Read Banggai TOBUATAN 11 Bible Online

TOBUATAN 11 - Banggai bible

TOBUATAN 11

¹TEMENENO bantile doi Musa, “Yaku naikon tuwongikene komeeng kobalaa koidan doi tomundo Mesir tukon narayat. Lapamo doiya, yana naikon sodiiyomo komuyu ampakon. Tukon komuyu sasaibino naikon siniikamo luwedoi naimbaa.

²Sabab doiya basilingano tukon Israel miano; sumboliiyomo yanila namangkabi perhiasan mosoni tukon perak luwedoi yanila napoloolanikonan.”

³TEMENENO kubaiyo ko Mesir miano monondok konoano doi Israel miano. Tukon Musa teali mian moinodotii tuuno doi sambu-sambu tukon sasaibino korayat Mesir.

⁴Musa bantile doi tomundo, “Bunonaiya ko TEMENENO nabantilano, ‘Uga-ugaate tempo pintanga kopopook Yaku naikon dadange katano Mesir.

⁵Sasamba kopau mala-malaneno molanggongo doi Mesir naikon mate, tambuun doi tomundo Mesir napau polong doi ata boine napau bagiling gandum. Koiyayon piniala napau mososuung tumbe sasaibino naikon mate koidan.

⁶Doi posaapon ko Mesir naikon tololongol kokiilan alalo mobukuan, pokakana komo akiyoon nabiasa teali tukon akimo naikon nateali koidan.

⁷Bai doi Israel miano, mau bangkapi maukai iyayon piniala aki naikon naginanggu. Maka komuyu naikon toiyo baikon Yaku, TEMENENO, kabaiyo kona posasalaan antara Mesir miano tukon Israel miano.’ ”

⁸Konapupusan Musa bantile, “Sasaibino daku Tuan nasambu-sambu naikon lubat tukon tootuku doi salaanggu tukon kabiyo sulano yaku tukon daku mian otinggalemo nalipunia. Lapamo doiya yaku naikon ampakono.” Maka tukon nggimal tuuno Musa tinggalemo tomundo.

⁹TEMENENO bantile doi Musa, “Tomundo aki naikon napaduliyo komu bantilan, sulano Kumoola mokubai lobian badaang kolangge minasaindinggon doi posaapon ko Mesir.”

¹⁰Musa tukon Harun kubaiyo sasaibino kolangge minasaindinggono doi tomundo salaano, bai TEMENENO tealikene yana matikas konoano, sampe yana aki naiyase mopataikene ko Israel miano mootinggale konalipu.