Read Banggai ESTER 2 Bible Online

ESTER 2 - Banggai bible

ESTER 2

¹Bubula kotempo doibundu, maukai tomundo akimo nanggimal koidan, bai yana daano banggadudul mopikikene Tomundo boine Wasti nakokubai tukon konatindakan molapamo alayo motuuk doiyana.

²Tobikkon doiya kopongotinau-pongotinau mopokokonoi tomundo yanila mebee usul bunonaiya, “Konamonondokan naminoumboliikon boiboine mo tambongan doi Tuan.

³Siokai Tuan namongoduduk pagawe-pagawe doi sasaibino kopropinsi doi batomundoan nia sulano napo moumbolii boiboine motambongan maka yanila sasaibino binaba doi kamali boine doi Susan nia. Hagai, sambu motangalaas mo teali kapala ruma tangga doi kamali boine, yana naikon komo uluse yanila tukon beena yanila pakuli tambonganan.

⁴Sambuno lapa doiya, siokai Tuan namolilik boine Tuan mo yase tuuno, tealikene yana tomundo boine salaku posoboli Tomundo boine Wasti.” Tomundo satujuiyo dootungguloo tukon laksanakanggenemo.

⁵Doi kota Susanoo daano komeeng ko Yahudi miano mosinombuikon Mordekhai Yair napau. Yana Kis tukon Simei nakaturunan moluwedoi Benyamin nabenseno.

⁶ Mordekhai lapamo tinaan salataa Nebukadnezar tomundo Babel, lungguiyo ko Yerusalem. Mordekhai binaba doi Babel polaing-laing tukon Yoyakhin, tomundo doi Yehuda, tukon badaang komo tinaan bailon.

⁷Yana daano kona montolidan idan, meeng koboine koduduso motambongan tukon kobutongo tambongan, kosambuno Ester, sadangkan kosambuno doi Ibrani doiyamo Hadasa. Ester tamano tukon tinano matemo tukon yana teali Mordekhai napau tubo tukon yana pialayo buno napau sinuung.

⁸Sambuno tomundo napalenta pinolonggono, badaang koboiboine mo pinototongikon doi Susan tukon Ester daano doi antara yaniladoo. Yana kai binaba doi tomundo nakamali tukon sinalakanggon doi Hagai kapala ruma tangga doi kamali boine.

⁹Hagai masainding tuuno yana beenamo boinedoo pakuli tambonganan tukon kinaan motangalaas. Ester biniyol taambikon doitampat momonondok tuuno doi kamali boinedoo tukon pitu koboine mo pandoy tuuno doi tomundo nakamali yanila tinugaskanggon moleleaniyo yana.

¹⁰Luwedoi Mordekhai naotunggul, Ester aki namoola mopailukene tomundo baikon yana daanokai meeng ko Yahudi miano.

¹¹Sasamba kooloyo Mordekhai amba-ambakon doi kamali boinedoo basaleano salaano tuuk momasadaikene Ester ndondoongo tukon oila naikon komo teali doiyana.

¹²Menurut paraturan, sasaibino koboine binee pakuli tambonganan konakalumbit meeng kotaun: noom kobituwon tukon likison sinambul kamangian tukon nom kobituwon koidan likison mosinapur lobo mobabangi bailon. Kalu lapamo doiya sasamba koboine malaat obos mangadap doi Tomundo Ahasyweros.

¹³Doi tempo meeng koboine mangadap doi tomundo, yana moola mapake oila tolong menurut kona iniyas.

¹⁴Yana binaba doi tomundo nakamali doi tempo popook, tukon namodoakon yana binaba doi kamali bailon, tukon Saagas komo uluse, meeng kosambu motangalaas mo uluse sasaibino ko tomundo naboloki piala. Boinedoo aki naikon namangadap doi tomundo koidan, alaasene kalu dotomundodoo palaluuwo tukon uwange yana tukon bantile kosambuno.

¹⁵Maka laatemokai kotempono Ester naobos sulano namangadap doi tomundo. - Ester doiyamokai Abihail napau tukon Mordekhai namontolidanan idan mo lapamo bingkate salaku napau susuungo; sasamba komian mo mbalenge Ester yanila masaindinggene. Salataa yana ambakon mangadap doi Tomundo Ester bapake loingikene Hegai mokapalaiyo kamali boine napotudoikon tukon naotunggul.

¹⁶Bunomokai doiya, doi taun kopituno Ahasyweros nabapamarentaan doi bituwon kosongulono, doiyamo bituwon Tebet, Ester binaba mangadap doi Tomundo Ahasyweros doi tomundo nakamali.

¹⁷Yana, sanaanggene tukon bahagiakanggene tomundo liisiyo koboiboine bailon. Tobikon doiya tomundo yase tuuno yana. Maka tomundo konoikene doiyana kosongko batomundoan doi Ester oluno tukon tealikene yana tomundo boine mosoboliyo Wasti tomundo boine.

¹⁸Sambuno lapa doiya, dotomundodoo mokubaimo lamean mobabasal salaku pongodotii doi Ester tukon koidan dotomundodoo yana koloyo sasaibino konapagawe tukon konasambu babasal. Yana umumkanggene kooloyo batadeiyan doi posaapon kobatomundoan tukon yana ebes-ebese kohadiah tukon lobi-lobian.

¹⁹Daanoon mo buno doiya tomundo odudukemo Mordekhai moteali napagawe negeri.

²⁰Doiya kosinggato koidan Ester akiyoon napailukene doi tomundo baikon yana daanokai komeeng ko Yahudi miano, sabab Mordekhai pantane yana. Ester taatiyo Mordekhai pokakana doi tempo yana nadaanoan mopoiposisik koutus-utuso napialaano yana.

²¹Daano kooloyo meeng, doi tempo Mordekhai daanoon mobalimang doi kamali, daano kolua komian tomundo nasambu motangalaas, doiyamo Bigtan tukon Teres, yanila pomeenggon moakateyo Tomundo Ahasyweros, sabab yanila mosikitene tuuno.

²²Donapoo tetello Mordekhai toiyomo yana mosobit mopelenggene doi Ester. Salataa Ester mantalima bilita moluwe Mordekhai yana koidan banggadudul mosalitaikene doi tomundo oilamo Mordekhai natinoidoo.

²³Dopalakaladoo inondosuuk, tukon totoi baikon dolapuranoo bisa. Loluakon domianoo inukum tukon ukuman moginatang. Pokokonoi tukon tomundo naparenta, dokadadianoo tinulis doi buku tundun batomundoan lalomo.