Read Banggai TOBUATAN 24 Bible Online

TOBUATAN 24 - Banggai bible

TOBUATAN 24

¹Doibundu TEMENENO bantile doi Musa, “Libamo mangadap doiya-Ku, ikoo polaing Harun, Nadab tukon Abihu, tukon pitu kolono kopokatua bangsa, tukon sosubaiyo Yaku luwedoi odoonan.

²Tongo ikoo susuumu moola lubat lolaniyo Yaku. Kobailon aki namoola lubat lolanikon, tukon rayat bai aki namoola toliboiyo nabunggul nia.”

³Maka Musa ampakon tukon popitoikene doi bangsadoo sasaibino koparentah tukon TEMENENO naaturan. Yanila sasaibino timbiliyo pososinggat, “Kami yase kubaiyo sasaibino ko TEMENENO nabinantil.”

⁴Sambuno lapa doiya Musa tulisemo sasaibino ko TEMENENO naparentah. Modowakon dowa-dowa, yana kekendengemo komeeng kobalabaan tukon songulo lua kosudong doi bunggulo uuno; sasamba kosudong wakiliyo doi meeng ko Israel benseno.

⁵Maka Musa mosumbolii moimoiya kotabo-tabo, tukon yanila mososubakon sosuba mosinua tuuk doi TEMENENO tukon mokolot moimoiya kosapi tuuk sosubakon podamean.

⁶Kosoobos moluwe doi sapidoo sauno Musa alayo tukon nakundongiikene doi baskom-baskom lalomo. Kosoobos koidan kundongiikenemo doi balabaanoo bunggono.

⁷Doibundu yana alayomo kobuku perjanjian mototuliso ko TEMENENO naparentah-parentah, tukon bacayomo doi bangsadoo. Yanila bantilano, “Kami yase taatiyo ko TEMENENO tukon lakukene sasaibino Konaparentah.”

⁸ Maka Musa mangala sau mo daano doi baskom-baskomoo lalomo tukon tiposiikene doi rayat konabantilano, “Nasaunia ekeenggele ko TEMENENO naperjanjian tukon komuyu luwedoi Naparentah-parentah.”

⁹Doibundu Musa, Harun, Nadab, Abihu tukon pitu kolono dokatuadoo toliboiyo kobunggul,

¹⁰tukon yanila kitayo ko Israel na Mian Bisa mokokondong doi meeng kolangge bunggono buno sowaan luwedoi batu nilam, tukon manampal buno timbu mo madialan.

¹¹Sasaibino ko Israel katuanodoo kitayo ko Mian Bisa; maukai nabuno doiya yanila aki Nalinopu. Sambuno lapa doiya yanila kaan tukon inum.

¹²Doibundu TEMENENO bantile doi Musa, “Lubotiiyakumo doi bunggul bunggono. Idoo naikon Kubeekonggon lua kobatu Yaku mo tulisiyo tukon sasaibino Daku aturan. Sasaibino doaturanoo Kubeekonggon teali otunggul doi bangsadoo.”

¹³Maka Musa tukon napotombonii Yosua bato-batotobo tukon Musa tolibo doi bunggul do TEMENENO doo nadungolan.

¹⁴Musa lapamo bateteba doi sasaibino kokatua-katua Israel, “Totiiliyomo doi basandungan nia polong mai abali. Harun tukon Hur daano podungoli komuyu naimbaa. Indee komo daano konaulusan, moola mangadap doi yanila sulano nainulus.”

¹⁵Musa toliboiyo ko Bunggul Sinai, maka nasinunggupi bunom tambunomeeng.

¹⁶Ko TEMENENO nadaanoan laango bulus doi bunggul bunggonodoo. Noom kooloyo konakalumbit dobunomo sunggupiyo dobunggulo, tukon doi oloyo kopituno TEMENENO uangemo Musa luwedoi bunomo.

¹⁸ Maka Musa banggadudul tolibo polong yana usok doi bunomo lalomo. Sangkap kolono kooloyo sangkap kolono kopopook Musa dungol idoo.