Read Banggai ESTER 1 Bible Online

ESTER 1 - Banggai bible

ESTER 1

¹ Doi Susan, batomundoan Persia natongodudukan, Ahasyweros mamarentah salaku tomundo. Konabatomundoan tongobos luwedoi 127 kopropinsi, tambuun luwedoi India polong doi Sudan.

³Doi taun kotoluno konabapamarentaan, Tomundo Ahasyweros yana mokubai meeng kolamean mobabasal motuuk doi sasaibino kosambu babasal tukon napagawe. Sasaibino ko Persia nasuludadu talengano tukon Media yanila kinolo doi lameanoo, bunomodoiya koidan sasaibino kogubernur tukon sambu-sambu motatandak konapangkat doi propinsi.

⁴Tomundo popitoikene konakasaan doi nakamali tukon natambonganan tukon nababasalan konabatomundoan noom kobituwon konakalumbit.

⁵Sambuno lapa doiya tomundo mokubai lamean koidan tuuk sasaibino korayat doi Susan, mau mokaasa maukai motalalais. Dolameanoo polong meeng kominggu lalomo tukon kinubai doi tomundo nakamali modaano kobubunga.

⁶Kokamali basaleano binubungai tukon lalanse moluwe doi toik lenan kobotiko manampal tukon moute, kinoot tukon alos lenan moalus tukon iniison doi kulaluk-kulaluk perak motokonoikon doi pualam sudong-sudongo. Doi suukano inobosi koikoi mosoni tukon perak doi soaan bungkono mo binubungai pualam moute, hablur memela, mutia kulito modidilengan tukon batu pirus momanmpal.

⁷Tomundo beena monginum anggur badaang tuuno doi mian gelas-gelas mosoni lalomo mo moisalamo kokaliangano.

⁸Sasaibino komian mokinolo aki nakinidik-kidik konaanggur ininum. Sasaibino kopeleleani doi kamali lapamo tomundo beena parenta, sulano sasamba komian mokinolo yanila lineleani pokokonoi namongiasan suwe-suwele.

⁹Pososinggat doiya Wasti, tomundo boine, koidan mokubai lamean motuuk doi sasaibino koboine doi kamali lalomo.

¹⁰Doi oloyo kopituno, tomundo inum-inum sahingga yana lasayo laba-laba tuuno. Sabab doiya yana uange kopitu kosambu motangalaas mo teali napeleleani naperibadi; tukon yaniladoo doiyamo Mehuman, Bizta, Harbona, Bigta, Abagta, Zetar tukon Karkas.

¹¹Yana sumboliiyo yanila mobabayo Tomundo boine Wasti doi salaano tukon mapake songko batomundoan doi oluno. Tomundo boine Wasti tambongan tuuno, tukon tomundo yase mookitakene konatambonganan doi sasaibino kosambu babasal tukon doi sasaibino konamian kinolo.

¹²Bai salataa sasaibino dopeleleanidoo pelenggene tomundo napalenta doi Tomundo boine Wasti aki naiyase lubat, sahingga tomundo nggimal tuuno.

¹³Tomundo daano konakabiasaan momangkabi pandapat doi sasaibino koahli tentang persoalan ukum tukon adat. Tobikon doiya yana uange sasaibino konapongotunggul mo toiyo oila komo sio nalinakukanggon doi palakaladoo bunoo doiya.

¹⁴Sasaibino dopongotinaudoo mo sidutu tomundo uange doiyamo: Karsena, Setar, Admata, Tarsis, Marsena tukon Memukan. Yanila doiyamo sambu-sambu doi Persia tukon Media mo mataani sambu mo tatandak doi batomundoan.

¹⁵Tomundo bantile doi mopitu komianoo, “Yaku lapamo sumboliiyo daku peleleani-peleleani doi Tomundo boine Wasti sulano napo sumboliiyo yana nalubat doiyaku. Bai yana aki naiyase. Manulut ukum, tindakan oila komo sio nda alayo motuuk doiyana?”

¹⁶Maka Memukam bantile doi tomundo tukon sasaibino kosambu mobabasal, “Tukon dokokubaidoo, bolikon Tuan tolong komo lapamo Tomundo boine Wasti totulaiyo, bai sasaibino Tuan napagawe, tukon lobian luwe doiya sasamba komala-malane doi batomundoan nia!

¹⁷Sabab dotomundodoo boine nakokubai naikon sasaibino koboine moola toiyo, tukon yanila naikon lailainggene konapo langkai suwe-suwele. Yanila naikon bantile baikon Tuan lapamo palentayo Tomundo boine Wasti sulano namangadap, bai tomundo boine aki naiyase molubat.

¹⁸Jadi, kalunaikon sasaibino kosambu-sambu babasal nabolo-boloki doi Persia tukon Media yanila lengele dolanggedoo, pasti yanila naikon mosobit mopailukene doi napo langkai suwe-suwele. Koakibato doiyamo, koboloki tumbokiiyo konalangkai naparentah tukon kolangkai naikon nggimoliiyo konaboloki.

¹⁹Tobikon doiya, kami kabiyo sulano Tuan namangala kaputusan baikon Tomundo boine Wasti akimo koidan namoola mangadap doi Tuan. Dokaputusanoo sio natinealikon undang-undang Persia tukon Media, sulano naakimo nainakiyonggon koikoidan. Salataa lapa doiya, beekenemokai Tomundo boine Wasti nakadudukan doi boine bailon mo lobian monondok luwedoi yana.

²⁰Kalunaikon Tuan nakaputusanoo lapamo tasabukon doi posaapon nabatomundoan nia moluas, sasamba koboloki naikon odotiiyo konalangkai, mau mo kaasa maukai motalalais.”

²¹Tomundo tukon sasaibino kosambu babasal yanila satujuiyo Memukan nausulloo, tukon tomundo mosobit yana molaksanakanggene.

²²Yana makapatu surat parenta doi sasaibino kopropinsi batomundoan, doi silingan lalomo tukon dopropinsidoo natulisan suwe-suwele. Doparentadoo konabantilano baikon doi sasamba korumah tangga, siokai lakai komo teali kapala, tukon komo moola mangala sasaibini kopatusan.