Read Banggai TOBUATAN 30 Bible Online

TOBUATAN 30 - Banggai bible

TOBUATAN 30

¹TEMENENO bantile koidan doi Musa, “Mokubaimo meeng kobalabaan tampat mosuaan kamangian moluwedoi kayung akasia.

²Dobalabaanoo ndondoongo sio natapanapat; konakobulus tukon nakebelan suwe-suwele 45 kosentimeter tukon konakatandak 90 kosentimeter. Doi sangkap kopasuno mokubaikenemo tandu-tanduko moteali potaami tukon dobalabaanoo.

³Taalikon doi bungguto, tousokon sangkap kolisuko tukon tandu-tanduko sio nalinapis tukon mosoni tulen tukon binee bingkai mosoni potikunggon.

⁴Mokubaikenemo lua kokulaluk doi bingkaidoo adeno doi looluakon kolisuko sulano nataane kayungdoo patanggung balabaan.

⁵Dopatanggungoo sio nakinubai luwedoi kayung akasia tukon linapis mosoni.

⁶Abesemo dobalabaanoo toikoo tambikon tonggulungo modaano doi Peti Perjanjianoo salaano, doi tampat Kupososuungan tukon ikoo.

⁷Sasamba kodowa-dowa Harun nalubatan mosadiayo kolampu; yana sio namosua kamangian mobabangi doi balabaanoo bunggono.

⁸Doi tempo kinobian nasuaano dolampudoo sio nalakukene koidan dolanggedoo. Dososubakon kamangianoo sio nalinakukon bangga-banggadudul popupuson koloonu.

⁹Inaikai mososubakon doi balabaanoo bunggono kamangian mopinatanggon, iyayon mosinosubakon kai kinaan mosinosubakon; inai koidan momokundang anggur paisuno mosinosubakon doi bunggono.

¹⁰Sataun idan Harun sio nalakukene kobakolobokiyan pokoliyousi balabaan tukon kokubai motiposiiyo dotandukodoo mosangkap tukon iyayon piniala sauno mosinosubakon teali pongompuni lalim. Langgedoo sio nalinakukon sasamba kotaun popupuson koloonu. Balabaanoo sio namoliyous posaapon tukon inalaas tuuk doiya-Ku.”

¹¹TEMENENO bantile doi Musa,

¹²“Doi tempo nainaitan ko Israel miano, sasamba komalane sio nababeal doiya-Ku doy posoboli butongo sulano naaki nakanakon balaa doi tempo bangaitan mian.

¹³ Sasamba komian mo malaing nainait doi bangaitanoo lalomo sio nababeal meengkoaito kodoy motinatukon menurut koanggano mo pinake doi Kusandung salaku meeng kobantuan motangalaas doiya-Ku.

¹⁴Sasamba komian mo inait doi bangaitanoo lalomo, doiyamo sasamba komalane konaumur lua kolono kotaun kai lobian, sio namebeyal dobantuanoo motangalaas.

¹⁵Mian mokaasa aki namebeyal lobian, tukon mian motalalais aki namoola mebeal kurang doi napo babealan doy posoboli butongoila.

¹⁶Pototongikenemo dodoydoo luwedoi Israel miano, tukon pakeyomo doi mubakaledaan doi Kusandung lalomo. Sasaibino doiya daanokai doy posoboli tuuk butongoila, tukon Yaku naikon sidutu neneeke tukon lainge yanila.”

¹⁷TEMENENO bantile doi Musa,

¹⁸ “Mokubaimo meeng kobaak luwedoi tambaga tukon kopombosiino luwedoi tambaga koidan. Abesemo dobaako doi napotangaiyan ko Sandung tukon dobalabaanoo, maka usokiyomo tukon paisu.

¹⁹Dopaisudoo tuuk Harun tukon napau-pau sulano yanila namoola kumosiyo kolimano tukon aino

²⁰moakiyoon napo usokiyo do Sandungoo kai loolaniyo dobalabaanoo doi napo babaano kososubakon mosinua. Yanila sio napo lakukene doiya sulano aki napo inakate. Yanila tukon napo katulunan sio nataatiyo doaturanoo sidutu-posidutukon.”

²² TEMENENO bantile doi Musa,

²³“Mangalamo rampah-rampah momonondok tuuno, noom kokilo komur meleel, tolu kokilo kokayung mamis, tolu kilo kotobu mobabangi, tukon noom kokilo kokayung teja.

²⁴Doiya sasaibino tinimbang menurut timbangan mo pinake doi Kusandung. Suungiyomo koidan sangkap koliter kozaitun lisisono,

²⁵tukon kubaiyomo lisison bakolobokiyan, mosinambul teali minalambu.

²⁶Tuluwomo Daku Sandung tukon minalambudoo, Peti Perjanjian,

²⁷meda tukon sasaibino kololongguno, lampu aino tukon lolongguno, balabaan tampat mosuaan kamangian,

²⁸balabaan tuuk sosubakon mosinua tukon sasaibino kololongguno, tukon paisu doi baako tukon pombosiino.

²⁹Tukon dokokubaidoo sio mualaase dololonggu-lolonggudoo tuuk doiya-Ku, sulano sasaibino teali moliyous. Oila tolong komo kanakon doi balabaanoo sio nasinalakanggon doi TEMENENO, tukon indeemo tolong komo singgilemo naikon malaat silaka tobikon namoliyousan mo bukuan.

³⁰Tuluwomo koidan Harun tukon napau-pau sulano yanila natinahbiskanggon teali imam sulano napoleleaniyo Yaku.

³¹Bontiikene doi Israel miano baikon popupuson koloonu dolisisonoo bakolobokiyan inalaas tuuk doi Yaku.

³²Dominalambudoo aki namoola kinundongiikon doi mian bailon. Inai mokubai lisison mobuno doiya tukon mapake sambulanoo koidan. Lisisonoo moliyous; tukon sio nainaanggon buno meeng kolangge momoliyous.

³³Komian momokubai lisison pokakana doiya, kai mian bailon mo mapakemo bai bolikon imam, akimo koidan nainaanggon Kumian.”

³⁴TEMENENO bantile doi Musa, “Mangalamo moimoiya kaliangano korampah-rampah mo pokakana konakadaang, doiyamo pobilat puluto, teengga kulito, lasamala puluto tukon kamangian motulen.

³⁵Pakeyomo sasaibinodoo doi mokubaiyan kamangian sambulano mo babangi. Suungiyomo tukon timuson sulano dokamangianoo natataap tulen tukon moola pinake tuuk doiya-Ku.

³⁶Kosoobos moluwe doi kamangianoo sio natinumbu poaluson. Babayomo doiya doi Kusandung tukon tiposiikenemo doi Peti Perjanjian salaano. Dokamangianoo sio nainaanggon langge moliyous mo inalaas tuuk doiya-Ku. Inai mokubai kamangian mosinambul tukon basambulan mo buno doiya koidan motuuk doi komuyu.

³⁸Indee komo mokubai langge-langge mo babangi pokakana doiya, akimo koidan nainaanggon Kumian.”