Read Banggai ESTER 9 Bible Online

ESTER 9 - Banggai bible

ESTER 9

¹Doibundu laatemokai kotanggal kosongulono tolu bituwon Adar, doiyamo oloyo molapamo tinataakanggon tuuk limangano kotomundo naparenta luwe Yahudi mian-miano. Ko Yahudi miano namusuh-musuh lapamo totiiliyo dooloyodoo sulano napo kuasaiyo dobangsadoo. Bai tokita Yahudikai mianoila komo lungguiyo yanila.

²Doi sasamba kokota, ko Yahudi mian-miano pototongi tukon pomeenggon sulano napo lubotiiyo tukon lobosiyo sasaibino komian mo baeteteliyo lokis doi yanila. Sasaibino kobangsa-bangsa teali matakutene doi yanila sahingga akiyokai komeeng komian mobarani sasalaane yanila.

³Bai sasaibino kosambu mobabasal doi propinsidoo, sasaibino ko gubernur, kobupati tukon sambu batomundoan yanila sasaibino tomboniiyo ko Yahudi miano sabab yanila sasaibino koidan matakutene doi Mordekhai.

⁴Doi posaapon kobatomundoan komian toiyo baikon Mordekhai babasal tuuno konapangaruh doi kamali tukon pololokon daano konakuasa.

⁵Bunomokai doiya kobangsa Yahudi namoolaan kubaiyo sasaibino motuuk doi napo musuh, yanila lubotiiyo tukon lobosiyo tukon mapake bakoko maka napo akateyo konapo musuh.

⁶Doi Susan, indaamo kona tongodudukan konegara, tukon indaamo koidan ko Yahudi miano namangakatean lima kosakato komian.

⁷Dopai mianoo mo inakate talalaing kosongulo Haman napau mala-malaneno doiyamo Hamedata natumbu, Yahudi miano namusuh mobabasal. Kopai sambu-sambuno doiyamo: Parsandata, Dalfon, Aspata, Porata, Adalya, Aridata, Parmasta, Arisai, Aridai tukon Waizata. Bai ko Yahudi miano aki napo lambase dopai mianoo yanila moakateyo nabuat.

¹¹Doi oloyodoo koidan daanomo komian mopopitoikene doi tomundo komian aito moinakate doi Susan.

¹²Tomundo bantile doi Ester Tomundo Boinedoo, “Tongo doi Susan tolong ko Yahudi miano moolamo mangakate 500 komian, talalaing Haman napau mosongulo. Bainokai koidan doi propinsi-propinsi! Oilamokai konapo linakukanggon indaa! Jadi, oilamo koidan komu kinabi budodoiya? Bantilemo tolong, pasti ikoo naikon malaat!”

¹³Ester timbiliyo, “Kalu Tuan yase, siokai ko Yahudi miano mo dungol doi Susan nia namodowa dowa-dowa yanila napinataikon mokuwaikene koidan oila konapo kinubai doi oloyo nia. Tukon koidan, siokai Haman napau-pau bajanodoo nainiison doi sudong-sudong bangiisonan.”

¹⁴Doibundu dotomundodoo mebee palenta sulano nalinaksanakanggon Ester nakakabi; kosulat palentadoo dinaanokono tongo tuuk doi kota Susan tolong tukon Haman napau-pau bajano mosongulodoo sio nainiison.

¹⁵Jadi, doi tanggal kosongoluno sangkap doi bituwon Adar, kopai Yahudi miano doi Susan sio napototongi koikoidan tukon yanila sio namangakate 300 komian koidan doi kotadoo. Tukon koidan yanila aki napo lambase domian-mianoo nabuat.

¹⁶Ko Yahudi mianoila modungol doi propinsi-propinsi koidan lapamo pototongi tukon yanila lapamo batotobo mobada-badagai. Yanila lungguiyo konapo musuh tukon yanila mangakate 75.000 komian mo mosikitene yanila. Bai aki napo lambase domian-mianoo nabuat.

¹⁷Dokadadianoo natealian doi tanggal kosongulono tolu doi bituwon Adar. Modowakon koidan, doi tanggal kosongulono sangkap, akimo koidan napo laksanakanggene komangakatean, bai yanila tongo lamekene dooloyodoo tukon laba-laba.

¹⁸Bai ko Yahudi miano mo daano doi Susan yanila lamekene kotanggal songulo lima salaku oloyo babasal, sabab yanila momangakatemo musuh doi tanggal kosongulono tolu tukon kosongulono sangkap, tukon doi tanggal kosongulono lima yanila tademo.

¹⁹Doiyamokai kosababpo ko Yahudi miano mo dungol doi kota-kota poipoisik yanila ingotiiyo kotanggal kosongulono sangkap doi bituwon Adar salaku oloyo laba-labaan, oloyo balameanan labaan tukon yanila suwe-suwele posabeat buno kinaan.

²⁰Sambuno lapa doiya Mordekhai tulisemo sasaibino dokadadianoo tukon yana kopotuiyo sulat doi sasaibino ko Yahudi miano doi posaapon kobatomundoan doi Persia, mau modoon, maukai mo loolani.

²¹Koantoko dosulatoo doiyamo lamekanano kotanggal songulo sangkap tukon songulo lima bituwon Adar sasamba kotaun.

²²Sabab doi oloyo-oloyodoo doiyamo konapo lungguiyano konapo musuh-musuh, sahingga konapo susaan tukon namasakitan konoano tobolii teali laba-labaan tukon yanila lasayo sanaango. Tobikon doiya sio napo lamekene dooloyo-oloyodoo, tukon yanila mokubai lamean kaanan tukon yanila suwe-suwele pobee kinaan tukon yanila mangabos sadakaa doi mian mo talalais.

²³Mordekhai napalentadoo ko Yahudi miano loingiyo tukon bunomokai doiya konatealian dolameanoo sahingga teali adat kabiasaan sasamba kotaun.

²⁴ Haman Hamedata napau, Agag nakatulunan, Yahudi miano namusuh mobabasal. Yanila lapamo mokubai undi mosinombuikon koidan “Purim” sulano natinatapkanggon komeeng kooloyo tuuk tembeliano ko Yahudi miano; sulano naakabuse yanila.

²⁵Bai Ester mangadap doi tomundo, tukon mebee palenta mototulis momangaanikene kotetel molokis Haman mokubaiyo tukon tepake kobutongo susuungo, sahingga yana tukon konapau-pau iniison doi sudong banggiisonan.

²⁶Tobikon doiya dooloyo-oloyo babasaloo sinombuikon Purim. Mordekhai nasulat tukon sasaibino komo lapamo ko Yahudi miano toupiyo,

²⁷tealikene yanila mokubai meeng koatulan motuuk doi butongoila susuungo, doi napo katulunan tukon doi sasaibino komian mo teali bangsa Yahudi miano. Manulut dopalentadoo sasamba kotaun yanila sio napo lamekene dooloyodoo molua molapamo Mordekhai tataapene.

²⁸Tinatapkanggon koidan baikon polong sidutu-posidutukon dooloyo-oloyo Purimoo sio naninonook tukon sasamba kokaluargaa doi sasamba kopropinsi lalomo tukon doi sasamba kokota.

²⁹Sanglaasan doiya, posinggat-singgat Mordekhai nasurat, Tomundo Boine Ester Abihail napau yana motulis sulat koluano, mo dukunge Mordekhai nasulat antoko mengenai do Purimoo.

³⁰Dosulatoo kinopotuikon doi sasaibino ko Yahudi miano, tukon konasinalinan-sinalinan kinapatu doi 127 kopropinsi doi Persia nabatomundoan. Dosulatoo linolaing sambeang sulano kobangsa Yahudi nasidutu sanaang tukon aman.

³¹Dosulatoo koidan sumboliiyo sulano yanila tukon konapo katulunan sio naingotiiyo dooloyo-oloyo Purimoo doi tempo motapaat, bunopokakana yanila moingotiiyo kotempo puasa tukon tempo susaan. Doiyamokai Mordekhai tukon Tomundo Boine Ester nasulat antoko.

³²Ester naparenta mo tataapkanggene ko Purim atur-aturano, tinulis doi buku lalomo.