuyu, “Yaku aki nateali lubat sabab daanon molakukene kolimang mopenting. Limang doo naikon aki teali kalu yaku tinggale tuuk mopososung tukon yanila.”

⁴Polong sangkap lunggon yanila kilime kopokolo mopokakana doi yaku, tukon samba lunggun koidan kutimbiliyo mopokakana.

⁵Kolimaano lunggon meeng komian nasuludadu lubat tukon beekene kosulat motobuka

⁶koantoko bunonia: “Gesyem bisakenekai kosalita-salita modaano doi kalangan bangsa-bangsa mololani dimbaa, mobantile baikon utus tukon saibino Yahudi mianno mobiniatene kobanggabutan, tukon doiya kosababpo utus mokindeke kobeton kota. Yana bantile koidan baikon utus naikon bingkate kobutongo teali tomundo Yehuda,

⁷tukon motudomo bubula konabii tuuk nobatkanggene utus doi Yerusalem salita-salita doo bisa naikon polong doi tomundo sabab doiya, lubatkai tuuk mobalunding langge doo.”

⁸Bai yaku bakilim potimbili nia, “Saibino utus mobantile doo kala-kala tukon utus susungo nabajempolan.”

⁹Yanila sobayo kolimang mooto-otokutio kami sulano kami atadeo kolimang doo. Yaku sambeang, “Ode Mian Bisa beena yaku bukuanan.”

¹⁰Potikunggon tempodoo koidan, yaku taus doi Semaya nabonua Delaya napau tukon Mehetabeel natumbu, sabab yana daano kona alangan lubat doi yaku. Nabantilan doi yaku, “Maimo kita lua kita taus sapit doi TEMENENO Na Bonua. Kita kuncio saibino kona tataapon, sabab daano komian mo yase akateo ikoo. Banggokai popook nia ikoo naikon inakate.”

¹¹Bai yaku timbilio, “Yaku nia bolikon mian moyase dampasene kobutongo. Bunokai meeng komian awam Yaku aki namoola usok doi TEMENENO Na Bonua, siokai yaku matemo. Aki, aki ku yase!”

¹²Sambuno lapa kupiki-pikikene langge doo, yaku sadaliyomo baikon Semaya andane bolikon luwedoi Mian Bisa bainokai luwedoi Tobia tukon Sambalat. Yanila lapamo tamboyo Semaya tuuk pelenggene nobuatoo doi yaku.

¹³Yanila namakisud doiyamo sulano yaku matakut tukon moloingi yanila nasaran tobikon namokubai lalim. Tukon bunodoiya yanila malaat kasampatan mokulokisene kosambunggu tobikon yaku teali mian mobasalitakene.

¹⁴Yaku sambeang, “Ode Mian Bisa, neneekekai oila Tobia nakinubai tukon Sanbalat doo. Ukumemo Yanila! Bunomo koidan Nabiah kosambuno Noaja tukon nabi-nabi bailon moyase otokutioyaku.”

¹⁵Beton doo nakinindokan 52 kooloyo konakalumbit, tukon lapa doi tanggal 25 bituwon Elul.

¹⁶Salataa komai musuh-musuh doi antara bangsa-bangsa potikunggon idoo molongol langge doo, yanila matakut nalapus koduduso, sabab saibino komian toiyo baikon limang doo kinubai tukon Mian Bisa natulung.

¹⁷Daanon doiya saibisaibino ko Yahudi nakatua daano koidan modaanokene pokilimi sulat tukon Tobia.

¹⁸Badaang ko Yahudi mianno polaing tukon Tobia, sabab yana Sekhanya namonianan Arah napau. Koidan kai Yohanan, Tobia napau, osowan tukon Mesulam napau moluko Berekhya napau.

¹⁹Maukai Tobia bangga-banggadudul batulis sulat doiyaku tuuk oto-otokutio yaku, maukai saibino kokatua Yahudi doo bantil-bantile doi salaanggu saibino Tobia namonondokan. Bailon doo saibino yaku mobantile, yanila laporkanggene doi yana.