Read Banggai ESTER 3 Bible Online

ESTER 3 - Banggai bible

ESTER 3

¹Bubula kotempo doibundu Tomundo Ahasyweros angkate, tukon meeng komian mosinombuikon Haman teali perdana mentri. Haman doiyamo Hamedata napau moluwedoi Agag nakaturunan.

²Tomundo parentayo doi sasaibino konapagawe sulano napo odotiiyo Haman tukon napo somba doi salaano. Yanila sasaibino loingiyo doparentadoo, alaasene Mordekhai.

³Kopagawe-pagawe bailon doi kamali mansadai doiyana bulaando yana molumbaiyo kotomundo naparenta,

⁴tukon sasamba kooloyo yanila dulunggene yana sulano naloingiyomo, bai yana aki naiyase mondongoliiyo. Konabantilano, “Yaku Yahudi miano; yaku aki kusomba doi bangkapi.” Maka yanila lapurkanggene dolanggedoo doi Haman sabab yanila yase toiyo oilamo kotin dakano naikon kona inala motuuk doi Mordekhai.

⁵Haman nggimal tuuno salataa toiyo baikon Mordekhai aki naiyase somba doiyana.

⁶Tukon salataa yana toiyomo baikon Mordekhai meeng ko Yahudi miano, yana mangala meeng kokaputusan sulano naukume Mordekhai tukon aki natongo yana, bai naikon yana sikayo koidan sasaibino ko bangsa Yahudi doi Persia nabatomundoan.

⁷Doi taun kosongulono lua Tomundo Ahasyweros nabapamarentaan, doi bituwon komeengo, doiyamo bituwon Nisan, Haman mosumbolii momokubai undian mo binantil “Purim” sulano natinoi oloyo tukon bituwon oila komo sosok sulano nalaksanakanggene konatetel molokisoo. Sambuno lapa doiya maka tinataaponokai doi tanggal kosongulono tolu bituwon kosongulono lua, doiyamo bituwon Adar.

⁸Maka bantilokai Haman doi Tomundo, “Tuan, daano komeeng kobangsa mo sangalaasanggon mo sasabul doi sasamba kopropinsi doi batomundoan nia. Konapo adat istiadat posasala tuuno tukon bangsa-bangsa bailon. Yanila aki nataatiyo kobatomundoan naukum-ukum. Jadi, konamonodokan siokai Tuan inai mobatadikene napo kubaiyo oila konoanoila nainiyas.

⁹Kalu Tuan aki nakabalatan, siokai nakinubai komeeng kosurat parenta komaksuuto sulano napo inakate. Tukon kalu Tuan talimayo ata nausul, ata pasti naikon mongusokon 340.000 kokilogram koperak doi Tuan nakaas lalomo.”

¹⁰Salataa tomundo lengele doiya, yana banggadudul mobubute luwedoi limano saano kosousolut yana mopakeyo sulano nacaape kopengumuman-pengumuman moresmi, maka nabeekene doi Haman, doiyamo bangsa Yahudi namusuh mo babasal.

¹¹Tomundo bantile doiyana, “Dobangsadoo tukon koidan konadoy yaku salakanggene doikoo. Kubaiyomokai oilamo komu kinita monondok motuuk doi yanila.”

¹²Maka doi tanggal kosongulono tolu bituwon komeengo, Haman uange sasaibino kotomundo nadulutulis-dulutulis. Yanila sinumbolii momotulis sulat pokokonoi tukon sasibino komo pinanrentakon, maka nasinalin dosuratoo doi sasaibino kosilingan lalomo tukon sinalin doi sasaibino kotulisan lalomo mo pinake doi batomundoanoo. Dosuratoo tinulis luwedoi Tomundo Ahasyweros sambuno tukon sinaap tukon nasousolut, doibundu kinapatu tukon mosobit doi sasaibino kopamarenta, gubernur tukon sambu babasal doi sasaibino kopropinsi. Koantoko doiyamo parenta baikon doi tanggal kosongulono tolu bituwon Adar, sasaibino kobangsa Yahudi, mau momotua maukai momongula, mau boine maukai labuk-labuk, yanila sasaibino sio nainakate akiyo koampun, tukon konapo buat sio nasinita.

¹⁴Dopalentadoo sio nainumumkanggon doi sasamba kopropinsi sulano sasaibino komian lapamo batotobo doi oloyo mo lapamo tinantukonoo.

¹⁵Sasaibino komian mobinontiikon yanila sinumbolii namosobit lengget moantekene dosurat-suratoo doi sasaibino kopropinsi batomundoan. Luwe tomundo naposumbolii, doparentadoo inumumkanggono koidan doi Susan, Persia naibu kota. Sambuno lapa doiya tomundo tukon Haman yanila osu-osulang tukon monginum anggur, bai kokota Susan nggabut sabab dobilitadoo.