Read Banggai ESTER 8 Bible Online

ESTER 8 - Banggai bible

ESTER 8

¹Doi oloyodoo koidan Tomundo Ahasyweros beekenemo doi Ester Tomundo boine sasaibino Haman nabuat, do Yahudidoo miano namusuh babasal. Ester pailukene doi tomundo baikon Mordekhai montolidan idan, tukon yana, maka doiya kosinggato koidan Mordekhai binee haak sulano namangadap doi tomundo maukai yana naaki nainuang loolukon.

²Tomundo liate konasousolut molapamo alayo koikoidan luwedoi Haman tukon yana beekenemo doi Mordekhai. Tukon Ester oduduke Mordekhai teali pototooli Haman nabuat.

³Sambuno lapa doiya Ester mangadap koidan doi tomundo. Yana somba polong kokiil tukon kabiyo sulano tomundo naakiyenggene kotetel molokis molapamo Haman kubaiyo motuuk doi Yahudi mianoila.

⁴Salataa tomundo kitayo Ester nakokubai mobuno doiya yana ulule konatongkat mosoni doi Ester, maka Ester banggadudul kokondong tukon bantile,

⁵“Kalu Tuan sanaang tukon seange doi ata, siokai Tuan natobuatene koikoidan Haman nasurat-surat koantoko parenta mosilakaiyo ko Yahudi miano doi batomundoan nia.

⁶Aki namungkin ata mosanaang nakitayo kobangsa tukon ata utuso pulino kabus inakate?”

⁷Maka Tomundo Ahasyweros bantile doi Ester Tomundo boinedoo tukon Mordekhai, “Takainomo, yaku lapamo tudeyo Haman sabab yana yase moakateyo ko Yahudi miano, tukon konabuat yaku beekenemo doi Ester.

⁸Bai kosulat molapamo tinulis luwedoi tomundo sambuno tukon binee cap tomundo, aki namoola binubut koikoidan. Bai, Yaku pataikene komuyu motulis surat tentang bangsa Yahudi, oila tolong kopo pinikikon monondok. Tulisemokai dosulatoo luwe sambunggu tukon binee saap batomundoan.”

⁹Doi oloyodoo koidan, doiyamo doi tanggal 23 bituwon kotoluno, bituwon Siwan, Mordekhai uwange sasaibino tomundo nadulutulis tukon yana palentayo yanila motulis surat doi sasaibino gubernur, sasaibino kobupati tukon sasaibino kosambu babasal doi 127 kopropinsi, luwedoi India polong Sudan. Dosurat-suratoo tinulis doi silingan lalomo tukon tulisan-tulisan moluwedoi propinsi-propinsidoo suwe-suwele. Yana koidan kapatuwo dosuratoo doi Yahudi miano doi silingan lalomo tukon tulisan Yahudi.

¹⁰Dosurat-suratoo Mordekhai tandatanganiyo luwe Tomundo Ahasyweros sambuno tukon binee saap batomundoan. Sambuno lapa tinulis dosurat-suratoo Mordekhai mosumbolii bito-bito moantekene doi propinsi-propinsi batomundoan tukon yanila molokiti adalan momodoling nabulen tomundo koona.

¹¹Dosurat-suratoo nayatakanggene baikon tomundo pataikene ko Yahudi miano doi sasamba kokota sulano yanila napomeenggon tukon nabelayo kobutongoila. Kalu naikon yanila linubotii tukon linobosi luwedoi mian-mian momapake sinapan moluwedoi indeemo ko bangsa tukon ko propinsino, yanila moola lawane tukon akateyo sasaibino komian molubat tukon molobosidoo tukon konapo boloki tukon napo pau-pau; yanila moola sapal-sapale donapo musuh-musudoo polong kabus tukon yanila lambase konapobuat.

¹²Doparentadoo sio nalinaksanakanggon doi sasaibino kobatomundoan Persia doi oloyo molapamo Haman tataapene tuuk moakateyo ko Yahudi miano, doiyamo doi tanggal kosongulono tolu bituwon kosongulono lua, bituwon Adar.

¹³Surat palentadoo tinobuatonggon salaku undang-undang tukon pinolonggon doi sasaibino komian doi sasaibino kopropinsi sulano kobangsa Yahudi nabatotobo badagai molawane konamusuh-musuh kalu naikon laatemo kooloyono.

¹⁴Doibundu sasaibino dobito-bitodoo lenggeto tukon yanila lokitiyo tomundo naadalan. Tukon koidan doi Susan ibukota negara, doparentadoo binacakanggono.

¹⁵Sambuno lapa doiya Mordekhai otinggalemo kokamali tukon mapake pakean batomundoan kobotiko manampal tukon moute, juba samelaon luwedoi lenan moalus tukon songgo mosoni momonondok tuuno. Kokota Susan tumbuno nggeleamon wookon sabab nalaba-labaan.

¹⁶Ko Yahudi miano lasayo laba tukon sanaang, bahagia tukon banggaal.

¹⁷Koidan doi sasamba kokota tukon propinsi, doi naandokai dotomundo nasurat palentadoo nabinacakanggonan, ko Yahudi mian-miano laba-laba, basa-basanaang tukon balamean. Tukon koidan badaang luwedoi lipu tumbuno komo teali bangsa Yahudi miano, sabab yanila matakut doi bangsadoo.