Read Banggai TOBUATAN 28 Bible Online

TOBUATAN 28 - Banggai bible

TOBUATAN 28

¹“Uwangemo utusomu langgongo Harun tukon napau-pau Nadab, Abihu, Eleazer tukon Itamar, tukon alaasemo yanila sulano napomoola leleaniyo Yaku salaku imam.

²Kubaiyomo koimam napakean motuuk doi Harun, sulano yana tokita tongodotii.

³Uwangemo sasaibino komian mobakaut molapamo Kubeena pandoiyan. Sumboliiyomo yanila nakubaiyo Harun napakean sulano yanila moola inalaasanggon sulano naleleaniyo Yaku salaku meeng koimam.

⁴Sumboliiyomo yanila koidan namokubai potombuki oyopo, efod, jubah, kalambi mosinuji, tuala tukon pabaang. Imam napakeanoo sio napo kubaiyo tuuk doi Harun utusomu langgongo tukon napau-pau sulano yanila moola leleaniyoYaku salaku imam.

⁵Pakeyanoo sio yanila nakubaiyo luwedoi wol manampal, samelaon tukon memela, banang mosoni tukon lenan moalus. Sangalaasan doiya efod sio nabinubungai tukon suji.

⁷Lua koalos doi bengeno pokoot efod sio nakinoitikon doi lisuko.

⁸Meeng kopabaang motinonun alus luwedoi lolonggu mo pokakana sio nakinoitikon doi efodtoo sulano napotaami.

⁹Mangalamo lua kobatu delima. Mongumboliimo meeng komian tukang mosoni pandoi sulano nabotike doi batudoo songulo lua Yakub napau-pau sambuno loingiyo kona potuunduan konaumur, noom kosambuno doi memeeng kobatu. Maka dobatudoo permata molua sio nakinonoikon doi bingkai mosoni lalomo tukon inabos doi efod pokooto taalikon doi bengeno salaku paloosan pononook doi songulo lua ko Israel benseno. Tukon kokubaidoo Harun babayo kosambunoila doi bengeno, sampe Yaku, TEMENENO, sidutu neneeke doi yanila.

¹³Sangalaasan loolua dobingkai mosonidoo

¹⁴sio nakinubai koidan lua koinoon luwedoi mosoni tulen molinolosikon buno alos, doi mosonidoo bingkaino.”

¹⁵“Mokubaikenemo doi Imam Babasal komeeng kopotombuki oyopo tuuk pinake doi tempo yana naiyasano motoiyo ko Mian Bisa namongiasan. Lolonggu tukon sujino dopotombuki oyopodoo sio napokakana tukon kololongguno tukon koefod sujino.

¹⁶Kondondoongo tapanapat tukon pinaku lua, konakobulus tukon nakebelan suwe-suwele 22 sentimenter.

¹⁷Konoikenemo sangkap kodadalo kobatu permata doi potombuki oyopoo. Doi dadalo tumbeno kobatu delima, batu modaano koolino mosoni kobotiko tukon batu momoute kolalomo mobasokolaat memela.

¹⁸Doi baris koluano batu samrut, batu nilam tukon batu intan.

¹⁹Doi baris kotoluno batu permata momanampal kobotiko, batu akik tukon batu mosamelaon kobotiko.

²⁰Doi baris kosanggapo batu permata momanampal tuuno, batu permata momanampal kobotiko tukon batu permata momosoni samelaon kobotiko. Kosongulo lua dopermatadoo sio nakinootan tukon mosoni.

²¹Doi sasamba kopermata sio nabinotik doi meeng kosambuno luwedoi Yakub napau-pau mosongulo lua, salaku paloosan pononook naikon ko Israel bense-benseno.

²²Mokubaikenemo dopotombuki oyopodoo lua koinoon moluwe doi mosoni tulen molinolosikon buno alos.

²³Mokubaikenemo koidan lua kulaluk mosoni tukon konoikenemo doi loolua kobunduno doi potombuki oyopoo

²⁴maka usekene loolua doinonoo mosoni doi kulaluk-kulalukoo lalomo.

²⁵Kolua kobunduno bailon luwedoi inoonoo sio nakinoot doi loolua kobingkaino, sulano potombuki oyopdoo moola pinotaamikon tukon efod aloso doi bengeno taambikon salaano.

²⁶Mokubaikenemo lua kulaluk mosoni koidan, tukon konoikenemo doi potombuki oyopodoo doi tubono bilit taalikon doi lalomo mokanakon efod.

²⁷Salalapa doiya, mokubaimo lua kulaluk mosoni koidan tukon konoikenemo taambikon doi salaano loolua koefod aloso taalikon doi bengeno loolaniyo kopotaamikanano konakinoitian adukon doi bilit, taalikon doi babo dopabaangoo luwedoi tonunan moalus.

²⁸Kulaluk potombuki doyopodoo sio napinotaamikon tukon koalos momanampal doi efod kulaluko sulano kopotombuki oyopo tataap daano doi pabaangoo bunggono tukon aki natosodii.

²⁹Doi tempo Harun usok doi tampat momoliyous, yana sio nababayo ko Israel bense-benseno sambuno motobotik doi potombuki oyopodoo, sulano Yaku, TEMENENO, sidutu neneeke doi Kumian.

³⁰ Abesemo lua kolangge mopoipoisik imam mopakeo sulano natoiyo ko Mian Bisa namongiasan doi napotombuki oyopodoo lalomo sulano Harun napakeyo kalu yana mangadap doi Yaku. Doi tempo-tempo buno doiya yana sio nasidutu mapake potombuki oyopo, sulano yana moola motoiyo Daku mongiasan motuuk doi Israel miano.”

³¹“Jubah mopinake doi efod bunggono sio sasaibino tokubai luwedoi wol manampal.

³²Bulungo buango kinoonggol tukon pita mo tinonun sulano aki naambang namosiak.

³³Doi potikunggon kobibilo bilito sio nakinubai bubunga buno delima saano luwedoi wol manampal, samelaon tukon memela, pinoata-atanggon tukon kelintingan luwedoi mosoni.

³⁵Jubahdoo sio Harun napakeyo kalu yana batugas salaku imam. Doi tempo yana lubat doi salaanggu doi Kombiang Moliyous kai otinggale dotampatoo, naikon tololongol kokelintingan alalo, sulano yana aki namate.

³⁶Mokubaimo meeng kobubunga luwedoi mosoni tulen tukon botike kobantilan-bantilano ‘Moinalaas tuuk doi TEMENENO’.

³⁷Keetene doiya doi tuala tukon alos momanampal.

³⁸Bubungadoo mosonidoo sio Harun nakonoikene doi paaso sulano Yaku, TEMENENO, yase motalimayo sasaibino kososubakon komo Israel miano nabinaba doiya-Ku, maukai domababaanoo sosubakon, yanila lapamo mokubai lalim.

³⁹Harun nakalambi sio natinonun luwedoi lenan moalus. Kubaiyomo koidan komeeng kotuala luwedoi lenan moalus tukon pabaang mosinuji.

⁴⁰Mokubaimo kalambi, pabaang tukon tuala tuuk Harun napau-pau sulano yanila natongodotii.

⁴¹Konoikenemo dopakeanoo doi Harun utusomu tukon napau-pau. Tuluwomo yanila tukon zaitun lisisono; tukon doiya yanila tinabiskanggon tukon inalaas tuuk leleaniyo Yaku salaku imam.

⁴²Maka mokubaikenemo doi yanila saluan palus luwedoi toik lenan, konakobulus luwedoi owako polong doi banano sulano natombukiyo konamaa.

⁴³Saluanoo sio sidutu yanila pakeyo doi tempo napoousokan doi Ku Sandung lalomo kai loolaniyo kobalabaan tuuk lakukene kokaledaan salaku imam doi Kombiang Moliyous, sulano yanila aki namate sabab aki natokita konamaa. Doaturanoo tataap tapake tuuk Harun tukon nakatulunan.”