Read Banggai TOBUATAN 23 Bible Online

TOBUATAN 23 - Banggai bible

TOBUATAN 23

¹ “Inai babilitakene kobilita kala, tukon inai motulunge komian mo lokis mo taamiyo kosilingan mo aki nakana.

²Inai moloiloingi doi mian momokubai sala kai babayo salah koaturan tukon motaamiyo kosilingan mo aki nakana.

³ Inai moposasalakene komian doi palakala pangadilan lalomo, maukai komo inadilidoo mian motalalais.

⁴ Kalu komuyu pododuang mokitayo komumusuh nasapi kai nakeledai motapa, abalikenemo doi tumbuno.

⁵Kalu komumusuh nakeledai tuwong sabab babalat kopongolokitino, tulungiyomo yana mokekendenge doiya keledaidoo; inai motinggale bunodoiya tolong.

⁶ Lakukanggenemo tukon adil komian motalalais kalu yana lubat popitoikene konapalakala doi pangadilan.

⁷Dedeenggenemo kotuduhan mokala tukon inai momangaanikene komian mo aki nasalah inukum mate, sabab Yaku aki kubisakene komian mo kubaiyo kokulokisan mo buno doiya.

⁸Inai mantalima doy sogokan, sabab kodoy sogokan kabaiyo komian sala teali kana tukon komian kana teali salah.

⁹ Inai mokubaiyo komian lulubaton tukon sambu-sambumo; komuyu toiyomo bulaando kondondoongo komian molulubaton, sabab maukai komuyu lolukon mian lulubaton doi Mesir.”

¹⁰ “Noom kotaun konakalumbit komuyu sakaiyo komuasi tukon alayo oila kohasilo.

¹¹Bai doi taun kopituno butadoo sio pobatadikene. Doi taunoo lalomo komuyu aki namoola mokombul oila komo tubo doi muasi. Batadikenemo doiya tuuk doi mian motalalais, tukon kolabino tuuk doi iyayon mbosolo. Kubaiyomo bunodoiya tukon anggur asino tukon mukayung zaitun batango.

¹² Noom kooloyo doi meeng kominggu lalomo komuyu moola balimang, bai doi oloyo kopituno komuyu sio potade, sulano komu iyayon piniala, ata-ata tukon mian lulubaton mo balimang tuuk doi ikoo moola tade koidan.

¹³Palatikanggenemo sasaibino komo lapamo Kubantile doi ikoo. Inai mososubaiyo koilah-ilah bailon, kai mabantil sambuno bai aki namoola.”

¹⁴“Sasamba kotaun sio natoluluunggon pomokubai lamean mo tuuk odotiiyo Yaku.

¹⁵ Doi bituwon Abib lalomo, doi tempo motinatapkanggon polamekene ko Lamean Roti mo Akiyo ko Ragino buno mo lapamo Kuparentakene doi ikoo, sabab doi bituwon lalomodoo komuyu otinggalemo ko Mesir. Inai mokaane koroti modaano koragino doi balameananoo mopitu kooloyo lalomo. Sasamba lunggon polubat kaleda doiya-Ku, komuyu sio pomababa sosubakon.

¹⁶ Kalu komuyu tumbeiyomo kopo asi hasilo sio polamekene. Lamekenemo ko Lamean Sandung Moinalatoi Loon nalinamekonan doi napupusan kotaun tempo komuyu pototongikene koasi anggur hasilo tukon asi baku hasilo.

¹⁷Sasamba kotaun doi tempo nakinubaiyan dolameanoo mokotoluno, sasaibino komalane sio lubat bakaleda doi Yaku, TEMENENO mu Mian Bisa.

¹⁸Inai mososubakene koroti modaano koragino, kalu komuyu mososubakon iyayon piniala doiya-Ku. Iyayon piniala inakko mo sinosubakon doiya-Ku doi lameanoo aki namoola inotinggal polong namodowa dowa-dowakon.

¹⁹ Sasamba kotaun komuyu sio pomababa doi TEMENENO mu Mian Bisa nabonua kogandum tumbeno komuyu mopupuwo. Domba pauno sailo kai mbembe pauno aki namoola sinaang tukon tinano susuno paisuno.”

²⁰“Yaku naikon mosumbolii Kumalaekat lolukoniyo komuyu doi ampakonan lalomo tukon babayo komuyu doi tampat Yaku mosadiakene.

²¹Palatikanggenemo tukon taatiyomo yana. Inai monggimoliiyo yana sabab yana Kusosumbolii, tukon yana aki naikon naompunio komu lalim.

²²Kalu komuyu taat doi yana tukon lakukene sasaibino Daku pinarentakon, Yaku naikon polobosi lawane sasaibino komumusuh.

²³Daku malaekat naikon lolukoniyo komuyu tukon babayo komuyu doi bangsa Amori, Het, Feris, Kanaan, Hewi tukon Yebus nalipu, tukon yanila naikon kulopuwo.

²⁴Inai mososuba doi napobalambeaan tukon inai moloingiyo konapo bakaledaan. Manasemo konapo balambeaan tukon lotoyomo kosudong-sudong batu yanila mopakeo tuuk doi napo bakaledaan.

²⁵Kalu komuyu sosubaiyo Yaku, TEMENENO mu Mian Bisa, Kubalakaatiyo naikon komuyu tukon kinaan tukon moininum, tukon sasaibino kosesel naikon Kudedeenggene luwedoi komuyu.

²⁶Doi polipu akiyo koboine motobulus kai kamba. Komuyu naikon Kubeena umur mobulusan.

²⁷Kobangsa-bangsa komuyu molubotiiyo naikon Kukubaiyo matakutene Yaku; yanila naikon Kutealikene nggalanggabut; sasaibino komumusuh naikon bangabalinggon tukon bulen.

²⁸Komumusuh-musuh naikon Ku pobandakene, tukon bangsa-bangsa Hewi, Kanaan tukon Het Kusiikayo luwedoi salaamu sulano komuyu moola maju.

²⁹Yanila aki naikon Kusiikayo pososinggat doi meeng kotaun lalomo, sulano butadoo inai tosodiinggon, tukon iyayon barani naaki nabalelas.

³⁰Yanila naikon Kusiikayo kososoobos, sampe Daku manoo mobadaang tuuno komo dungoliyo butadoo.

³¹Komulipu kalalatano naikon Kutataapene luwedoi Akaba Minangano polong doi Efrat Paisunobatango, tukon luwedoi Tobun Tanga polong doi padang lalomo. Kubeena komuyu kuasa mopalentayo dolipudoo tumbuno, sampe komuyu moola siikayo yanila doi tempo pomajuan molambase butadoo.

³²Inai mokubai perjanjian tukon mian-mianoo kai tukon napoo ilah-ilah.

³³Inai batadikene domian-mianoo nadungol doi mulipu, sulano komuyu aki pososuba doi napo ilah-ilah tukon baladosa doiya-Ku. Kalu komuyu sosubaiyo yanila napai ilah-ilah, komuyu tuwong doi dosa lalomo.”