Read Banggai TOBUATAN 16 Bible Online

TOBUATAN 16 - Banggai bible

TOBUATAN 16

¹Maka sasaibino ko Israel miano lengget luwedoi Elim, tukon doi tanggal songulo lima bituwon koluano sambuno lapa yanila tinggale ko Mesir, polongokai yanila doi napokalalatanan koElim tukon Bunggul Sinai.

²Doi padang lalomo yanila sasaibino nggimoliiyo doi Musa tukon Harun.

³Yanila bantile, “Lobian monondok kalu andeno ko TEMENENO akateyomo kami doi Mesir. Kalu indaa kami moola osulang makaan sail tukon roti polong bobosul. Bai komuyu babayo kami naimbaa sulano kami sasaibino mate malaal.”

⁴ TEMENENO bantile doi Musa, “Budodoiya naikon Kuobulusene kokinaan molobi-lobian buno udan tuuk doi komuyu sasaibino. Sasamba kooloyo komuyu sio pomokombul dokinaanoo nasabe tuuk meeng kooloyo. Tukon kokubaidoo Yaku yase ujiyo Daku umat sulano kutoiyo oilakai yanila taat doi kuparentah-parentah kai aki.

⁵Doi oloyo konoomo yanila sio napototongikene dokinaanoo lua luunggon paku konakadaang.”

⁶Maka bantilo Musa tukon Harun doi sasaibino ko Israel miano, “Kinobian nia komuyu naikon toiyo baikon TEMENENO mokai komo babayo komuyu tobuat luwedoi Mesir.

⁷Namodowa dowa-dowa komuyu naikon kitayo ko TEMENENO nalubatan laango. TEMENENO lengele komuyu monggimol-nggimoliiyo Yana; yo, doi TEMENENO, sabab kami nia tongo kubaiyo oila kona pinarentakon.

⁸TEMENENO naikon beena komuyu sail doi tempo kinobian, tukon roti doi tempo dowa-dowa polong komuyu bobosul, sabab TEMENENO lengelemo koponggimal-nggimalan doi Yana. Konabisaan, kalu komuyu nggimal-nggimal doi kami, komuyu nggimal-nggimal doi TEMENENO.”

⁹Doibundu Musa bantile doi Harun, “Sumboliiyomo yanila sasaibino nalubat mangadap doi TEMENENO, sabab Yana lengelemo yanila nanggimalan.”

¹⁰Daano Harun mobasilingan doi yanila sasaibino, yanila mbaleng doi padang lalomo tukon sosinggot ko TEMENENO laango tokita doi bunom lalomo.

¹¹TEMENENO bantile doi Musa,

¹²“Yaku lengelemo ko Israel miano nanggimalan. Bantilemo doi yanila baikon doi tempo kinobian yanila moola makaan sail, tukon doi tempo dowa-dowa yanila moola makaan roti polong bobosul. Maka yanila naikon toiyo baikon Yakumo ko TEMENENO, yanila na Mian Bisa.”

¹³Doi tempo kinobian lubato kotomisi peupeku mobadaang tuuno sampe sunggupiyo sasaibino kobasandungan, tukon doi tempo dowa-dowa obuluso kolinggous doi potikunggon kobasandungan.

¹⁴Salataa dolinggousoo bukal, tokitamo doi padang lalomo bunggono meeng kolangge momanipi buno sisik tukon alus buno linggous mokundot.

¹⁵ Salataa ko Israel miano kitayomo, yanila aki natoiyo oila doiya. Maka yanila posadaimo meeng maka bailon, “Oila doiya?” Maka Musa bantile doiyanila, “Doiyamo kokinaan TEMENENO mo beekene doi komuyu.

¹⁶TEMENENO maparentahkene sulano suwe-suwele namokombul doi nabadaangan komo napinalaluukon, doiyamo lua koliter tuuk sasamba koanggota kaluargaa.”

¹⁷Ko Israel miano kubaiyo bunodoiya; bai daano komo mokombul lobian doi lua koliter tuuk meeng komian tukon daano komo kurang.

¹⁸ Salataa yanila takalemo, tokita baikon komian momokombul badaang, aki nalobian, tukon komo mokombul soisik aki nakakurangan. Suwe-suwele mokombul doi nabadaangan komo napinalaluukon.

¹⁹Musa bantile doi yanila, “Indeemo komiano aki namoola mangabos dokinaanoo mau nasoisik tuuk modowa.”

²⁰Bai moimoiya komian doi antara yanila aki napaduliyo Musa nabantilan. Yanila mangabos koidan kosoobos doi kinaanoo. Modoakon tokita dokinaanoo besukon tukon koboono boowan; maka Musa nggimoliiyo yanila.

²¹Samba kododowa yanila pokombulikene dokinaanoo doi nabadaangan yanila mopalaluuwo, tukon kalu kooloyo tambuuno moonas, kinaan mototinggal doi tanodoo eemo.

²²Doi oloyo konoomo yanila mokombul dokinaanoo lua luunggon paku kona kadaang, doiyamo sangkap koliter tuuk meeng komian. Sasaibino yanila napai katua lubat tukon popitoikene langgedoo doi Musa.

²³ Musa bantile doi yanila, “Naiyamo ko TEMENENO naparentah: Modowa daanokai oloyo motangalaas tuuk tadean, oloyo Sabat, oloyo mosinosubakon doi TEMENENO. Oila komo komuyu yase lalase oloyo nia, taaniyomo, tukon oila komo komuyu yase tibuluwo, potibuluwomo. Komo lobian luwedoi pokapalaluuwan oloyo nia, alaasemokai tukon abesemo tuuk namodowa.”

²⁴Jadi kinaan molabian yanila abese tuuk namodoakon pokakana komo Musa parentakene; kinaanoo aki nateali babali tukon aki nabesukon.

²⁵Musa bantile, “Naiyamo komukinaan tuuk oloyo nia, sabab oloyo nia daanokai oloyo Tadean, oloyo tadean motuuk odotiiyano ko TEMENENO, tukon komuyu aki naikon popososuunggene dokinaanoo maukai nasoisik doi basandungan tonggulungo.

²⁶Nom kooloyo konakalumbit komuyu sio pomokombul kinaan, bai oloyo mokopituno daanokai oloyo Tadean, tukon akiyo kokinaan moobulus doi oloyodoo.”

²⁷Doi oloyo mokopituno moimoiya ko Israel miano yase mokombul kinaan, bai yanila aki namoposuunggon oioila.

²⁸Maka TEMENENO bantile doi Musa, “Polong oila kotempono komuyu aki poiyase taatiyo Daku parenta-parenta?

²⁹Neneekekai baikon Yaku beena doi ikoo meeng kooloyo tuuk tadean. Doiyamo kosabapo doi oloyo mokonoomo Yaku mebee kinaan mosukup tuuk lua kooloyo. Doi oloyo mokopituno memeeng komian sio dungol doi bonua, tukon aki namoola tobuat.”

³⁰Sabab doiya doi oloyo kopituno yanila aki nabalimang.

³¹ Dokinaanoo Israel miano sombuikene manna. Kondondoongo buno kolibuang batuno poipoisik kobotiko moute tukon kotamiso buno kukis mokinabai sinambul dokot.

³²Musa bantile, “TEMENENO sumboliiyo kita mangala kurang lobian lua koliter komanna tuuk inabos doi ndakaturunan, sulano yanila moola kitayo kokinaan TEMENENO mobeekene doi kita doi padang lalomo, doi tempodoo kita ndabinabaan tobuat luwedoi Mesir.”

³³ Musa bantile doi Harun, “Mangalamo meeng kobelanga, usokiyomo kurang lobian lua koliter komanna doi lalomo tukon abesemo doi TEMENENO salaano tuuk inabos doi nda katulunan.”

³⁴Maka Harun abese dobalangadoo doi Peti Perjanjian salaano tuuk inabos pokokonoi tukon TEMENENO naparentah doi Musa.

³⁵ Domannadoo teali Israel miano nakinaan sangkap kolono kotaun konakalumbit koikoidan, polong yanila lubat doi Kanaan, tampat yanila natataapan. (

³⁶Takalan langge motikas mobiasa mian pakeyo doi lounudoo, koantoko lua kolono koliter.)