Read Banggai TOBUATAN 12 Bible Online

TOBUATAN 12 - Banggai bible

TOBUATAN 12

¹ TEMENENO basilingan doi Musa tukon Harun doi tano Mesir. Konabantilano,

²“Bituwon nia teali bituwon komeengo luwedoi taun mubangaitan tanggal.

³Pelenggenemo naparentah nia doi sasaibino ko Israel miano: Doi tanggal songulo nabituwon nia, sasamba komian malaneno sio namokolot meeng kodomba pauno tuuk kinaan pososinggat konakaluarga.

⁴Kalu anggota kaluargado todudul soisik sulano naakabuse komeeng kodomba napau, maka dokaluargadoo tukon napaololanikonan moola kaane posinggat-singgat dodombadoo paunodoo. Domba paunodoo sio nainabos pokakana koaito komian mokaan.

⁵Komuyu moola molilik domba kai mbembe, bai sio molanggilo, kona umur meeng kotaun, tukon akiyo kona seselonan.

⁶Komuyu sio poabese tukon sasaibino ko Israel miano sio napomokolot domba napau.

⁷Kosoisik kosauno sio nasinoutikon doi looluakon kotataapon sudongo tukon doi bonua tataapono taambikon doi babano tampat yanila na kaanano.

⁸Dopopookoo koidan kosailo sio nalinalas tukon kinaan tukon kauloon momosopot tukon roti moakiyo koragino.

⁹Domba paunodoo sio nalinalas posaapon, tololo tukon oluno, koaino tukon tiano antoko. Kaanemo kosail molapamo linalasoo, inai nadaano komo kinaan mata kai kinolua.

¹⁰Inai motinggale mau nabaino soisik dosailoo polong dowa-dowa; kalu daano kolabino, sio nasinua pokabuson.

¹¹Doi tempo kaanan komuyu sio pobapakean nalengkap tuuk poampakonan, tukon sandaal doi aimuyu tukon tongkat doi limamuyu. Komuyu sio pokaan mosomosobit. Doiyamo kolamekanano ko Paskah tuuk odotiiyano Yaku, TEMENENO.

¹²Doi popokoo Yaku naikon dadange posaapon kotano Mesir, tukon akateyo sasamba kopau mala-malaneno langgongo, mau bangkapi, maukai iyayon. Yaku naikon ukume sasaibino koila doi Mesir, sasaibino Yakumo ko TEMENENO.

¹³Sau modaano doi mubonua tataapono naikon teali paloosan luwedoi bonua-bonua dungolan. Kalu Yaku kitayomo dosaudoo, komuyu Kulupaiyo tukon aki Kusilakayo doi tempo Kuukumano ko Mesir.

¹⁴ Oloyodoo sio poingotiiyo buno oloyo babasal doi TEMENENO. Tuuk nabanggadudulan dooloyodoo sio polamekene sasamba kotaun.”

¹⁵TEMENENO bantile, “Pitu kooloyo konakalumbit aki namoola makaan roti modaano koragino. Doi oloyo komeengo sasaibino koragi sio natinobuaton luwedoi mubonua, sabab kalu domo pitu kooloyodoo konakalumbit memeeng komian makaan roti modaano koragino, yana aki namoola koidan inaanggon anggota doi Kumian.

¹⁶Doi oloyo komeengo, tukon koidan doi oloyo kopituno, komuyu sio popototongi tuuk bakaleda. Doi oloyodoo komuyu aki namoola kubaiyo kolimang oilamo alaasene komo palaluu tuuk sadiakanano kokinaan.

¹⁷Doi oloyodoo sasaibino komu mian Kubabayo tobuat luwedoi Mesir. Tobikon doiya tuuk doi banggadudulan samba kotaun oloyodoo sio poingotiiyo salaku oloyo mobabasal.

¹⁸Doi bituwon komeengo lalomo tambuun tanggal songulo sangkap popook, polong doi tanggal luakolono meeng kopopook, komuyu aki namoola makaan roti modaano koragino. Pitu kooloyo konakalumbit sasaibino koragi sio natinobuatonggon luwedoi mubonua. Israel miano kai mian molulubaton momakaan roti modaano koragino doi lameanoo lalomo, akimo koidan nainaanggon Kumian.”

¹⁹

²⁰

²¹Musa uange sasaibino kokatua-katua Israel tukon bantile doi yanila, “Ampakono tukon alayomo doi mukaluargaa komeeng kodomba pauno tuuk lamekanano ko Paskah.

²²Mangalamo meeng kopagoto kohisop, kemeke doi leang lalomo motinotui domba saunodoo, maka soutikene doi loluakon kotataapon sudongo tukon balako doi mubonua. Polong dodowa inai komeeng komiankai doi komuyunokon motinggale kobonua.

²³ Doi tempo TEMENENO nadadangano nalipunia tuuk moakateyo ko Mesir miano, TEMENENO naikon kitayo kosau doilolua kosudong tukon balak doi mubonua tataapono: maka yana naikon lupaiyo tolong tukon aki napataikene ko Malaekat Matean nausokiyo komu bonua sulano naakateyo komuyu.

²⁴Komuyu tukon mupau-pau sio poloingiyo doparentahdoo tuuk posidu-sidutukon.

²⁵Kalu komuyu lapamo usokiyo kolipu TEMENENO modandikene doi komuyu, komuyu sio pokubaiyo nabakolobokiyan nia.

²⁶Kalu komu pau-pau mansadai, ‘Oila koalatino nabokolobokiyan nia?’

²⁷Komuyu sio potimbiliyo, ‘Naiya sosubakon Paskah tuuk odotiiyano ko TEMENENO, sabab ko Israel miano nabonua doi Mesir linumbaimo, tempo Yana mangakate pau-pau malaneno langgongo doi Mesir, tukon kita binatadikon tubo!’ ” Maka totukumo ko Israel miano tukon sosuba.

²⁸Maka yanila ampakon mokubaiyo oila ko TEMENENO napinarentakon doi Musa tukon Harun.

²⁹ Pintanga dopopookoo TEMENENO akateyo sasaibino kopau-pau malane molanggongodoo doi bangsa Mesir, tambuun doi tomundo napau, polong doi mian motinaan napau modaano doi talunggu lalomo. Sasaibino koiyayon piniala mososuung tumbe inakate.

³⁰Popokoo tomundo, sambu-sambu tukon sasaibino ko Mesir miano tabangun. Doi posaapon kolipu tololongol kokiilan nalalo mobukuan sabab akiyokai komeeng kobonua moakiyo komo mate komeeng kopau malaneno.

³¹Dopopookoo koidan, tomundo uange Musa tukon Harun maka bantile, “Ampakon luwe naimbaa, komuyu sasaibino! Tinggalemo daku lipu! Ampakono sosubaiyo komu Mian Bisa pokakana komo komuyu kabiyo.

³²Babayomo sasaibino kosaapi, domba, tukon komu mbembe, tukon ampakono! Makabikene koidan balakat tuuk doi yaku!”

³³Mesir miano desaake ko Israel miano sulano namosoi-sobit naotinggale dolipudoo. Yanila bantile, “Kami sasaibino naikon mate kalu komuyu aki poampakon!”

³⁴Maka ko Israel miano alayo konapai pang-pang moinontoki adonan roti moakiyo koragino, bungusiyo tukon toik, tukon tanggungemo.

³⁵ Yanila koidan lapamo kabaiyo oila komo Musa nabinantil, doiyamo mangkabi perhiasan mosoni tukon perak tukon pakeyan luwedoi Mesir miano.

³⁶TEMENENO kabaiyo ko Mesir miano namonondok konoano doi Israel miano, sampe yanila beekene sasaibino komo Israel miano nakinabi. Tukon caradoo Israel miano babayo ko Mesir miano nabuat tobuat luwedoi lipudoo.

³⁷Israel miano lengget tukon ampakon aiai luwedoi kota Raamses doi kota Sukot. Yanila koaito 600.000 komian, aki nainait koboine tukon pau-pau.

³⁸Yanila mababa badaang kosapi, domba tukon mbembe. Badaang tuuno koidan komian molulubaton momalaing.

³⁹Yanila mosua roti moakiyo koragino luwedoi adonan yanila mobabayo luwedoi Mesir. Yanila siniika luwe idoo tukon tongosinggaang tuuno, sampe aki natodan masadiakon mandu.

⁴⁰ Israel miano lapamo dungol doi Mesir 430 kotaun konakalumbit.

⁴¹Doi oloyo napupusan taun 430 doo, posaapon kobalisan doi TEMENENO namian tinggalemo kotano Mesir.

⁴²Popokoo TEMENENO banggadudul badagai tuuk antekene yanila tobuat luwedoi Mesir. Tukon doiyamo koidan kopopook motuuk nabanggadudulan sinosubakon doi TEMENENO salaku popook moiningotii. Doi popookoo Israel miano sio nabada-badagai.

⁴³TEMENENO bantile doi Musa tukon Harun, “Naiyamo koaturano kolamekanano ko Paskah. Mian lulubaton aki namoola makaan domba mo sinosubakon doi oloyo Paskah.

⁴⁴Bai ata komuyu mooliyo moola malaing namakaan, kalu yana lapamo sinunat.

⁴⁵Mian molulubaton kai mian mobasasai aki namoola malaing momakaan.

⁴⁶ Sasaibino dodombadoo sailo sio nakinaan doi bonua lalomo, tukon aki namoola binaba doi tonggulung. Inai molotoyo mau nabaino meengkai ko bukuno.

⁴⁷Sasaibino ko Israel miano sio nalamekene dolameanoo.

⁴⁸Mian moaki nasinunat aki namoola makaan kinaan doi lameanoo. Kalu meeng komian lulubaton molapamo tataap doi komuyu yase lamekene ko Paskah tuuk odotiiyo Yaku, TEMENENO, sasaibino komian malaneno doi nakaluargaa lalomo sio nasinunat loolukon. Lapa doiya yanila inaanggono pokakana ko Israel miano asli, tukon moola malaing doi lamekanano ko Paskah lalomo.

⁴⁹Paraturan mopokakana tapake tuuk doi Israel miano asli tukon mian lulubaton motataapo doi komuyu nokon.”

⁵⁰Sasaibino ko Israel miano taat tukon kubaiyo sasaibino ko TEMENENO na pinarentakon doi Musa tukon Harun.

⁵¹Doi oloyodoo TEMENENO babayo sasaibino ko Israel miano tobuat luwedoi Mesir.