Read Banggai TOBUATAN 27 Bible Online

TOBUATAN 27 - Banggai bible

TOBUATAN 27

¹“Mokubaimo meeng kobalabaan moluwe doi kayung akasia. Kondondoongo tapanapat, konakobulus tukon nakebelan suwe-suwele 2,2 meter tukon nakatandak 1,3 meter.

²Sasamba kopasuno doi babo sio nakinubai kotanduk-tanduko moteali meeng tukon balabaan. Sasaibino sio nalinapis tukon tambaga.

³Mokubaimo balanga, sikoop, manggo, porok tukon busaan. Sasaibino dopakakasoo sio nakinubai luwedoi tambaga.

⁴Mokubaimo kowal moinanam luwedoi tambaga tukon konoikenemo dokulalukoo mosangkap tuuk kayung patanggung doi pasuno mosangkap taalikon bilit.

⁵Konakatandak dokawatoo moinanam sio napokuwakon dobalabaanoo nakatandak. Kowal inanamoo sio nakinalokon doi balabaanoo taalikon bilit.

⁶Mokubaimo lua kayung patanggung luwedoi kayung akasia molinapis tambaga,

⁷tukon usekene doi kulaluk-kulalukoo lalomo doi loolua kolisuko dobalabaanoo salataa natinanggung dobalabaanoo.

⁸Kubaiyomo dobalabaanoo luwedoi dopi tukon daano kobuango taalikon doi lalom, loingiyo komo lapamo Yaku tudoikene doikoo doi bunggulia bunggono.

⁹Kubaiyomo kobasaleano potikunggon Daku Sandung mopinagali kadut luwedoi toik lenan moalus. Taalikon doi lalom dokadutoo konakobulus 44 kometer,

¹⁰kopataanino lua kolono kosudong tambaga, suwe-suwele inobosi tukon tambaga, tukon pakait maka bangiisonano luwedoi perak.

¹¹Kubaiyomo buno doiya koidan taalikon doi lembet.

¹²Taalikon doi talise, dokadutoo nakobulus 22 kometer, tukon songulo kosudong tukon songulo kopombosiino.

¹³Doi taalikon tolopot, modaano kotataapono, konakobulus dokadutoo koidan 22 kometer.

¹⁴Doi bobo bakalinga dotataaponoo sio nakinonoikon kokadut, suwe-suwele konakobulus 6,6 kometer tukon tolu kosudongo doi tolu kopombosiino.

¹⁶Kotataapono sio nabinee lalanse kona kobulus 9 kometer luwedoi lenan moalus motinonun tukon wol manampal, samelaon tukon memela, sinuji tukon binubungai. Dotataaponoo toikoo pataanino sio naminokubaikon sangkap kosudongo tukon sangkap kopombosiino.

¹⁷Sasaibino kosudong doi potikunggon dobasaleanoo sio napinotaamikon meeng maka bailon tukon bakaitonano perak; kopakaito sio luwedoi perak tukon kopombosiino sio luwedoi perunggu.

¹⁸Kadut doi potikunggon dobasaleanoo konakobulus 44 kometer, konakebelan 22 kometer tukon konakatandak 2,2 kometer. Kokaduto sio nakinubai luwedoi toik lenan moalus tukon kopombosiino luwedoi tambaga.

¹⁹Sasaibino kololongguno mopinake doi Sandungoo lalomo, sasaibino ko Sandung patoko tukon kokaduto sio nakinubai luwedoi tambaga.”

²⁰“Sumboliiyomo ko Israel miano namababa zaitun lisisono mo tulen tukon momonondok sulano napinake doi lampu doi Daku Sandung lalomo momoola sinua tukon kolot budoo.

²¹Harun tukon napau-pau sio naulusiyo dolampudoo tambuun kinobian polong dowa-dowa doi tampat Kudaanoan, doi toikoo motokooton tonggulungo doi Peti Perjanjianoo salaano. Dopalentadoo sio nalinakukon sidutu-posidutukon doi Israel miano tukon nakatulunan.”