Read Banggai TOBUATAN 14 Bible Online

TOBUATAN 14 - Banggai bible

TOBUATAN 14

¹Doibundu TEMENENO bantile doi Musa,

²“Sumboliiyomo ko Israel miano naabali tukon basandung doi kota Pi-Hahirot salaano, napotangaiyan kokota Migdol tukon Tobun Gelagah, loolani kota Baal-Zefon.

³Tomundo Mesir naikon sasaakiyo baikon ko Israel miano daano molausala doi nalipu nia tukon tapamo doi padang lalomo.

⁴Yaku naikon tealikene yana katikase konoano sampe yana lelenggene komuyu. Bai Yaku naikon otudoikene Daku kakuasaan doi tomundo Mesir tukon nasuludadu, tukon yanila naikon toiyo baikon Yakumo ko TEMENENO.” Maka ko Israel miano kubaiyo buno komo TEMENENO napinarentakon doi yanila.

⁵Salataa tomundo Mesir lengele baikon ko Israel miano buleno, yana tukon nasambu-sambu upah tukon bantile, “Oila konda kinabai? Bulaando kita mobatadikene ko Israel mianodoo ampakon sampe lapus konda ata-ata?”

⁶Maka tomundo sadiayo kokereta polobosiyan tukon nasuludadu.

⁷Yana lengget tukon sasaibino kona kereta, tousokon nom kosakato kereta monondok, suludadu kapalano nalakitan.

⁸Takainomo TEMENENO tealikene tomundo kakatikase konoano, sampe yana lelenggene ko Israel miano modaano doi ampakon lalomo otinggale lipudoo tukon TEMENENO napololaing.

⁹Suludadu Mesir tukon sasaibino koadalan, kereta tukon polokitino lelenggene ko Israel miano, tukon tunduwo yanila doi napobasandungan doi tobun bibilo lolani ko Pi-Hahirot.

¹⁰Salataa ko Israel miano kitayo tomundo Mesir tukon nasuludadu molubat, yanila matakut tuuno tukon nggeleamon doi TEMENENO mangkabi tulungan.

¹¹Yanila bantile doi Musa, “Oilakai doi Mesir akiyo kobakibulan, sampe ikoo babayo kami sulano mai mate nai tampat nia? Kitayomo kobalino komu kokubaidoo!

¹²Lolukon doi Mesir lapamo kami bantile baikon nalangge nia naikon teali! Kami lapamo desaake sulano ikoo inai monggabute kami, bai batadikenemo kami tataap teali ata doi Mesir. Lobian monondok teali ata indaa kalu baino momate doi padang lalomo nia!”

¹³Musa timbiliyo, “Inai matakut! Bataanggono! Komuyu naikon kitayo oila ko TEMENENO nakinubai tuuk mosalamatene komuyu. Mesir miano komuyu mokitayo budodoiya, akimo naikon pokitayo koidan.

¹⁴TEMENENO naikon kakaate tuuk komuyu, tukon komuyu aki napalaluu mokubai oioila.”

¹⁵TEMENENO bantile doi Musa, “Bulaando ikoo monggeleamon mangkabi tulung? Sumboliiyomo ko Israel miano naampakon banggadudul!

¹⁶Tidekene komu tongkat tukon pasekene doi tobun bunggono. Maka kopaisu naikon tabata tukon ko Israel miano moola pintosiiyo kotobun tukon ampakon doi namootian.

¹⁷Ko Mesir miano naikon kutealikene matikas konoano sampe yanila banggadudul lelenggene ko Israel miano, tukon Yaku naikon otudoikene Daku kakuasaan doi tomundo Mesir, konapasukan, kereta-kereta tukon polokitino.

¹⁸Maka ko Mesir miano naikon toiyo baikon Yakumo ko TEMENENO.”

¹⁹Maka ko Mian Bisa namalaekat, modaano doi pasukan Israel salaano, biyol taalikon doi tonggulung. Tukon biyolo koidan dobunomo sudongo polong doi nadaanoan

²⁰kona potangaiyan kopasukan Mesir tukon pasukan Israel. Dobunomo osumbetene kokalipookan, sampe pomodowakon loluakon dopasukanoo aki namoola pokolanikon.

²¹Maka Musa tidekene kolimano doi tobun bunggono, tukon TEMENENO kubaiyo puul kombombuul tolopot tukon namakansangan sampe kotobun paisuno tasaakon. Pobanggamodoakon dombombuuloo napuulan, tukon boliiyo kotobun teali tano motuul.

²² Paisu tongobos lua, tukon doi tempo ko Israel miano napintosiiyano kotobun, yanila ampakon doi namotuulan, tukon kopaisu doi bakalinga bobo buno pagar mominesel.

²³Mesir miano tukon sasaibino koadalan, kereta tukon polokitino lelenggene banggadudul tukon tunduwo ko Israel miano doi tobun tangano.

²⁴Adukono sumbot kooloyo panano TEMENENO mbalenge luwedoi aung sudongo tukon bunom doi suludadu Mesir tukon ponggabutenemo.

²⁵Yana kubaiyo yanila nakereta roda-rodano manas, sampe tukon susah tuuno yanila maju. Mesir miano bantile, “TEMENENO kakaate tuuk Israel miano molawane kita. Mai nda bulen luwe naimbaa!”

²⁶TEMENENO bantile doi Musa, “Tidekenemo kolimamu doi tobun bunggono, maka kopaisu naikon abali, tukon otombule ko Mesir miano nakereta-kereta tukon polokiti-polokitino.”

²⁷Maka Musa tidekene kolimano doi tobun bunggono tukon doi tempo nasumbotan kooloyo panano, paisu abali doi ndondoongo motumbe. Mesir miano kakaate mosalamatene kobutongo, bai TEMENENO otombule doi tobun lalomo.

²⁸Kotobun paisuno bangabalinggon tukon tombukiyo kokereta-kereta, polokiti-polokitino, tukon sasaibino kosuludadu Mesir molelenggene ko Israel miano doi tobun tangano, sampe yanila mate sasaibino.

²⁹Bai salataa ko Israel miano pintosiiyo kotobun, yanila ampakon doi lipu namotuulan, tukon kopaisu buno pokakana kopagal mesel doi bakalinga bobo.

³⁰Doi oloyodoo TEMENENO salamatene ko Israel miano luwedoi Mesir miano nabalobosian, tukon yanila kitayo ko Mesir miano bajan-bajano motapapal doi tobun bibilo.

³¹Salataa Israel miano kitayo bulaando ko TEMENENO motukon Nakuasa mobabasal molungguiyo ko Mesir miano, yanila masainding tuuno sampe anggayo doi Yana tukon doi Musa, Naatadoo.