Read Banggai NEHEMIA 8 Bible Online

NEHEMIA 8 - Banggai bible

NEHEMIA 8

¹Doi bituwon kopituno Israel mianno tataapo doi nakota suwe-suwele. Doi tanggal meeng bituwon doo yanila saibino pototongi doi Yerusalem, doi kintal Tataapon Babasal Paisu sasalanaka. Yanila kabiyo sulano Kitab Hukum Imam Ezra naalayo, meeng komian mopandoikene ko Ukum TEMENENO mobeekene doi Israel lolo doi Musa.

²Maka Ezra babayo kitab doo doi sidang salaano moluwe doi mala-malane, boine tukon pau-pau mobabasalo mangalatimo.

³Lapa doiya, luwedoi dodoa soono polong suung kooloyo, Ezra basakene ukum doo doi yanila. Yanila saibino mondongoli tukon palaatikanggene tuuno.

⁴Ezra kokondong doi bimbar kayung bungguno molapamo kinubai tuuk pososuungan nakapalaluan doo. Taikon doi bakalingano komian-mian nia kokondong: Matica, Sema, Anaya, Uria, Hilkia, Maaseya; bai taikon bobono sembeleng Pedaya kokondong, Misael, Malkia, Hasum, Hasbadana, Zakaria tukon Mesulam.

⁵Ezra kokondong doi panggung doo tatandak tukon luwedoi mian-mian doo, tobikon yanila saibino laate mokita. Mosobit yana bukayo kitab doo yanila saibino kokondong.

⁶Ezra bantil, “Nggalekai ko TEMENENO, Mian Bisa mobabasal!” Saibino korayat bingkate kolimano kata-katandak tukon timbiliyo, “Amin-amin!” Maka yanila sosubaiyo ko Mian Bisa.

⁷Sambuno lapa yanila luwe tukon doi tampat-tampat suwe-suwele daano Lewi mianno doo doiyamo: Yesua, Bani, Serabya, Yamin, Akub, Sabetai, Hodia, Maaseya, Kelita, Azarya, Yozabad, Haman tukon Pelaya.

⁸Yanila terjemakanggene ko Mian Bisa Na Hukum doo maka natalangkanggene bagian-bagian tobikon korayat namangalatikene domo binasardoo.

⁹Mondongolii hukum mobinasa doo teali susah tuuno, maka kokiil. Gubernur Nehemia tukon Imam Ezra pandoi hukum doo, tukon Lewi mian-mianno mojelaskanggene hukum doo, bantile doi sasaibino korayat buno doiya, “Oloyo nia oloyo mokusus tuuk TEMENENO Mu Mian Bisa, jadi inai mosusah kai kokiil.

¹⁰Dia budodoo mulemo; kaanno tukon monginumo tukon tedes. Beenamo sembeleng luwedoi kinaan tukon muanggur doi yanila mo kakulangan. Oloyo nia maimo kusus tuuk nda TEMENENO mobekene doi komuyu naikon teali bukuan.”

¹¹Koidan Lewi mian-mianno talakanggene korayat tukon ulang-ulange kona binantil, “Inai mosusah doi oloyo mokusus nia.”

¹²Maka mulemokai saibino korayat tuuk kaan tukon monginum tukon ebe-ebese kokinaan doi mian-mian bailon. Yanila tedes sabab lapamo mangalati koalati mobinasa doo yanila molengele.

¹³Modoakon pototongimokai saibino kobenseno kapalano, saibino koimam tukon Lewi mian-mianno, maka taus doi Ezra tuuk mopalajario koajaran-ajaran TEMENENO Na Hukum.

¹⁴ Yanila laate baikon doi Hukum lalomo TEMENENO mobekene Musa, TEMENENO sumboliyo Ko Israel namian dungol doi sandung-sandung doo dalulat polapakon kolamean sandung loon doo.

¹⁵Tobikon doiya posaapon ko Yerusalem doi kota-kota tukon doi kampung yanila pelenggene parentahnia, “Potausokai doi bunggukon tukon poalayo kokayung cemara langa-nagano, zaitun, kayung lisoson, palma tukon kayung-kayung bailon tuuk mokubai sandung pokonoi tukon palatulan doi Kitab Hukum lalomo.”

¹⁶Maka tausokai korayat mangala langalangano doo. Yanila saibino mokubai sandung-sandung doi ato-ato momesea bunggono doi yanila nabonua, doi nabonua kintalo, doi TEMENENO Na Bonua kintalo salaano, doi lapangan lolani Tataapon Babasal Paisu tukon doi lapangan lolani Tataapon Babasal Efraim.

¹⁷Saibino korayat momulemo luwedoi masakukonan doo mokubai sandung-sandung doo, maka dungol idoo. Naiyamo kotumbeno langge doo kinubai tambun tempo Yosua Nun napau, maka saibino sanaang tukon monondok.

¹⁸Pitu kooloyo kona kalumbit yanila nabalamean. Samba-samba kooloyo bagian-bagian kitab Mian Bisa na Hukum Ezra basakene. Doi oloyo koaluno kinubai ko acara tutupano, pokonoi tukon palatulan Hukum.