Read Banggai TOBUATAN 29 Bible Online

TOBUATAN 29 - Banggai bible

TOBUATAN 29

¹“Bunonaiyamo konacara kotahbiskangganano Harun tukon napau-pau sulano napomoola leleaniyo Yaku salaku imam. Mangalamo meeng kosapi mongula tukon lua kodomba langgilo mo akiyo konasesel.

²Luwedoi tepung tarigu momonondok tuuno, mokubaimo adonan mo akiyo koragino. Kosoobos doadonanoo sio nakinubai roti tukon zaitun lisisono, kosoobos koidan maunaakiyo kolisisono, tukon kolabino kinubai sinanga mosinouti tukon lisison.

³Abesemo doi bois lalomo tukon sosubakenemo doiya doiyaku posinggat-singgat tukon sosubakon sapi langgilo tukon lua kodomba langgilo.

⁴Sumboliiyomo Harun tukon napau-pau nalubat doi Kusandung tataapono tukon nabilisiiyo kobutongo.

⁵Konoikenemo koimam napakean doi Harun: kalambi, efod, jubah motombukiyo koefod, potombuki oyopo tukon pabaang.

⁶Abesemo kotuala doi oluno tukon tadukenemo doi tualadoo kobubunga mosoni tukon mo binotik ‘Inalaas tuuk doi TEMENENO’.

⁷Maka mangalamo lisison bakolobokiyan, kundongiikene doi oluno bunggono tukon tuluwomo yana.

⁸Salataa lapa doiya, sumboliiyomo konapau-pau nalubat tukon konoikenemo kokalambi

⁹tukon pabaang doi yanila, maka obosikenemo kotuala doi olunoila. Bunomo doiya konacara Harun tukon napau-pau natinahbiskanggonan. Yanila tukon konapoo katulunan sio naleleaniyo Yaku salaku imam tuuk sidutu-posidutukon.

¹⁰Doibundu dosapidoo langgilo sio mubabayo doi Kusandung salaano. Harun tukon napau-pau sio napoabese kolimanoila doi iyayonoo oluno bunggono.

¹¹Tembelemo dosapidoo langgilo doi salaanggu, doi Sandungoo tataapono.

¹²Mangalamo soobos dosapidoo sauno maka masautene tukon limamu saano doi balabaanoo tandu-tanduko. Dosaudoo labino sio mukundange tambikon doi bilit dobalabaanoo.

¹³Salataa lapa doiya alayomo sasaibino koinako damo tombukiyodoo kokombongo, momonondok tuuno luwedoi ateno tukon looluakon kosasallono tukon koinakko tukon abesemo sasaibino doiya doi balabaan bunggono tukon suwayomo salaku sosubakon doiya-Ku.

¹⁴Dosapidoo langgilo sailo, kulito tukon kombongo liso sio nasinua doi basandungan tonggulungo. Doiyamo kososubakon motuuk doi pongompuni sasaibino koimam nalalim.

¹⁵Doibundu mangalamo meeng kodomba langgilo. Harun tukon napau-pau sio naabese kolimanoila doi iyayonoo oluno bunggono.

¹⁶Maka tembelemo doiyayonoo, alayomo kosauno tukon tiposiikene doi balabaano lisuko mosangkap.

¹⁷Dodombadoo langgilo sio napinatol-patol. Kokombongo tukon kobanano sio nakinumosi tukon inabos doi oluno bunggono tukon doi pato-patolo bailon.

¹⁸ Pososubakenemo sasaibino dodombadoo langgilodoo sailo doi balabaan bunggono teali sosubakon mosinua. Dososubakonoo boono sanaanggene Konoanggu.

¹⁹Mangalamo meeng kodomba langgilo koidan, doiya kinubai pokoloboki doi batahbiskanggonan. Sumboliiyomo Harun tukon napau-pau naabese kolimanoila doi iyayonoo oluno bunggono.

²⁰Maka tembelemo dodombadoo langgilodoo, mangalamo soisik kosauno tukon sautene doi tolingaino taalikon doi bakalingano doi Harun tukon napau-pau, doi limano bakalinga balangato tukon aino bakalinga balangato. Dosaunodoo labino sio mukundongiikene doi sangkap dobalabaano lisuko.

²¹Mangalamo soisik kosau modaano doi balabaanoo bunggono tukon soisik kolisison bakolobokiyan, maka tiposiikenemo Harun tukon napau-pau maka napoo pakean. Tukon dokubaidoo Harun tukon napau-pau tukon napoo pakean inalaas tuuk doi Yaku.

²²Mangalamo domba langgilo inakko, puuso momominak, sisiako momominak luwedoi kombongo, taalikon komo monondok luwedoi ateno, looluakon kosasallono tukon inakko, tukon banano bakalingano.

²³Luwedoi roti bois molapamo sinosubakon doiya-Ku, mangalamo meeng koroti luwedoi memeeng kokaliangano: meeng komo kinubai tukon zaitun lisisono, meeng komo akiyo kolisisono, tukon meeng kosinanga.

²⁴Abesemo sasaibino dokinaanoo doi Harun tukon napau-pau limano tukon sumboliiyomo yanila natudoikenemo doiya-Ku salaku meeng kososubakon moinotudoikon.

²⁵Maka mangalamo dorotidoo moluwe doi yanila tukon suwayomo doi balabaan bunggono, doi sosubakon mo sinuwadoo bunggono. Sosubakono boono sanaanggene Konoanggu.

²⁶Alayomo dodombadoo langgilodoo titidungo tukon sosubakenemo tuuk sosubakon potudoikon doiya-Ku. Tukon doiyamo komuobos.

²⁷Doi bakolobokiyan imam natinahbiskanggonan, titidungo tukon dodombadoo langgilodoo banano mopinake doi bakolobokiyan lalomo sio nasinosubakon buno meeng kososubakon potudoikon doiya-Ku tukon pinoalaason komo tuuk doi sasaibino koimam.

²⁸Naiyamo Daku kaputusan moaki namoola binolii: Doi tempo Dakumian nalubatan mososubakon sosubakon podamean, doiyayon pinialadoo titidungo tukon banano doiyamo sasaibino koimam naobos. Doiyamo Dakumian nasosubakon mo tuuk doiya-Ku.

²⁹Harun napakean kaledaan sio nainolusikon doi napau-pau, sulano yanila moola pakeyo doi tempo napotinahbiskanggonan.

³⁰Harun napau-pau moteali imam mosoboliyo kotamano tukon usokiyo Daku Sandung tuuk molakukanggene kokaledaan doi Kombiang Moliyous, sio napakeyo dopakeanoo pitu kooloyo konakalumbit.

³¹Mangalamo domba langgilo sailo mopinake doi bakolobokiyan Harun tukon napau-pau natinahbiskanggonan tukon saangemo dosailoo doi meeng kotampat mo moliyous.

³²Dosailoo sio napookaane doi Kusandung tataapono tukon roti labino mo daano doi bois.

³³Yanila sio nakaane kokinaan mosinosubakon doi upacara pongompuni lalim lalomo doi tempo pentahbisan. Tongo imam komomoola makaan dokinaanoo molapamo inalaas motuuk doiya-Ku.

³⁴Kalu namodowa dowa-dowa dosailoo kai dolotidoo daano kolabino, maka dolabinodoo sio nasinua kabus, tukon aki namoola kinaan, sabab lapamo inalaas.

³⁵Bakolobokiyan Harun tukon napau-pau natinahbiskanggonan sio nalinakukon pitu kooloyo mosopok konakalumbit, buno molapamo Kuparentakene doikoo.

³⁶Sasamba kooloyo sio nasinosubakon meeng kosapi langgilo tuuk pongompuni lalim. Tukon dososubakonoo kobalabaan kiniliyousi. Maka dobalabaanoo sio mutuluwo tukon zaitun lisisono sulano inalaas tuuk doi Yaku.

³⁷Lakukenemo doiya sasamba kooloyo pitu kooloyo konakalumbit. Maka posaapon dobalabaanoo teali moliyous; oila tolong komo kanakon dobalabaanoo sio nasinalakanggon doi TEMENENO, tukon indeemo tolong komo singgilemo, naikon malaat silaka tobikon namoliyousan mobukuan.”

³⁸“Sasamba kooloyo tuuk sidutu-posidutukon doi balabaanoo bunggono sio nasinosubakon lua kodomba konaumur momeeng kotaun.

³⁹Komeeng tuuk sosubakon dowa-dowa, tukon komeeng koidan tuuk pososubakon kinobian.

⁴⁰Posinggat domba pauno tuuk pososubakon dowa-dowa sio nasinosubakon komeeng kokilogram kotepung tarigu momonondok tuuno sinambul tukon meeng koliter koanggur paisuno.

⁴¹Domba napau motuuk pososubakon kinobian sio nasinosubakon tukon kona kinubaian pokakana, sinambul tukon tepung zaitun lisisono tukon anggur paisuno. Dososubakonoo mosinua boono sanaanggene konoanggu.

⁴²Doisalaando tuuk sasaibino koloonu, sosubakon mosinuadoo sio nasinosubakon doi salaanggu doi Kusandung tataapono. Idoomo Daku pososuungan tukon Ku mian tukon basilingan doikoo.

⁴³Idoomo Daku pososuungan tukon ko Israel miano, tukon Kudaanoan laango naikon tealikene dotampatoo moliyous.

⁴⁴Yaku naikon tealikene ko Sandung tukon balabaan moliyous. Harun tukon napau-pau naikon Kupoalaasene luwedoi bailon sulano yanila naleleaniyo Yaku salaku meeng koimam.

⁴⁵Yaku podungoli ko Israel miano, tukon teali yanila na Mian Bisa.

⁴⁶Yanila naikon toiyo baikon Yakumo yanila na TEMENENO Mian Bisa mo babayo yanila tobuat luwedoi Mesir sulano kumoola podungoli yanila. Yakumo ko TEMENENO napoo Mian Bisa.”