Read Banggai TOBUATAN 21 Bible Online

TOBUATAN 21 - Banggai bible

TOBUATAN 21

¹Maka TEMENENO bantile doi Musa, “Beenamo doi Israel miano naparaturan-paraturan nia:

² Kalu komuyu mongoli meeng koata doi mubangsa susuumu, yana sio nabalimang tuuk doi ikoo nom kotaun konakalumbit. Doi taun kopituno lalomo yana sio sinodiimo tukon aki napalaluu mebeal oi-oila.

³Kalukai yana daano paumalanekon doi tempo natealian muata, maka kona boloki aki namoola malaing doi tempo natobuatan. Bai kalukai yana osowaano doi tempo natealian muata, kona boloki moola namalaing pososinggat yana.

⁴Kalu konatuan osowaanggene yana tukon meeng kopauboine, maka yana malaat pau, maka kona boloki tukon donapaudoo daanokai natuan koona, tukon aki namoola malaing tukon doatadoo doi tempo nainosodiiyan.

⁵Bai kalukai doatadoo okitakene baikon yana seange kona boloki, napau-pau tukon natuan, tukon aki naiyase mosinodiimo,

⁶maka konatuan sio nababayo yana doi tampat kaleda. Indaa doatadoo sinumbolii kokondong sosinggalang doi tataapon kai tataapon sudongo tampat kaledaan, tukon konatuan sio napaloosanio doatadoo tolingaino. Maka yana naikon teali naata tuuk pomatekon.

⁷Kalu meeng koboine Ibrani binalukon buno ata luwedoi tamano, doboinedoo aki nasinodii salataa lapa nom kotaun, jadi posasala tukon ata mala-malane.

⁸Kalu yana aki nasanaanggene konatuan mo batetel moalayo, maka yana sio nabinalukon koidan doi tamano-tinano. Boinedoo aki namoola binalukon doi mian lulubaton, sabab yana lapamo kinubai tukon aki naadil doi natuan moaki natapaatiyo konadandi.

⁹Kalu baikon memeeng komian mongoli ata boine sulano natealikene napau naboloki, doata boinedoo sio nabunekene buno napau susuungo.

¹⁰Kalu dopau malanenodoo osowaan koidan, yana tataap moongkosiyo tuuk mebee kinaan tukon pakean tukon sasaibino kohak buno biasa doi naboloki mo tumbeno.

¹¹Kalu yana aki nadaanokene doongkosoo, yana sio sodiiyo donabolokidoo tukon aki namantalima doy potobuus.”

¹² “Indee komo umbase komian bailon polong mate, sio nainukum mate.

¹³ Bai kalu yana umbase tukon aki nasangaja tukon aki nabatetel moakateyo, yana moola dambasene kobutongo doi meeng kotampat komo naikon Kutudoikene doi ikoo, tukon indaa yana malaat soopan.

¹⁴Bai kalu memeeng komian liba kosau sangaja moakateyo komian bailon, doi bundu bulen doi Kubalabaan sulano namalaat soopan, domianoo sio nainala luwedoi balabaan tukon inukum mate.

¹⁵Indee komo umbase kotamano kai tinano sio nainukum mate.

¹⁶ Indee komo mondikuk komeeng komian, sio nainukum mate, kai domianoo binalukono kai daanoon doi nabonua.

¹⁷ Indee komo batotopikene kotamano kai tinano, sio nainukum mate.

¹⁸Kalu doi meeng kopoakatean lalomo memeeng komian umbase komian bailon tukon batu kai tukon napopukul, bai aki naakateyo, yana aki naikon nainukum. Kalu mian mo inumbasoo sio napolong tonggoling sabab dopongumbasoo,

¹⁹bai doibundu moola bangun tukon ampakon koidan tukon tongkat, mian moumbase sio napakuliyo potangalinggon tukon beena posoboli rugi doi nadaanoan yana momasakit.

²⁰Indee komo umbase konaata malaneno kai boineno sampe doatadoo banggadudul mate, sio nainukum.

²¹Bai kalu doatadoo aki namate doi meeng kai lua kooloyo lalomo, natuanoo aki nainukum. Karugian yana motoupiyo tobikon nalapusan donaatadoo buno pokakana ukuman doi yana.

²²Kalu bubula komian mala-malaneno daano poakate tukon daano komeeng komian doi antara yanila moolubatene kosilakaan doi meeng koboine motianan sampe yana tobulus, bai aki nasakisaa doi butongo bailon, maka domianoo sio namebeyal denda konakadaang buno komo nalangkai natinuntut tukon mosinotujui luwedoi hakim-hakim.

²³Bai kalu boinedoo kanakon silakaan mo lobian babalat, maka koukumano doiyamo nyawa sinoboli nyawa,

²⁴ mata sinoboli mata, ngolingo sinoboli ngolingo, limano sinoboli limano, aino sinoboli aino,

²⁵pakol sinoboli pakol, pakol sinua sinoboli pakol sinua, boboongan sinoboli boboongan.

²⁶Indee komo umbase konaata matano polong piit, sio nasodiiyomo donaatadoo salaku posoboli tuuk doi matano.

²⁷Kalu memeeng komian umbase konaata polong moloto kongolingo, donaatadoo sio nasodii yomo salaku posoboli motuuk doi ngolingodoo.”

²⁸“Kalu meeng kosapi langgilo tanduke komeeng komian polong mate, dosaapidoo sio nainakate tukon linambit batu, tukon kosailo aki namoola kinaan, bai kotumbuno aki naikon nainukum.

²⁹Kalu sapi langgilodoo daano konakabiasaan mobatanduk, tukon kotumbuno lapamo binee ingatan, bai aki dagaiyo doiyayonoo, maka kalu naikon sapi langgilodoo matanduk meeng komian polong mate, maka iyayonoo sio nainakate tukon sinakul batu tukon kotumbuno koidan sio nainukum mate.

³⁰Bai kalu sapi tumbunodoo linoason mobeale koposobolino, yana sio nabeale bulaando konakadaang komo tinuntut motuuk posoboli nanyawa.

³¹Kalu domo inakatedoo meeng kopau malaneno kai boine, paraturanoo tapake koidan.

³²Kalu komo tangakatedoo meeng koata malaneno kai boine, dosapidoo tumbuno sio nabeale tolukolono kodoy perak doi atadoo tumbuno, tukon sapi langgilodoo sio sinakul batu pomatekon.

³³Indee komo alayo komeeng kobubung pokukupino kai makali bubung tukon aki nakukupiyo, maka meeng kosapi langgilo kai keledai otuwong doi lalomo,

³⁴dobubungoo tumbuno sio nabeale koposoboli rugi doi iyayon pinialadoo tumbuno, bai yana moola alayo iyayon piniala mo lapamo matedoo tuuk doi butongo.

³⁵Kalu meeng komian nasapi langgilo mangakate mian bailon nasapi langgilo, loluakon kotumbuno sio nabalukene doiyayonoo mopiniala mo daano motubo tukon ebese kodoyno. Yanila koidan sio naebese kosailo iyayon piniala mo matedoo.

³⁶Bai kalu totoi baikon sapi langgilodoo daano kona kabiasaan matanduk, tukon kotumbuno aki nadagaiyo, yana sio nasoboliyo tukon sapi langgilo modaano motubo, tukon moola mangala iyayon piniala mo lapamo matedoo tuuk doi butongo.”