Read Banggai ESTER 5 Bible Online

ESTER 5 - Banggai bible

ESTER 5

¹Doi oloyo kotoluno napuasaan, Ester pakeyo konapakean batomundoan, maka yana ampakon doi kamali basaleano lalomo tukon kokondong doi tampat batotiliian salaano. Tomundo daanoon moosulang doi nakursii batomundoan mosasalaan doi tataaponoo.

²Salataa yana kitayo Ester dotomundo boinedoo mokokondong doi tonggulung, yana lubat konaseang doiyana tukon ulule kotongkat mosoni doiyana. Maka majumokai Ester, tukon singgile dotongkatoo tubono.

³Doibundu dotomundodoo mansadai doiyana, “Daano kooila, ikoo daku Permaisuri? Oilamo komu iniyas? Bantilemokai! Maukai mukabiyo kosembeleng luwedoi kubatomundoan nia, yaku beekonggon koidan doikoo.”

⁴Ester timbiliyo, “Kalu Tuan yase, siokai napopokia Tuan tukon Haman nalubat doi lamean yaku mokubaiyo tuuk Tuan.”

⁵Tomundo sumboliiyo sulano Haman namosobit lubat, sulano yanila namoola tulutiyo Ester naundangan. Maka yanila lubatokai doi Ester naperjamuanoo.

⁶Doi tempo monginum anggur, tomundo mansadai, “Budodoiya bantilemokai oilamo komu iniyas. Oilamokai komu kinabi yaku naikon beekene doikoo, maukai nasembeleng luwedoi kubatomundoan nia!”

⁷Ester timbiliyo,

⁸“Kalu Tuan yase modaanokene ata nakakabi, siokai Tuan tukon Haman nalubat koidan doi kupaladamuan yaku mokubaiyo namodowa popook. Sio doi paladamuanoo makanasodo ata napelenggene ata nakakabi doi Tuan.”

⁹Haman mule luwedoi Ester Tomundo boine nalamean tukon laba-laba konoano. Bai salataa polong doi kamali tataapono babasal yana kitayo Mordekhai mo aki nakokondong sulano naodotiiyo doiyana, yana teali nggimal tuuno.

¹⁰Bai yana taane konanggimalan tukon mule doi nabonua. Salataa polong indaa yana sumboliiyo kotula-tulano nalubat tukon kabiyo konaboloki, Zeles, sulano naosulang posinggat-singgat yanila.

¹¹Maka Haman bantil-bantil doi yanila tukon babanggaakene konakaasaan, konabadaangan konapau-pau malaneno, konakadudukan mo penting motalimayo luwedoi tomundo, tukon konapangkat molobian kona tatandakan tukon pagawe-pagawe bailon.

¹²Konabantilano koidan, “Tukon koidan Ester Tomundo boine tongo undange yaku tukon tomundo doi napaladamuan yana mo kubaiyo tuuk doikami, tukon namodowa popook yana undange kami koidan.

¹³Bai sasaibino doiya akiyo koalatino, kalu yaku daanoon mokitayo Mordekhai, do Yahudidoo miano, mo osulang doi kamali tataapono babasal.”

¹⁴Salataa konaboloki tukon sasaibino kotula-tulano lengele doiya yanila usulkanggene buno naiya, “Mosumboliimo mian namokubai sudong batudean konakatandak lua kolono lua kometer. Salataa namodowakon dowa-dowa makabimokai izin doi tomundo sulano Mordekhai natinude doi sudongoo. Tukon kalu bunomo doiya ikoo moolamo ampakon doi paladamuanoo tukon noamu motanaang.” Dousullo monondok tuuno manurut Haman napandapat, tobikon doiya yana mosobit mosumbolii mian momokubai sudong batudeanoo.