Read Banggai TOBUATAN 15 Bible Online

TOBUATAN 15 - Banggai bible

TOBUATAN 15

¹ Maka Musa tukon Israel miano mananikene nanyanyian nia motuuk nggaalano ko TEMENENO, “Yaku yase manani doi TEMENENO, sabab Yana manaango tukon gemilang. Sasaibino koadalan tukon polokitino linambitono doi tobun lalomo.

² TEMENENO daku pembela mo bukuan; Yanamo komo salamatene yaku. Yana ku Mian Bisa, yaku yase monggaale Yana, Mian Bisa tumbunggu nasosubaan, kukabasale Yana.

³TEMENENO daanokai pojuang mo barani, TEMENENO, doiyamo kosambuno.

⁴Suludadu Mesir tukon sasaibino konakereta sinakukono doi tobun lalomo. Suludadu-suludadu mo tambongan tuuno tombul doi Tobun Gelagah.

⁵Tobun mo atean lemese yanila, tukon buno batu bulus doi nadasar.

⁶Komubukuanan minasaindinggon tuuno, oh TEMENENO, Ikoo kubaiyo komusuh kabus sasabul.

⁷Tukon Mubabasalan mo babasal Ikoo akateyo sasaibino komo akateyo Ikoo. Komu nggimalan kolot buno aung, tukon suwayo yanila buno laing.

⁸Tobun Ikoo puule, kopaisu tolulun tatandak, kokondong moloyos buno pagar betoon sampe kotobun nadasar moola linoloi.

⁹Musuh bantile, ‘Yanila naikon kulelenggene tukon kulakoyo, kububute dakusabel, tukon kuakateyo yanila. Maka kulambase sasaibino konapai buat, kuebes-ebese tukon kulasaiyo polong mbambul.’

¹⁰Bai TEMENENO tukon idan naansaang olubatene doi Mesir kooloyo mo soe. Yanila tombul buno timah momotoong doi paisu soloko molokis.

¹¹Ilah inaando komo moola pokakana Ikoo, oh TEMENENO Mo Mahamulia tukon moliyous? Indee komoola mokubai langge-langge minasaindinggon tukon kokubai mobabasal buno TEMENENO?

¹²Ikoo tidekene kolima-Mu bakalingano, maka lapuso komusuh dunia molemese.

¹³Ikoo andane kobangsa mo lapamo Ikoo salamatene nia, tobikon Ikoo setia doi mujanji. Tukon bukuanan mobabasal Ikoo lolainge yanila, tukon Ikoo andane doi mutano mo moliyous.

¹⁴Bangsa-bangsa ndongoliiyomo tukon bubusak; Filistin miano tukon pemimpin Edom matakut. Moab miano mobarani bubusak, Kanaan miano poipoisik konoano.

¹⁶Yanila matakut tuuno mosakisiiyo ko TEMENENO nabukuanan. Doi tempo kumian naalonan, musuh aki nakuasaiyo motaane; luputo kobangsa molapamo Ikoo sodiiyo.

¹⁷Maka ko Israel Ikoo antekene doi lipu Ikoo mopiliyomo tuuk mudungolan. Yanila tataapo doi mubunggul bunggono mo moliyous, doi Bonua Ikoo mo kekendenge susuumu.

¹⁸Ikoomo ko TEMENENO, Tomundo, momaparenta posidu-sidutukon.”

¹⁹Doi tempo Israel miano pintosiiyo kotobun, yanila ampakon doi nadasar momotuul. Bai salataa kokereta-kereta Mesir adalan tukon polokitino usok doi tobun lalomo, TEMENENO kabaiyo kopaisuno lomba koidan sampe yanila tombul.

²⁰Maka Miryam, meeng konabiah, Harun utuso langgongo, alayo kona gong pauno, tukon sasaibino koboine malaing momotundung dogoongoo pauno tukon osuleng.

²¹Miryam manyanyikene yanila, “Pomanyanyimo doi TEMENENO, sabab yana manaango tukon gemilang. Sasaibino koadalan tukon polokitino sinakukon doi tobun lalomo.”

²²Doibundu Musa babayo ko Israel miano luwedoi Tobun Gelagah pakituuwo ko Syur padang lalomo. Tolu kooloyo konakalumbit, yanila ampakon loloiyo ko padang lalomo aki napososuunggene kopaisu.

²³Maka yanilakai polongo doi tampat mo sinombuikon Mara, bai kopaisu idoo mosopot tuuno, sampe aki namoola ininum. Sabab doiya dotampatoo sinombuikon Mara, koalatino mosopot.

²⁴Maka domianooila nggimoliiyomo doi Musa tukon mansadai, “Oila naikon konda ininum?”

²⁵Musa sambeang tukon tutuu doi TEMENENO, maka TEMENENO tudoikene doi yana komeeng kokayung patolo. Kayungdoo Musa sakukene doi paisudoo lalomo, maka dopaisudoo teali mantabal, sampe yanila moola inume. Doi tampatoo TEMENENO beena aturan-aturan doi yanila, tukon idoo koidan yana sobaiyo yanila.

²⁶TEMENENO bantile, “Potaatiyomo Yaku tukon tutuu, tukon pokubaiyomo oila komo monondok doi Kupambaleng; loingiyomo sasaibino Dakuparentah. Kalu komuyu kabaiyo bunodoiya, komuyu aki naikon Kuhukume tukon sesel-sesel Yaku mo lubotiikene doi Mesir miano. Yakumo ko TEMENENO mo tangalinggene komuyu.”

²⁷Sambuno lapa doiya yanila polong doi lipu mo sinombuikon Elim. Idoo daano kosongulolua kopaisu matano tukon pitu kolono kokurma batango. Yanila basandung doi nalolanian dopaisudoo.