Read Banggai ESTER 4 Bible Online

ESTER 4 - Banggai bible

ESTER 4

¹Salataa Mordekhai lengele oila komo teali, yana siake konapakean tukon mapake toik karung salaku paloosan susaan. Yana tipase koabu doi oluno, maka naambakon doi kota tukon kokiil tukon buku-bukuan tukon susa konoano.

²Doi kamali tataapono mobabasal salaano yana tade, sabab komian mobapake karung pinantan usok.

³Tukon koidan doi sasaibino kopropinsi, sasaibino ko Yahudi miano kokiil salataa dotomundo naparentadoo inumumkanggono. Yanila bapuasa, kokiil tukon mangaduh, tukon badaang doi antara yanila komo mapake toik karung tukon banggolinggon doi abu bunggono.

⁴Salataa koboiboine tukon sasaibino kosambu motangalaas moleleaniyo Ester tomundo boine yanila lapurkanggene doiyana oilamo Mordekhai nalinakukanggon, Ester susah tuuno. Yana makapatu pakean doi Mordekhai salaku posoboli natoik karung, bai Mordekhai aki naiyase motalimayo.

⁵Doibundu Ester uange Hatah, meeng kosambu motangalaas tomundo mo tugaskanggene sulano naleleaniyo Ester. Hatah sinumbolii namansadaikene doi Mordekhai oilamo komo teali tukon bulaando yana mokubaiyo kotindakan mobunodoiya.

⁶Maka ampakonokai Hatah doi Mordekhai doi kota nalapangan doi kamali tataapono babasal salaano.

⁷Mordekhai salitaikene doiyana oila komo lapamo teali tukon bulaa kodoy perak Haman mo dandikene sulano nainusokon doi tomundo nakaas, kalu lapamo sasaibino ko Yahudi miano inakate.

⁸Mordekhai koidan beena doi Hatah salinan tomundo nasulat mo lapamo tinobuatonggon doi Susan tukon koidan koantoko palenta sulano ko Yahudi miano nainakate sasaibino. Yana sumboliiyo Hatah mobeekene dosulatoo doi Ester tukon natalakanggene dopalakaladoo doiyana, tukon koidan yana kabiyo sulano Ester namangadap doi tomundo sulano namangkabikene maasi doi nabangsa.

⁹Sambuno lapa doiya ampakonokai Hatah doi Ester tukon pelenggenemo Mordekhai nateteba doiyana.

¹⁰Bai Ester bintekene yana abali doi Mordekhai tukon babayo nateteba nia,

¹¹“Sasamba komian, mau mala-malane maukai boine, mo aki nainuang, bai mangadap tomundo doi kamali basaleano lalomo, sio nainukum mate. Doiya daanokai undang-undang tukon sasaibino komian tambuun luwedoi pongotinau tomundo polong doi rayat doi propinsi-propinsi, yanila toiyo dolanggedoo. Tongo daano komeeng kololoon sulano namoola luput luwedoi undang-undangoo, doiyamo kalunaikon tomundo ululemo konatongkat mosoni doi mianoo. Kalu doiya teali, yana naikon salamat. Bai sobituwono naiya tomundo akimo nauange yaku.”

¹²Maka Hatah pelenggene Ester natetebadoo doi Mordekhai.

¹³Doibundu Mordekhai kapatuwo konapoingotiikon nia doi Ester, “Inai moaanggene ikoo naikon lobian aman luwedoi Yahudi miano bailon, sabab ikoo dungol doi kamali!

¹⁴Ko Yahudi miano pasti naikon malaat potulungi tukon bulaando naikon konapoo usaha sahingga yanila salamat. Bai ikoo tataap batingaakon doi ndondoong lalomo pokakana nia, ikoo susuumu naikon mate tukon tamamu nakaluargaa naikon kabus kosalitano. Indee komo toiyo, uga-ugaatene tukon tempo-tempo mopokakana naiya ikoo liniliko moteali tomundo boine!”

¹⁵Maka Ester kapatuwo nabilita nia doi Mordekhai,

¹⁶“pototongikenemokai sasaibino ko Yahudi miano mo daanoon doi Susan sulano napo sambeangganaku. Inaikai napo kaan tukon inum tolu kooloyo konakalumbit tukon tolu kopopook. Yaku susuunggu tukon pau-pau boine moleleaniaku naikon apata koidan. Kalu lapamo doiya yaku naikon mangadap doi tomundo maukai doiya lupaiyo koundang-undang. Kalu yaku sio kumate sabab doiya sodiiyomokai kumate!”

¹⁷Maka ampakonokai Mordekhai tukon lakukanggene sasaibino Ester natinetebakon doiyana.