Read Banggai TOBUATAN 3 Bible Online

TOBUATAN 3 - Banggai bible

TOBUATAN 3

¹Doiya kosinggato Musa totooliyo Yitro, namonianan, nadomba-domba tukon nambembe-mbembe, imam doi tano Midian. Salataa yana daano mololainge doiyayonoo doi padang lalomo sembeleng, polongokai yana doi Bunggul Sinai, bunggul mo moliyous.

² Idoo TEMENENO namalaekat otudoikene kobutongo doi yana doi bilat lalomo mokolot motobuat doi mosolot tanga-tangano. Musa kitayo domosolotoo mokolot, bai aki namokopul.

³“Bolikon langge,” kona popikikon. “Domosolotoo moaki namokopul! Tadukai kukitayo doi nalolanian.”

⁴TEMENENO kitayo Musa mololaniyo dotampatoo, maka Yana bantil doi sonitoo tanga-tangano, “Musa! Musa!” “Yaku naimbaa,” Musa timbiliyo.

⁵Maka ko Mian Bisa bantile, “Inai mololaniyo. Bukayo komu sandaal, sabab ikoo kokondong doi tano mo moliyous.

⁶Yaku nia mumbumbu na Mian Bisa, Abraham, Ishak tukon Yakub na Mian Bisa.” Maka Musa tombukiyo koduduso, sabab yana matakut mombalenge ko Mian Bisa.

⁷Maka ko TEMENENO bantile, “Yaku lapamo kitayo Daku mian nasakisaawan doi Mesir, tukon lengelemo konapai nggeleamonan momangkabi nainosodii luwedoi mian-mian molailainggene yanila. Kona bisaan Yaku toiyo sasaibino yanila nasakisaawan.

⁸Tobikon doiya Yaku obulus sulano kuosodiiyo yanila doi Mesir miano limano tukon babayo yanila tobuat luwedoi tanodoo ampakon doi meeng kotano moluwas. Kotanono kaasa tukon molumbang, tukon diabudodoo komo dungoliyo bangsa Kanaan, bangsa Het, Amori, Feris, Hewi tukon Yebus.

⁹Ko Israel miano nakokiilan Yaku lengelemo, tukon Kukitayo koidan bulaando yanila nalinailainggonan doi bangsa Mesir.

¹⁰Budodoiya ikoo Kusumboliikon sulano mangadap doi tomundo Mesir sulano ikoo moola andane Daku bangsa tobuat luwedoi tanodoo.”

¹¹Bai Musa bantile doi Mian Bisa, “Indee yaku nia, sampe moola mangadap tomundo tukon babayo ko Israel miano tobuat luwedoi Mesir?”

¹²Ko Mian Bisa timbiliyo, “Yaku naikon tomboniiyo ikoo. Tukon kalu dobangsadoo ikoo babayomo tobuat luwedoi Mesir, komuyu naikon bakaleda doi Yaku doi bunggulia. Doiyamokai kona totingoniiyan baikon Yaku mosumboliiyo ikoo.”

¹³ Musa timbiliyo, “Bai kalu yaku pososuunggene ko Israel miano tukon bantile doi yanila: ‘Mumbumbu na Mian Bisa sumboliiyo yaku doi ikoo,’ yanila pasti naikon mansadai, ‘Indee kosambuno?’ Maka oila komo sio kutimbiliyo doi yanila?”

¹⁴ Mian Bisa bantile, “YAKU doiyamo YAKU DAANO. Naiyamokai komo sio mubantile doi Israel miano, Yana komo binantil YAKU DAANO, lapamo sumboliiyo yaku doi komuyu.

¹⁵Babilitakenemokai koidan doi yanila baikon Yaku, TEMENENO, tumbumuyu na Mian Bisa, Abraham, Ishak tukon Yakub na Mian Bisa, mosumboliiyo ikoo doi yanila. Yakumo ko TEMENENO, doiyamo Kosambunggu sidutu-posidutukon. Doiyamo koponguanggono Yaku tuuk sasaibino kobangsa turu-turunano.

¹⁶Ampakono tukon pototongikenemo sasaibino katua-katua Israel. Bontiikenemo doi yanila baikon Yaku, TEMENENO, tumbumiyu na Mian Bisa, Abraham na Mian Bisa, Ishak tukon Yakub, lapamo okitakene kobutongo doi ikoo. Pailukenemo doi yanila baikon Yaku lapamo lubat doi yanila tukon lapamo kitayo bulaando yanila nakinubaiyan doi bangsa Mesir.

¹⁷Tukon Yaku lapamo putusiyo sulano mobabayo yanila luwedoi Mesir, tampat yanila nalinailainggonan, tukon antekene yanila doi meeng kolipu mokaasa tukon molumbang, lipu bangsa Kanaan, bangsa Het, Amori, Feris, Hewi tukon Yebus.

¹⁸Daku mian naikon ndongoliiyo komu bantilan-bantilan. Doibundu ikoo posinggat-singgat tukon katua-katua Israel sio poampakon momangadap doi tomundo Mesir tukon bantilekai doi yana: ‘TEMENENO, Ibrani miano na Mian Bisa lapamo lubat mookitakene kobutongo doi kami. Budodoiya pataikenemo mbai ampakon tolu kooloyo konakalumbit doi padang lalomo tuuk mososubakon sosuba doi TEMENENO, mbai Mian Bisa.’ ”

¹⁹Doibundu ko Mian Bisa bantile koidan, “Yaku toiyo kotomundo Mesir aki naikon napataikene komuyu ampakon, alaasene kalu yana pinakisaa.

²⁰Bai Yaku naikon pakeyo Daku kokuasaan, tukon ukume ko Mesir tukon bala-balaa lokis Yaku molubatene indaa. Sambuno lapa doiya, yana naikon pataikenemo komuyu lengget.

²¹ Yaku naikon kubaiyo ko Mesir miano monondok konoano motuuk doi komuyu, sampe doitempo Dakumian nalenggetan, komuyu aki poampakon tukon akiyo kopoo kinanggi.

²²Memeeng ko Israel boineno naikon mangkabi doi napololanikonan ko Mesir miano tukon luwe boine Mesir mopodungoli meeng kobonua, pakeyan tukon perhiasan perak tukon mosoni. Komuyu naikon pekeikene doiya doi popau-pau. Tukon cara doiya komuyu naikon lambase ko Mesir miano.”