Read Banggai NEHEMIA 9 Bible Online

NEHEMIA 9 - Banggai bible

NEHEMIA 9

¹Doi tanggal lua kolono sangkap bituwon doo koidan, rayat Israel pototongi. Yanila bapuasa tuuk tudoikene kona sesaliano yanila nalalim-lalim. Yanila bangalasono luwedoi saibino komian molulubaton. Bunokai paloasan mobalasusah, yanila mopake toik karung tukon tiposio buta kooluno. Lapa doiya yanila kokondong tukon mangakukene saibino nalalim tukon yanila nambumbu nalalim.

³Ugat-ugat tolu kojam kona kalumbit, Kitab Hukum TEMENENO yanila Namian Bisa, binasakon doi yanila tukon tolu kojam koidan yanila mangakukene konalalim-lalim. Lapa doiya yanila sosuba tukon yanila sosubaiyo TEMENENO Mian Bisa.

⁴Idoo daano kobimbar tuuk Lewi mian-mianno tukon doi bungkuk kokondongokai Yesua, Bani, Kadmiel, Sebanya, Bani tukon Keneni. Tukon lalo bulungan yanila sambeang doi TEMENENO Mian Bisa.

⁵Kaledaan doi oloyo doo Lewi mianno atambunemo tundu nia: Yesua, Kadmiel, Bani, Hasabneya, Serebya, Hodia, Sebanya tukon Petahya. Yanila bantil, “Kokondongo tukon nggaalekai konda TEMENENO Mian Bisa! Nggalemokai doi Yana sidutu-posidutukon! Tanggalokai kosambu-No mo monondok tuuno, sambu mo tuuno, lisiio saibino komanggalan!”

⁶Lapa doiya korayat Israel sambeang bunodia, “Ikomokai TEMENENO, Ikomokai Mo Esah Tuuno; Ikoo tealikene kobituwong tukon posaapon kodapang, koidan tobun tukon buta tukon sasaibino koantoko, maka Ikoo beena tuboan tukon Ikoo pialayo. Doi-Koo saibino kokuasa doi timbu sosuba totuku; yanila molongol doi-Koo tukon ladanggene kotuulo.

⁷ Ikoomokai ko Mian Bisa, TEMENENO Mo Esah Tuuno. Ikoo lilike Abram luwedoi nabangsa tanga-tangano. Ur doi Babel tinggalemo, sabab Ikoo susumu mo katuaiyo. Maka Ikoo bekeene doi yana sambu moboolu: Abraham, doiyamo konaposumbui tambuun doiya.

⁸ Ikoo laate yana totobos doi-Koo tukon mangangga. Maka Ikoo kubaiyo kopaladandian tukon yana momonggol. Tano Kanaan, Het tukon Amori, buta Feris, Yebus tukon Girgasi, saibino doiya tadukai Ikoo bekene doiyana; salaku lipu dungolan saibino konakatulunan. Lapa doiya Ikoo daanokene paladandian doo doi yana, sabab Ikoo adil tukon molole.

⁹ Ikoo kitayo komai mbumbu nasakisawan doi tempo looluko; Ikoo lengele konakokilan doi Mesir tukon doi Tobun Teberau.

¹⁰ Doi tomundo Mesir Ikoo kabaiyo kolangge-langge mominasaindinggon, koidan doi pagawe tukon rayat doi natano, sabab Ikoo toiyo bulandomokai Mu umat yanila palasakitio. Maka tollongolo kosambu-Mu polong oloyo nia.

¹¹ Tuuk mokubaiyo loloon tuuk Mu umat, tobun Ikoo batayo; Ikoo pintasene yanila lise doi tobun nadumbakan moaki nambetak. Komo lelenggene molomos doi paisu lalomo moatean, buno batu motombung doi tobun mominatakuton.

¹² Tukon meeng kobunom Ikoo katuaiyo yanila doi oloyo namadialangan. Tukon doi tempo popook konaloloon Ikoo kodiolongio tukon sudong modaano koaung.

¹³ Luwedoi timbu Ikoo obulus doi Bunggul Sinai bunggono, maka Ikoo pobasilingonii Mu umat susuumu. Ikoo beena ukum, atulan tukon parentah moadil, bisa tukon balaguna.

¹⁴Oloyo Tadean mo moliyous sio yanila lamekene, tukon lolo doi Musa Mu ukum Ikoo beekene.

¹⁵ Salataa yanila malaal tukon kulango kokinaan, roti luwedoi timbu Ikoo obulusene. Tukon luwedoi batu momotikas, monggol tukon motikas, paisu moakiyenggene komolouan Ikoo lelene tuuno. Ikoo sumbuliyo yanila nadungoliyo kobuta Ikoo mo paladandikene doi yanila tukon totopi.

¹⁶ Bai komai mbumbu babanggal tukon motikas konoano; Mu parentah-parentah yanila aki taatio.

¹⁷ Yanila aki natulutiyo, Mu monondokan saibino toliminggenemo, tukon saibino Mu kinubai mominasaindinggon lapuso doi pononook. Tukon babanggal yanila momolilik meeng kokatua, tuuk mobabayo yanila doi Mesir, abali teali ata. Bai Ikoo Mian Bisa moiyase maafkanggene, moloas kona kasabalan, mondok konoano tukon mamasikene. Mumaasih tutuu minasaindinggon; Ikoo aki mutinggale yanila.

¹⁸ Yanila mokubaiyo pilogot buno saapi. Maka yanila bantil, ‘Naiamokai Mu Mian Bisa, mobabayo komuyu luwedoi Mesir, luwedoi po ataan.’ Ode Mian Bisa, Ikoo susumu komo yanila totulaiyo!

¹⁹ Mau doi padang lalomo yanila doo aki Ku tinggale, sabab Ikoo badaang kopo masihkonan. Sudong bunom tukon aung Ikoo moaki mububute koidan, motudoikene yanila kololoon doi oloyo tukon popook.

²⁰Tukon Mu-kuasa mo monondok Ikoo ajale yanila. Yanila kaane komana tukon monginum paisu nasukup.

²¹Sangkap polono kotaun kona kalumbit doi padang lalomo, Ikoo mosokupio saibino yanila napinalaluu. Yanila napakean aki nalusak, yanila aino aki namasakit kai bobongan.

²² Ikoo bekeene doi yanila manangan doi badaang kobatomundoan tukon bangsa doi pokallatanan yanila tano. Hesbon Tomundo tano Sihon yanila dungoliyo; Basan Tomundo lipu Og, yanila dungoliyo.

²³ Ikoo tealikene yanila nakatulunan buno bituwon-bituwon pauno doidapang kona kadaang. Ikoo beena yanila buta tuuk nadungoliyo, buta molapamo Ikoo dondikene doi nambumbu.

²⁴ Yanila nakatulunan kalayomokai kobuta Kanaan; modungoliyo indaa Ikoo lungguiyokai. Mumian Ikoo beena kuasa naiyasano motindokii doi bangsa-bangsa Kanaan tukon natomundo-tomundo.

²⁵ Mu umat rebuute kobenteng-benteng palataanan, tano momolumbang tukon bonua momono kaasan. Bubung-bubung tukon paisu naluwean yanila alayo, anggur asino, zaitun batango tukon saoh-saohno bailonggon. Yanila malanak sabab kaan loloiyo konoano namongiasan. Saibino Mubineekon mo monondok yanila kubaiyo.

²⁶ Bai Mu umat banggabut tukon aki nataatio Ikoo, aki namopusinggon ko ukum tukon Mupalaturan, mangakate nabi-nabi mo moingotikene yanila, tukon mosumboliyo yanila abali doi-Koo na Mian Bisa. Ode Temeneno samba lunggon koidan Ikoo yanila totulaiyo,

²⁷maka Ikoo salakanggene yanila doi namusuh tukon mo nggimal tuuno kuasayo tukon pipiike. Bai doi kasusahan lalomo mo dedekene, yanila masadai doi-Koo makabi potombonii. Luwedoi surgaa Ikoo mondongolii; tukon namaasih badaang Ikoo beena potimbili. Ikoo kirime kopamimpin tukon talenga moosobiyo yanila luwedoi musuh.

²⁸Bai salataa natano amanno koidan, yanila mosobit mokubai lalim koidan. Maka Ku salakanggene yanila koidan doi musuh mo pipiike. Mau tempo yanila sadal tukon badaang kona manasalan, yanila kabio doi-Koo nasinalamaton. Maka luwedoi surgaa Ikoo molongoli, tukon Ikoo tulungio badaang lunggon, sabab Ikoo seseange doi yanila tukon seange tuuno.

²⁹ Ikoo anukene yanila sulano Mu Otunggul naloingio, bai yanila tolake Mu ukum tukon noano nggimal. Banggokai, kalu Mu ukum linakukanggon, tantu naikon kotuboan monondok. Yanila motikas konoano tukon noa masakit, aki nayase molongol, aki naiyase loingiyo.

³⁰ Taun poisoboli kotaun Ikoo sabalo moingotikene; loloiyo saibino konabi, Mu Roh bantil doi yanila. Bai Mu umat doo tutupe kotolingaino, maka Ikoo salakanggene doi bangsa-bangsa posaapon kotano.

³¹Bai sabab Mu maasih babasal tuuno, aki Mutinggale kai Mumanase yanila. Bisa, Ikoomokai Mian Bisa mo akio mopokakana; Mumaasih babasal, badaang koposeseangan!

³² Ode Mian Bisa, komai Mian Bisa mobukuan Mian Bisa mo babasal tukon hebat! Tukon komo molole tanio saibino koperjanjian; Muperjanjian-perjanjian Ikoo daanokene tukon Ikoo lakukanggene. Tambun tempo saibino kotomundo Asyur pipiike kami polong niabuudoo, badaang kosakisan kami motoupio. Saibino komai tomundo, imam, nabii tukon saibino kopaulakai, koidan ndambumbu tukon rayat, lapamo sakisaa saibino. Inai toliminggene sakisaa doo! Inai kai Ikoo lapusene luwedoi Mu pononook!

³³Mutindakan adil, Ikoo ukume kami mobaladosa; Ikoo tataap molole maukai kami moono pososibolii.

³⁴Komai mbumbu, tomundo, imam tukon saibino kolaka-lakai langgale Mu ukum tukon aki namopusinggon. Saibino koparentah tukon panganukon Ikoo mobeekene, aki namopusinggon aki koidan nandongoliyo.

³⁵Ikoo bekene saibino kotomundo mo palentayo Mu umat, salataa yanila dungol doi buta mobebelak tukon molumbang Mubinekon. Mau yanila aki naotinggale tuboan molokis, aki nayase mangangga doi-Koo tukon kaledaan.

³⁶Maka diabudodoo kami nia teali ata doi Buta Ikoo mo beekene salaku pusaka. Buta nia molumbang, badaang kodunia hasilo mosiokai kami lasakanggene.

³⁷Saibino nabuta nia nahasil pandapatan sio nasinalakanggon doi tomundo-tomundo tano nia. Saibino pongusaha doo Ikoo bingkate doi Mu umat salaku ukuman komai lalim doi-Koo. Yanila noano namongiasan maparentah, doi butonggami tukon komai iyayon piniala. Tobikon doiya diabudodoo kami mandarita, badaang kokasusahan tukon matean!”

³⁸Saibino kadadian doo kona dasar, kami rayat Israel mokubai paladandian momonggol tukon totulis, tukon saibino komai katua caape, Lewi miano tukon meeng komai imam.