Read Banggai TOBUATAN 1 Bible Online

TOBUATAN 1 - Banggai bible

TOBUATAN 1

¹ Yakub koidan sinombuikon Israel, ampakon doi Mesir tukon nalabuk-labuk tukon napai boloki suwe-suwele. Yakub napau-pau doiyamo:

²Ruben Simeon Lewi Yehuda

³Isakhar Zebulon Benyamin

⁴Dan Naftali Gad Asyer

⁵Yakub kona katulunanoo sasaibino koaito pitu kolono komian. Yusuf tautausono daano doi Mesir.

⁶Moimoiya kotempo doibundu Yusuf tukon nautus-utus matemo, bunomo koidan komian mopososinggat tukon yana.

⁷ Bai konapoo katulunan, doiyamo Israel miano, malaat pau tumbu mobadaang, tukon koaitoila tosuungi tukon mosobit tuuno, sampe kotano Mesir moono tukon yanila.

⁸ Doibundu meeng kotomundo moboolu moaki natingoniiyo Yusuf tambuuno mobaparentah doi Mesir.

⁹Yana bantile doi namian, “Do Israel mianodoo lubatene kosilakaan tuuno doi kita, sabab yanila badaang tuuno tukon liisiyo konabukuanan doi kita.

¹⁰ Kalu andeno teali kopolobosian, daano kona loloon yanila mopomeenggon tukon komusuh sulano nalawane kita, maka obulen otinggale nalipu nia. Kita sio ndamoumbolii loloon sulano naaki napoo tosuungi badaang koidan.”

¹¹Maka ko Mesir miano mongoduduk padagai-padagai doi Israel miano sulano naosulite yanila natuboan tukon balimangan momotoong. Tomundo pakisaayo yanila mobangune kokota-kota Pitom tukon Raamses teali pusat bangabosan lolonggu.

¹²Bai pololokon ko Mesir miano lailainggene yanila, bai ko Israel miano pololokon tosuungi konakadaang, tukon momeenggon yanila tababandakon doi posaapon dolipudoo, sampe ko Mesir miano teali matakutene doi yanila.

¹³Maka tukon konapoo kulokisan yanila lailainggene ko Israel miano,

¹⁴tukon sakisaayo konapoo tuboan. Doi naakiyonan koseang yanila pinakisaa mobalimang motoong doi moisalomo kobangunan tukon doi kombung-kombung.

¹⁵Doibundu kotomundo Mesir mebee parenta doi Sifra tukon Pua, lua kosandol motulungiyo koboine-boine Ibrani momosuung.

¹⁶Tomundo Mesir bantile, “Doi tempo kopotulungiyano koboine Ibrani mosuung, poneneeke naiya: Kalu pau mososuungoo mala-malane, akateyomo yana! Kalu pau mososuung boine, batadikene yana natubo.”

¹⁷Bai dosandoloo molua mian momatakut doi Mian Bisa. Yanila aki naiyase lakukene kotamundo naparentah tukon batadikene sasaibino kopaulumboon mala-malaneno natubo.

¹⁸Maka tomundo uange loluakon dosandoloo tukon mansadai, “Bulaando komuyu mosodiinggene kopau-pau malaneno natubo?”

¹⁹Yanila timbiliyo, “Koboine Ibrani aki nabuno boine Mesir. Yanila ambang tuuno namosuung. Akiyoon kosandol nalubat, tosuungo konapau.”

²⁰Maka Mian Bisa balakaatiyo dosandol-sandoloo tukon beena katulunan doi yanila, sabab yanila odotiiyo ko Mian Bisa. Tukon ko Israel mianokai tosuungi badaang tukon bukuan.

²² Maka tomundo beena naparentah nia doi sasaibino kona mian, “Sasamba ko Ibrani miano napau mala-malaneno mosodo sosuung sio nainaison doi Nil Paisunobatango lalomo, bai sasaibino konapau moboineno moola binatadikon tubo.”