Read Banggai ESTER 6 Bible Online

ESTER 6 - Banggai bible

ESTER 6

¹Doi popookoo koidan tomundo aki nateali moolo. Sabab doiya yana kabiyo nalineleikon kobuku natinulisan kobatomundoan tunduno tukon yana sumboliiyo komian mobacakanggene.

² Doi lalomo linaato kotulisano baikon Mordekhai lapamo lapurkanggene bulaando koakal mokinubai sulano tomundo moola nainakate molapamo Bigtan tukon Teres batetelikene, yanila luaila daanokai sambu motangalaas mo dagaiyo tomundo nakombiang.

³Tomundo mansadai, “Oila komo lapamo bineekon doi Mordekhaidoo salaku pongodotii tukon pabalos najasa?” Peleleani-peleleanidoo timbiliyo “Yana aki namantalima oioila.”

⁴Maka dotomundodoo bantile, “Indee luwedoi kupagawe komo daano doi kamali budodoiya?” Doiya kosinggato koidan Haman sodo nausok doi kamali basaleano; yana yase makabi izin doi tomundo sulano Mordekhai natinude doi sudong mo lapamo kinokondongoo.

⁵Dopeleleani-peleleanidoo timbiliyo doi tomundo, “Haman daano doi kamali tukon yana yase momangadap doi Tuan.” Doi bundu tomundo bantile, “Sumboliiyo nausok.”

⁶Salataa Haman usok, tomundo bantile doiyana, “Daano komian yaku moiyase beena pongodotii babasal. Oilakai naikon daku kinubai motuuk doiyana?” Haman pikikene, “Indee koidan komo binee pongodotii mo buno doiya konababasalan luwedoi tomundo? Pasti yakumo!”

⁷Tobikon doiya yana timbiliyo, “Siokai domianoo nalineleikon kopakean batomundoan mo biasa Tuan susuungo pakeyo. Maka tomundo naadalan mo binubungai tukon lambang-lambang batomundoan.

⁹Meeng kosambu negara babasal moluwedoi golongan mian babasal yanamokai komo sio nakonoikene dopakeanoo doi mian Tuan moiyase moodotiiyodoo, maka domianoo linolaing tukon mian-mian badaang tukon yana lokitiyo Tomundo naadalan loloiyo kokota nalapangan. Dosambu babasaloo yana ambakon doi salaano tukon banti-bantile, ‘Bunomokai naiya kalu kotomundo mebee panggaal doi mian yana moodotiiyo!’ ”

¹⁰Doibundu bantilokai tomundo doi Haman, “Mosobit, ndokiiyo kopakean doadalanoo tukon beekenemokai sasaibino dopongodotiidoo doi Mordekhai, do Yahudi mianodoo. Kubaiyomokai pokakana komu binantiloo tadodoon, inai mokulangiyo meeng kobantilankai. Ikoo moola laate iyana moosulang doi kamali tataapono babasal salaano.”

¹¹Maka Haman ndokiiyo kopakean tukon doadalanoo tukon yana konoikene dopakeanoo doi Mordekhai. Salataa Mordekhai lokitiyo dodalanoo Haman loolainge loloiyo kokota nalapangan, maka nabantil-bantile, “Kitayo, bunokai naiya kalu tomundo mebee paanggaan doi mian yana mo odotiiyo!”

¹²Sambuno lapa doiya Mordekhai abalimo doi kamali tataapono babasal. Bai Haman yana kakaate mosobit mule. Yana aki naiyase mian nakitayo sabab yana mammaa tuuno, tukon yana tombukiyo koduduso.

¹³Doi naboloki tukon sasaibino kotulano yana basalitakene oila komo lapamo yana toupiyo. Doibundu konaboloki tukon tula-tulano mopandoidoo bantile doiyana, “Mordekhai tambuuno molungguiyo ikoo. Yana Yahudi miano tukon ikoo aki naikon mumoola lawane. Yana pasti naikon lungguiyo ikoo.”

¹⁴Yanila daanoon mobasalita tukon Haman, sasaibino kosambu doi kamali lubat tukon ndia-ndia yanila moantekene Haman doi Ester napaladamuanoo.