Read Banggai TOBUATAN 22 Bible Online

TOBUATAN 22 - Banggai bible

TOBUATAN 22

¹“Indee komo mondikuk meeng kosapi kai domba maka nakelete kai balukene, sio nasoboliyo meeng kosapi tukon lima kosapi tukon meeng kodomba tukon sangkap kodomba.

²Yana sio soboliyo kolangge mo ndikukemo. Kalu yana akiyo kona oioila, yana susuungo naikon binalukon bunopokakana koata tuuk soboliyo kolangge mo lapamo nandikuke. Kalu domo ndinikukoo buno sapi, keledai kai domba, tukon pinososuunggon doi mianoo yana daano motubo, yana sio soboliyo meeng koiyayon piniala tukon lua koiyayon piniala. Kalu doi tempo popook meeng kopondikuk linako doi napondikukan doi meeng kobonua lalomo, maka yana tangakate, mian moakateyodoo aki nasalah. Bai kalu langgedoo teali doi tempo oloyo, mian moakateyo inaanggon sala.

⁵Indee komo batadikene kona iyayon piniala makaan bulung doi naasi kai doi naanggur asino, maka iyayonoo tosodiimo tukon kaane komian bailon naasi asilo, maka doiyayonoo tumbuno sio nabeyale koposoboli rugi tukon hasil monondok luwedoi naasi kai naanggur asino susuungo.

⁶Indee komo mokubai aung doi nakombung susuungo maka doaungoo lala doi mian naasi bailon tukon suayo kabus kogandum mosodo tubo kai gandum puuto mosodo pinatol, maka domianoo mobalalakon sio nabeyale koposoboli rugi.

⁷Kalu andeno daano komian mosatuju mongusol abosan buno doy kai langge maaling koolino. Bai doi bundu abosano ndinikuk luwedoi nabonua. Kalu linaat kopondikuko, yana sio nabeyale lua luunggon paku.

⁸Bai kalu kopondikuko aki napinososuunggon, dopangabosoo sio nabinaba doi tampat kaledaan, tukon idoo yana sio nabatotopi baikon yana aki mondikuk langge moinabosoo doi yana.

⁹Sasamba koponggimakonan lalomo tentang buat, kai tentang sapi, keledai, domba, pakean kai oila tolong komo lapus maka pinososuunggon koidan, komian momangaku salahku kotumbuno sio nabinaba doi tampat kaledaan. Mian Bisa mookitakene salahku mian mo sala, sio namebeyal lua luunggon paku doi tumbeno.

¹⁰Andeno meengkomian mopiala keledai, sapi, domba kai iyayon piniala bailon tulano koona. Doibundu iyayon pinialadoo mate, pakolon kai linambas musuh, baanggokai akiyo kona sakisii.

¹¹Doi langgedoo lalomo yana sio naampakon doi tampat kaledaan tukon batotopi tukon TEMENENO sambuno baikon yana aki namondikuk iyayon piniala mo lapamo minonggipialakon doi yana. Kalu yana takainomo aki namondikuk, kotumbuno sio natanggunge karugianoo, tukon mian mopialayo maunaaki namebeyal posoboli rugi.

¹²Kalu iyayonoo mian bailon ndikuke, maka mian mopialayo sio namebeyal posoboli rugi doi tumbuno.

¹³Kalu iyayon pinialadoo iyayon barani sokuwo, mian mopialayo sio natudoikene kobukuno labi-labino salaku buktii doi tumbuno, aki napalaluu yana mebeyal posoboli rugi motuuk doi iyayonoo.

¹⁴Kalu memeeng komian masabol meeng koiyayon piniala maka iyayonoo pakolon kai mate doi tempo kotumbuno akiyo doitampat kajadianoo, komo masabol sio namebeyal posoboli lugi.

¹⁵Bai kalu doiya teali doi tempo kotumbuno daano idoo, komo masabol aki napalaluu mebeyal posoboli rugi. Kalu iyayon pinialadoo iyayon mominonggisabokon, korugino tosoboli doi onggos pasabol.”

¹⁶ “Indee komo bidukiyo komeeng kopau boine moakiyoon napobbiyanggon sulano napokoloi, sio nabeyale kosaino tukon kilayomo yana.

¹⁷Bai kalu kotamano aki napataikene malanedoo osowaan tukon napau, malanedoo sio nabeyale doi tamadoo kodoy mopokakana konakadaang kosaino tuuk meeng kopau boine.

¹⁸ Sasamba koboine mo kubaiyo komotoiyan sio nainakate.

¹⁹ Mian mopololoai tukon iyayon sio nainakate.

²⁰ Indee komo mososubakon sosuba doi temeneno-temeneno bailon alaasene doi Yaku, TEMENENO, sio nainukum mate.

²¹ Inaimo molailainggene kai moaki naadil motuuk doi mian lulubaton; neneekemo baikon loolukon komuyukai mian lulubaton doi Mesir.

²²Inai pokubaiyo kobalu kai pau-pau tuboon tukon sambu-sambumo.

²³Kalu komuyu kulokisanggene yanila, Yaku, TEMENENO naikon lengele yanila kalu yanila uwang mangkabi tulung doiya-Ku.

²⁴Yaku naikon nggimal tukon akateyo komuyu doi polobosian lalomo, sampe komubolo-boloki teali balu, tukon komupau-pau teali tuboon.

²⁵ Kalu komuyu binggotiiyo doy doi meeng komian motalalais moluwe doi Kubangsa, inaikai motindokiiyo buno patagih samea motuntute konabunga.

²⁶ Kalu komuyu mangala mian bailon najubah salaku pebeyal nasamea, dojubahdoo sio poabalikene moakiyoon nasosoop kooloyo,

²⁷sabab dotoikoo daanokai koona susuungo tuuk mokotolonosiiyo kobutongo. Kalu aki nainabalikon doi yana, oilakoidan komo sio napakeyo teali nalungut doi tempo moolowan? Kalu yana uwang mangkabi tulung doiya-Ku, maka Yaku naikon ndongoliiyokai sabab Yaku daano Daku seang.

²⁸ Inai batotopikene ko Mian Bisa tukon inai mokutuke komubangsa nakatua.

²⁹Doi tempo motinantukon, pososubakenemo doiya-Ku kosoobos luwedoi mugandum hasilo, muanggur paisuno tukon muzaitun lisisono. Salakanggenemo doiya-Ku komupau-pau mala-malaneno molanggongo,

³⁰koidan sapi tukon domba langgilo mosinuung tumbe. Batadikenemo doiyayon-iyayonoo nadungol doi tinano pitu kooloyo konakalumbit, maka salakanggenemo doiya-Ku doi oloyo kowaluno.

³¹ Komuyu Kumian, tobikon doiya iyayon oilakai komo iyayon barani sokuwo, aki namoola komuyu kaane kosailo, beekene doiya doi asu-asu.”