Read Banggai TOBUATAN 10 Bible Online

TOBUATAN 10 - Banggai bible

TOBUATAN 10

¹TEMENENO bantile doi Musa, “Ampakono mangadap doi tomundo. Yaku tealikenemo yana tukon kosambu-sambu kakatikase konoano sulano Kumoola mokubai langge-langge minasaindinggon doi yanila tanga-tangano,

²tukon sulano ikoo moola salitaikene doi mupau tumbu bulaando Daku maengganano kobangsa Mesir tukon langge-langge mominasaindinggonoo. Maka komuyu sasaibino naikon toiyo baikon Yakumo ko TEMENENO.”

³Maka Musa tukon Harun ampakon mangadap tomundo tukon bantile doi yana, “TEMENENO, Ibrani miano na Mian Bisa, bantile, ‘Polong doiyaa kotempono ikoo aki muiyase tootuku doiya-Ku? Pataikenemokai Daku mian naampakon, sulano yanila moola bakaleda doiya-Ku.

⁴Kalu ikoo daano koidan motolake, maka modowa naikon Kulubatene kobetek doimulipu.

⁵Posaapon kotano bunggono naikon totombuki sasaibino tukon betek mobadaang tuunodoo. Sasaibino kolangge mosinakkanggon labino, tukon kayung-kayung batango moaki nainakate doi udan es, naikon dobetekoo akabusemo.

⁶Komubatomundoan, mukamali sambu-sambu tukon rayat nabonua-bonua naikon moona betek Nabalaania naikon lobian konakulokisan luwedoi oila komo biasamo tinoupi doi tumbumuyu.’ ” Doibundu Musa bangabalinggon tukon ampakon.

⁷Pakabantilo kopai sambu-sambu doi tomundo, “Polong doiyaando domianoo nakubaiyano susa kita? Pataikenemo sasaibino ko Israel mianodoo naampakon sulano mobakaleda doi TEMENENO, naapa Mian Bisa. Kitayomo konda lipu nia mominanaso.”

⁸Maka Musa tukon Harun inuang abali mangadap doi tomundo. Tomundo bantile doiyanila, “Komuyu moolamo poampakon sulano pobakaleda doi TEMENENO mu Mian Bisa. Bai indee tolong doi antara komuyu naikon komo ampakon?”

⁹Musa timbiliyo, “Kami sasaibino, mau komo tatabokon maukai komo motua. Kami naikon babayo sasaibino kombai pau, sasaibino kosapi, domba tukon kombai mbembe, sabab kami sio mbai mokubai meeng kolamean mobabasal tuuk odotiiyano ko TEMENENO.”

¹⁰Tomundo bantile, “Aki namungkin yaku pataikene komuyu babayo koboiboine tukon mupau-pau! Dopo kinabidoo pokakana tolong tukon moinikene yaku mokabiyo ko TEMENENO mobalakaatiyo komuyu. Tontongo doiyaku baikon komuyu banekat lokis.

¹¹Aki! Tolongo mian malaneno moola ampakon sulano bakaleda doi TEMENENO, kalu komuyu takainomo yase bakaleda tolong!” Tukon bantilan-bantilanoo Musa tukon Harun siniika luwedoi kamali.

¹²Maka TEMENENO bantile doi Musa, “Tidekene kolimamu doi tano Mesir bunggono. Betek-betek naikon lubat tukon kaane sasaibino kolangge labino mosinakkanggon doi nalapaan koudan es.”

¹³Musa tidekene konatongkat tukon TEMENENO kabaiyo puul kombombuul doi tolopot doi lipudoo meeng kooloyo tukon meeng kopopook. Adukon dodowa dombombuulo babayo kobetek-betek

¹⁴ mobolikon langge konakadaang, sampe moonomo sasaibino kolipu. Akiyoon nabiasa komian mokita betek bunodoiya konakadaang, tukon salataa lapamo doiya langge bunodoiya akimo teali koidan.

¹⁵Posaapon kotano bunggono tinombuki betek polong mopook konatokitaan. Yanila kaane oila tolong komo aki nainakate doi udan esoo, tousokon kokayung-kayung saano. Doi posaapon kotano Mesir akiyo komeeng kolangge manampal mototinggal doi kayung-kayung kai langge mosinakakon.

¹⁶Tomundo mosobit uange Musa tukon Harun maka bantile, “Yaku baladosamo doi TEMENENO mu Mian Bisa tukon doi komuyu.

¹⁷Ompuniyomo dakudosa tuuk naiya nia, tukon posambeango doi TEMENENO mu Mian Bisa, sulano Naalayo luwedoi yaku koukuman moakate yaku nia.”

¹⁸Musa otinggale tomundo tukon basambeang doi TEMENENO.

¹⁹Maka TEMENENO boliiyo kombombuul salaano teali mbombuul talise momakansang tuuno. Betek-betekoo mbombuul puule tukon binaba doi Tobun Gelagah. Akiyono maumeeng komo totinggal doi posaapon kotano Mesir.

²⁰Bai TEMENENO tealikene tomundo kakatikase konoano, tukon yana aki napataikene ko Israel miano naampakon.

²¹TEMENENO bantile doi Musa, “Tidekenemo kolimamu doi dapang, maka kotano Mesir naikon sosunggupi londomi.”

²² Musa tidekene kolimano doi dapang, tukon tolu kooloyo konakalumbit posaapon kotano Mesir tosunggupi londomi.

²³Mesir miano aki namoola mokita oioila tukon namalumbitan temponoo akiyo komeeng komiankai moampakon doi yaa-yaa. Bai doi Israel miano nabonua-bonua tataap madialan.

²⁴Maka tomundo uange Musa tukon bantile, “Komuyu moola ampakon bakaleda doi mu TEMENENO. Komian boine tukon pau-pau moola malaing. Bai sapi, domba, tukon mumbembe aki namoola binaba.”

²⁵Musa timbiliyo, “Kalu buno doiya ikoo daku Tuan sio mubeena kami iyayon piniala tuuk sosubakon tukon tuuk sosuba sinua doi TEMENENO, mbai Mian Bisa.

²⁶Sasaibino kombai iyayon piniala sio mbai babayo; mau nabaino meengkai aki naikon mbai tinggale. Luwedoi iyayon pinialadoo kami lilike naando naikon komo sinosubakon doi TEMENENO mbai Mian Bisa. Sodo indaa maka naikon mbai toiyo iyayon piniala naando naikon kombai sinosubakon.”

²⁷TEMENENO tealikene tomundo kakatikase konoano sampe yana aki naiyase pataikene ko Israel mian moampakon.

²⁸Tomundo nabantilano doi Musa, “Ampakono luwedoi salaanggu! Inai napolong kukitayo ikoo kodian! Kalu polong kukitayo koidan kodudusomu, ikoo naikon mate!”

²⁹“Buno ku Tuan nabantilano,” Musa bantile, “Ku Tuan tutuu akimo naikon nakitayo yaku koidan.”