Read Banggai TOBUATAN 19 Bible Online

TOBUATAN 19 - Banggai bible

TOBUATAN 19

¹Lapamo doiya Israel miano otinggalemo ko Rafidim, tukon doi tanggal meeng bituwon kotoluno salataa yanila natinggalano ko Mesir, yanila polongo doi Sinai padang lalomo. Yanila basandung doi Bunggul Sinai uuno,

³tukon Musa toliboiyo dobunggulo sulano napososuung tukon Mian Bisa. TEMENENO basilingan doi Musa doi bunggulo tukon sumboliiyo yana moumumkanggene doi Israel miano, Yakub nakatulunan,

⁴“Komuyu kitayomo oila Daku kinabai motuuk doi Mesir miano, tukon bulaando Daku babaano komuyu doi Yaku doi lipunia tukon kuasa mobabasal, buno tomisi rajawali mobabayo konapau doi kapilo bunggono.

⁵ Budodoiya kalu komuyu taat doi Yaku tukon setia doi Kuperjanjian, komuyu naikon Kutealikene Kuumat susuunggu. Posaapon kodunia daanokai koonggu, bai komuyu naikon teali langge Kusineang,

⁶ sangalaasan tuuk butonggu susuunggu, tukon komuyu naikon leleaniyo Yaku salaku imam-imam.”

⁷Maka buluso Musa tukon sasaibino kokatua-katua sulano napototongi, maka nasalitaikene doi yanila sasaibino kolangge TEMENENO moparentahkene doi yana.

⁸Yanila saibino timbiliyo tukon pososinggat, “Kami yase kabaiyo sasaibino ko TEMENENO nabinantil,” tukon potimbilidoo Musa pelenggene doi TEMENENO. Maka TEMENENO bantile doi Musa, “Yaku naikon lubat doi ikoo totombuki bunom mobondolong lalomo; komian naikon lengele Yaku basilingan doi ikoo, tukon tambuun doi tempodoo yanila naikon sidutu anggayo doi ikoo.

¹⁰Budodoiya pososuunggenemo domian-mianoo, tukon sumboliiyomo yanila oloyo nia tukon modowa nasadiayo kobutongo tuuk doi bakaledaan. Yanila sio nabusoiyo konapai pakean.

¹¹Niiwan yanila sio nalapamo batotobo. Doi oloyodoo Yaku naikon bulus doi Bunggul Sinai bungguno, doi tampat sasaibino komian moola kitayo Yaku.

¹² Kubaiyomo kopaloosan doi potikunggon nabunggo nia salaku natolongan moaki namoola bangsadoo lupaiyo. Pantanemo dobangsadoo motolibo doi bunggul, tukon naloolaniyo. Doi indee komo lupaiyo kona tolongan, naikon inukum mate;

¹³mianoo sio nasinakul batu kai pinanah, tukon aki namoola sininggil. Naiya tapake mau motuuk doi bangkapi maukai motuuk doi iyayon; sasaibino komo lupaiyo dona tolonganoo sio nainukum mate. Doi tempo natololongolan koalal mobulusan luwedoi torompet, mian-mianoo sio natoliboiyo kobunggul.”

¹⁴Doibundu Musa bulus luwedoi bunggul tukon sumboliiyo domianoo bato-batotobo tuuk mobakaleda. Konabantilano, “Niiwan komuyu sio pobatotobo, tukon budodoiya nia komuyu aki namoola pokooloi.” Maka bangsadoo tambuuno bato-batotobo tukon busoiyo konapai pakean.

¹⁶ Doi oloyo kotoluno, doi tempo dowa-dowa, daano koduluk tukon selese. Bunom mobondolong sumbot doi bunggul bunggono tukon tololongolo kotorompet alalo mo bulungan tuuno. Sasaibino komian doi basandungan lolondong matakut.

¹⁷Musa babayo yanila tobuat sulano napososuung tukon Mian Bisa, maka yanila kokondong doi bunggul uunodoo.

¹⁸Posaapon kobunggul Sinai tinombuki tibolung, sabab TEMENENO bulus doi bunggono doi bilat lalomo. Tibolungoo kobung buno tibolung moluwe doi tampat basuakonan, tukon posaapon kobunggul unggot tuuno.

¹⁹Torompet alalo teali pololokon bulungan. Musa basilingan, tukon Mian Bisa timbiliyo tukon duluk.

²⁰TEMENENO bulus doi Bunggul Sinai bunggono, tukon uange Musa sulano nalubat doi bunggul bunggonodoo. Maka Musa tolibo,

²¹tukon TEMENENO bantile doi yana, “Buluso tukon ingotiikene mian badaangoo, baikon yanila aki namoola lupaiyo kona tolongan tuuk molubat kitayo Yaku. Kalu yanila lupaiyo koidan, badaang doi antara yanila naikon komo mate.

²²Mau imam-imam moiyase koolaniyo Yaku, sio nakoliyousiyo kobutongo; kalu aki, yanila naikon Kuukume.”

²³Musa bantile doi TEMENENO, “Mian-mianoo aki namoola liba, sabab Ikoo parentakene kami sulano moaanggene nabunggul nia salaku tampat mo moliyous tukon mopalaatikanggene kotolongan doi napotikunggonan.”

²⁴TEMENENO timbiliyo, “Buluso, maka abalimo naimbaa polaing Harun. Bai imam-imam tukon rayat aki namoola lupaiyo kotolongan tuuk lubat doiya-Ku. Kalu yanila lupaiyomo, yanila naikon kuukume.”

²⁵Maka buluso Musa pososuunggene dobangsadoo tukon pelenggenemo ko TEMENENO nateteba doi yanila.