Read Banggai TOBUATAN 2 Bible Online

TOBUATAN 2 - Banggai bible

TOBUATAN 2

¹Doi loonudoo meeng komala-malane moluwe doi Lewi nabenseno, osowaan tukon meeng koboine moluwe doi bensenodoo koidan.

² Maka doboinedoo suunge komeeng kopau malaneno. Salataa yana kitayo baikon dopaulumboonoo monondok tuuno, yana seekenemo tolu kobituwon konakalumbit.

³Bai dopaulumboonoo akimo namoola nasinookon malu-malumbit. Maka kotinano mangala meeng kopeean moluwe doi Bulung Gelagah, maka nalapise tukon ter sulano naaki nainusoki paisu. Paulumboonoo inaboso doi peeanoo lalomo, maka nababayo doi Nil Paisunobatango tukon inabos doi gelagah uuno napototongian tanga-tangano doi paisuno batangodoo bibilo.

⁴Dopaulumboonoo utuso langgongo kokondong dodoonggon luwe idoo sulano nakitayo oila komo teali naikon tukon utuso pioto.

⁵Salataa buno doiya lubatokai kotomundo naboine. Yana obulus doi paisubatango sulano namansau, sadangkan kona peleleani ambaambakon doi paisuno batango bibilo. Sosinggoton tomundo naboine kitayo dopeeanoo doi gelagahdoo uuno napototongian tanga-tangano, maka yana sumboliiyo komeeng koata boine moalayo.

⁶Salataa tomundo naboine mobukayo dopeeanoo, nakitayo daano kopaulumboon doilalomo, tukon dopaulumboonoo daano mokokiil. Tomundo naboine lasayo seange doi yana tukon bantile, “Naiya Ibrani miano napau.”

⁷Maka dopaulumboonoo utuso langgongo mansadai doi tomundo naboine, “Kai Tuan na Boine yase kumoumboliikene meeng ko Ibrani miano bolokino sulano nasusuwo dopaulumboonoo?”

⁸“Monondoko,” tomundo naboine timbiliyo. Maka ampakonokai dopauboinedoo mouange kotinano susuungo.

⁹Tomundo naboine bantile doi bolokidoo, “Babayomo napaulumbonoonia, tukon susuwomo yana tuuk doi yaku; maka kutambokon.” Maka yana babayomo dopaulumboonoo tukon susuwomo.

¹⁰ Salataa dopaulumboonoo adukono babasal, kotinano salakanggenemo yana doi tomundo naboine. Maka tomundo naboine tealikene dopaulumboonoo buno napau sinuung. “Yana kusombuikene Musa, sabab kualayo yana luwedoi paisu,” tomundo naboine bantile.

¹¹ Sambuno Musa paumalanekono, yana ampakon pososuung komian mopokakana kona bangsa. Yana kitayo bulaando yanila napinakisaawan molimange kolimang momoto-motoong. Yana kitayo koidan meeng ko Mesir miano moakateyo komeeng ko Ibrani miano.

¹²Musa mbaleng doinapotikunggonan, tukon salataa yana kitayo baikon akiyo komo palatikanggene yana, yana akateyomo do Mesir mianodoo maka naseekene kobajano doi bone lalomo.

¹³Modoakon kooloyono Musa ampakon koidan, maka nakitayo lua ko Ibrani miano modaano poakate. “Bulaando ikoo monanale kotulamu?” Musa sadaiyo doi mian mosaladoo.

¹⁴Mianoo timbiliyo, “Indee komo oduduke ikoo moteali mbai katua tukon mbai Hakim? Oilakai ikoo yase akateyo yaku koidan, pokakana ko Mesir mianodoo ikoo moakateyo?” Maka Musa teali matakut tukon bapikil, “Silaka! Daku kokubaidoo totoimo.”

¹⁵ Salataa tomundo ndongoliiyo tentang kajadianoo, yana moumbolii loloon sulano naakateyo Musa. Bai Musa bulen maka dungol doi tano Midian. Imam doi Midian, kosambuno Yitro, daano kopitu kona pauboine. Daano kooloyo meeng, salataa Musa daano moosulang doinaloolanian komeeng kobubung, lubatokai kopitu Yitro napau boine tuuk momatambuk paisu tukon ontokiyo kotamanoila nambembe tukon nadomba badaang namonginuman paisu.

¹⁷Bai moimoiya kopototooli iyayon siikayo dopau-pau boinedoo. Maka Musa lubat tulungiyo yanila tukon beenamo momonginum yanila naiyayon.

¹⁸Salataa yanila mule, tamanoila mansadai, “Bulaando komuyu mosobit tuuno mulena oloyo nia?”

¹⁹Yanila timbiliyo, “Daano komeeng ko Mesir miano motulungiyo kami luwedoi pototooli-pototooli iyayon bailon nagangguan. Yana koidan matambukene paisu doikami, tukon beena monginum konda iyayon.”

²⁰“Inaando yana diabudodoo?” Yitro sadaiyo doi napau-pau. “Bulaando komuyu motinggale domianoo? Poampakonokai poundange yana ndakaan pososinggat.”

²¹Musa yase sulano nadungol idoo. Doibundu Yitro pokilakene konapau meeng kosambuno Zipora tukon Musa.

²²Sipora mosuung meeng kopau mala-malaneno. Dopaudoo sinombuikon Gersom, sabab Musa bapikil, “Yaku meeng komian molulubaton naimbaa.”

²³Doitaun-taun doibundu tomundo Mesir matemo. Bai ko Israel miano daano mobebe sabab yanila inatai, sampe yanila nggeleamon mangkabi tulung. Yanila nanggeleamonan polong doi Mian Bisa.

²⁴ Mian Bisa lengele yanila, tukon Yana neneeke Konaperjanjian tukon Abraham, Ishak tukon Yakub.

²⁵Yana kitayo ko Israel miano moinatai, maka Yana putusiyomo sulano natulungiyomo yanila.