Read Banggai TOBUATAN 26 Bible Online

TOBUATAN 26 - Banggai bible

TOBUATAN 26

¹“Kubaiyomo ko Sandung motuuk doiya-Ku luwedoi songulo kopatolo kotoik lenan mohalus, tinonun tukon wol manampal, samelaon tukon memela. Sujiomo dotoikoo buno domahlukoo doi surgaa modaano kapilo timbalango.

²Sasamba kopatolo sio napokakana koukulano, kona kobulus songulo lua kometer tukon kona kebelan lua kometer.

³Lima kopatolo kotoik sio napinotaamikon teali meeng kokadut, tukon lima kopatolo bailon sio nakinubai bunudoiya koidan.

⁴Mokubaimo bangiisonan moluwe doi toik momanampal loluakon kobibilo dokadutoo,

⁵limakolono kobangiisonan doi suwe-suwele dokadutoo.

⁶Mokubaimo lima kolono kobakaitonan mosoni sulano napotaamikene loluakon dokadutoo sulano namoola pinomeenggon.

⁷Do Sandungoo atono kubaiyomo doi songulo meeng kotoik patolo luwedoi mbembe buluno.

⁸Sasamba kopatolo sio napokakana koukulano, konakobulus songulo tolu kometer tukon kona kebelan lua kometer.

⁹Lima kopatolo sio napinotaamikon teali meeng kokadut, tukon noom kopatolo bailonggon sio nakinubai bunodoiya koidan. Bataamian konoomo sio napinaku lua sulano natombukiyo taalikon doi salaano do Sandungoo.

¹⁰Konoikenemo kolimakolono kobakaitonan doi kadut bibilo tumbeno tukon lima kolono kobakaitonan doi kadut bibilo koluano.

¹¹Mokubaimo limakolono kobakaitonan moluwe doi tambaga tukon kaitenemo doi bangiisonanoo sulano lolua dokadutoo moola pinomeenggon teali pangalatoi Sandung.

¹²Sembeleng kotoik patolo molobian doiya tuuk potombuki ko Sandung tonggulungo.

¹³Kotoik labino molima kolono kosentimeter kona kebelan popupuson ko Sandung sio nabinatadikon natombukiyo do Sandungoo lisuko.

¹⁴Mokubaimo lua kopotombuki taalikon doi Sandungoo tonggulungo, komeeng luwedoi domba langgilo kulito mosiname memela tukon komeeng koidan luwedoi kulit moalus.

¹⁵Mokubaimo Sandung pakakaso motongokokondong moloyos luwedoi kayung akasia.

¹⁶Sasamba kopakakas kona katandak sangkap kometer tukon konakebelan 66 kosentimeter.

¹⁷Doi sasamba kopakakas daano lua kopatok mopotimbang sampe dopakakasoo moola pinotaamikon meeng tukon bailon.

¹⁸Doi taalikon lalom ko Sandung, kubaiyo luakolono kopakakas,

¹⁹tukon sangkap kolono kopoombosiino luwedoi perak, lua doi bilit sasamba kopakakas tuuk looluakon kona patok.

²⁰Tuuk taalikon lembet ko Sandung, kubaiyomo lua kolono kopakakas

²¹tukon sangkap kolono kopombosiino luwedoi perak, lua doi bilit sasamba kopakakas.

²²Doi Sandungoo tonggulungo taalikon talise, mokubaimo noom kopakakas

²³tukon lua kopakakas tuuk doi pasu-pasuno.

²⁴Dopasunodoo pakakaso sio napinotaamikon taalikon doi aino, banggadudul polong taalikon doi babo. Lolua kopakakas moteali pasuno sio nakinubai buno doiya koidan.

²⁵Jadi sasaibino daano alu kopakakas tukon songulo noom kopombosiino perak, lua doi bilit sasamba kopakakas.

²⁶Mokubaimo songulo lima kokayung motopopong luwedoi kayung akasia, lima tuuk pakakas doi meeng ko Sandung lisuko,

²⁷kolima tuuk doi lisuko mobailon, tukon lima koidan tuuk doi Sandung lisuko taalikon tonggulung taalikon doi talise.

²⁸Kayung motopopong doi tanga sio nakinonoikon konakatandak potangai kopakakaso, luwedoi Sandungoo bunduno suwe-suwele.

²⁹Ko Sandung pakakaso tukon kayung-kayungdoo motopopong sio nalinapis tukon mosoni. Kokulaluk pataano kayungdoo sio nakinubai luwedoi mosoni.

³⁰Kekendengemo do Sandungoo loingikene oilamo Daku tinudoikon doikoo doi bunggulia bunggono.

³¹Mokubaimo meeng kolalanse luwedoi lenan moalus motinonun tukon wol manampal, samelaon tukon memela. Sujiomo dotoikoo tukon domahlukoo doi surgaa modaano kokapilo timbalango.

³²Isenemo dolalansedoo doi sangkap kosudong kayung akasia motalapis mosoni tukon bangiisonan mosoni tukon kinonoikon doi sangkap kopombosii perak.

³³ Abesemo dotoikoo taalikon doi yade kona tangadadalan kobangiisonan doi Sandungoo atono. Doi toikoo tonggulungo sio nainabos ko Peti Perjanjian koantoko loolua dobatudoo. Toikoo poalaasene do Sandungoo Kombiang Moliyous tukon doi Kombiang Mo Moliyous tuuno.

³⁴Abesemo do Peti Perjanjianoo potutupo doi petidoo bunggono.

³⁵Meda basosubakonan sio nainabos do Sandungoo Kombiang Mo Moliyous tuuno tonggulungo taalikon doi lembet, tukon lampu aino doi taalikon lalom do Sandungoo lalomo.

³⁶Mokubaimo lalanse tuuk do Sandungoo tataapono luwedoi toik lenan moalus motinonun tukon wol manampal, samelaon tukon memela, binubungai tukon sinuji.

³⁷Dolalansedoo sio naminokubaikon lima kosudong moluwe doi kayung akasia molinapis tukon mosoni maka napinotaamikon tukon lima kobangiisonan mosoni. Mokubaimo lima kopombosii moluwe doi tambaga doi sudong-sudongoo.”