Read Banggai TOBUATAN 32 Bible Online

TOBUATAN 32 - Banggai bible

TOBUATAN 32

¹ Doi tempo ko Israel miano nakitaano Musa mo malumbit tuuno naobulus doi bunggul, bai daano indaa koidan, yanila tokuuniyo Harun tukon bantile doi yana, “Kita aki nda toiyo oila komo teali tukon Musa, yanamo komo babayo kita tobuat luwedoi Mesir; jadi mokubaimo meeng koila moandane kami.”

²Maka Harun bantile doi yanila, “Liatemo kosusumbang mosoni doi poboloki tukon mupau-pau mopakeo, tukon babayomo doiyaku.”

³Maka yanila suwe-suwele liatemo konapoo susuumbang tukon babakenemo doi Harun.

⁴ Harun alayomo dososubakonoo, maka yana manase tukon kundangemo doi meeng kosuangan lalomo maka nakubaiyo teali meeng ko sapi timbalango yanila mososubaiyo. Bangsadoo bantile, “Eh Israel, naiyamo konda ilah mo antekene kita tobuat luwedoi Mesir!”

⁵Maka Harun mokokondong meeng kobalabaan doi sapi mosonidoo salaano tukon popitoikenemo, “Namodowa daano kolamean odotiiyano ko TEMENENO.”

⁶ Namodowakon dowa-dowa soono, ko Israel miano mababa moimoiya koiyayon piniala teali sosubakon mosinua, tukon komoimoiya koidan kinubai sosubakon podamean. Salataa yanila lapa kaan tukon inum, yanila basa-basanaang.

⁷Maka TEMENENO bantile doi Musa, “Buluso mosobit, sabab komu mian inandan mo luwedoi Mesir mokubaimo lokis.

⁸Yanila laanemo Daku aturan-aturan. Yanila mokubaimo sapi timbalango mo luwedoi mosoni, maka yanila sosubaiyo tukon mososubakon sosuba doi timbalangoo. Yanila nabantilano, doiyamo konapoo ilah mo babayo yanila tobuat luwedoi Mesir.

⁹Yaku toiyo baikon dobangsadoo todudul motikas konoano.

¹⁰Inai mosemba-sembangaku. Yaku nggimoliiyo yanila tukon yase moosilakayo yanila. Bai ikoo tukon mukatulunan naikon Kutealikene meeng kobangsa mo babasal.”

¹¹ Musa kabiyo doi TEMENENO na Mian Bisa, konabantilano, “TEMENENO, bulaando Ikoo mokubaiyo bunodoiya doiyanila? Bolikonkai Ikoo lapamo salamatene yanila luwedoi Mesir tukon kakuasaan tukon bukuanan mo babasal?

¹²Kalu Ikoo osilakayo yanila, Mesir miano naikon bantile baikon Ikoo mololainge dobangsadoo tobuat luwedoi Mesir tongo akateyo yanila doi bunggul tukon osilakayomo yanila sasaibino. Inai mobunekene doiya, oh TEMENENO, boliiyomo Komutetel tukon inaimo moosilakayo dobangsadoo.

¹³ Neneekemo Abraham, Ishak tukon Yakub domu peleleanidoo. Neneekemo baikon Ikoo paladandimo tukon totopi sulano mubeena yanila katulunan buno bituwon pauno doi timbu kona kadaang, tukon koidan baikon posaapon kobuta Ikoo mojanjikenedoo naikon teali napo katulunan koona sidutu-posidutukon.”

¹⁴Maka ko TEMENENO boliiyomo Konatetel tukon aki natealikene Donateteloo motepakikene dobangsadoo tukon balaa.

¹⁵Musa obuluso koidan luwedoi bunggulo tukon babayomo dobatudoo molua mo totulis ko Mian Bisa naaturan-aturan doi loolua kolisuko.

¹⁶Mian Bisadoo komo kubaiyo dobatudoo tukon botike ko tulisano Dona aturan-aturano.

¹⁷Daano moobulus, Yosua lengele ko Israel miano monggeleng-nggeleamon, maka bantilokai yana doi Musa, “Daano kopelekan buno polobosian doi basandunganoo.”

¹⁸Musa bantile, “Kona longolan bolikon buno pelekan labaan doi polobosian kai nggeleamonan kalaan doi napolobosian; doiya mian manani alalo.”

¹⁹Salataa Musa loolanimo doi basandunganoo, yana kitayomo dosapi mosonidoo tukon komian daano moosu-osuleng, maka yana nggimoliiyomo yanila. Idoo koidan doi bunggulo uuno, Musa tikakene dobatudoo yana mobabayo tukon manas tobinduk-binduki.

²⁰Doibundu yana alayomo dosapidoo timbalango Israel mianodoo mokubaiyo, yana manase, tumbuwo polong alus buno ambata, maka nasambule tukon paisu. Doibundu sinumboliimo ko Israel miano nainume.

²¹Yana bantile doi Harun, “Oila konapo kokubai doikoo sampe mubatadikene yanila mobaladosa?”

²²Harun timbiliyo, “Inai monggimoliiyaku; ikoo susuumu toiyo bulaando namian-miania natetel momokubai lokis.

²³Yanila bantile doiyaku, ‘Kita aki ndatoiyo oila komo teali tukon Musa, doi yanadoo mobabayo kita tobuat luwedoi Mesir; jadi mokubai konggamimo ilah momoola lolainge kami.’

²⁴Yaku sumboliiyo yanila napomendebeekene konapo sumbang mosoni, nabeekene doiyaku. Sasaibino donapo sumbangoo yaku usekene doi suangan basopuan lalomo, maka kukubaiyo nateali nasapinia timbalango.”

²⁵Musa toiyomo Harun tongo batadikene ko Israel miano buno adalan tosodii doi kandang, sampe konamusuh-musuh kokumbite yanila.

²⁶Maka yana kokondong doi basandungan tataapono tukon nggeleamon, “Indee komo ala doi TEMENENO nalubat doi sumai!” Maka lubato Lewi nabenseno motikumiyo Musa,

²⁷tukon yana bantile doi yanila, “TEMENENO Israel miano na Mian Bisa parentayo komuyu suwe-suwele pobubute kopo sabel tukon poampakon polobosiyo nabasandungania, luwedoi tataapon babasal nia polong doi tataapon mo babasal bailon tukon akateyo koutus-utus, kosobat-sobat tukon muponggaup-nggaupan.”

²⁸Lewi nabenseno lakukene dopalentadoo tukon doi oloyodoo uga-ugaate tolu kollon komian mo mate moinakate.

²⁹Musa nabantilano doi Lewi nabenseno, “Doi oloyo nia komuyu lapamo alasanggene kobutomu teali imam moleleaniyo ko TEMENENO tukon akateyo kolabuk-labuk tukon utus-utusomu, maka ko TEMENENO balakaatiyomo komuyu.”

³⁰Modowakon Musa bantile doi bangsadoo, “Komuyu baladosamo. Bai budodoiya yaku naikon toliboiyo dobunggulo koidan sulano kumangadap doi TEMENENO; boliisi kumalaat poompuni motuuk mulalim.”

³¹Maka Musa ampakon koidan momangadap doi TEMENENO tukon bantile, “Dobangsadoo kubaiyo kolalim mobabasal. Yanila kubaiyo koilah luwedoi mosoni.

³² Kalu momoola ompuniyomo konapo lalim; kalu aki, apusemo kosambunggu luwedoi mian motubo nabuku.”

³³TEMENENO timbiliyo, “Tongo mian mo baladosamo doiya-Ku naikon Daku inapus kosambuno luwedoi bukudoo.

³⁴Ampakono budodoiya, tukon babayomo yaniladoo doi tampat Yaku motudoikenemo komuyu. Daku malaekat naikon andane komuyu, bai nalaate kotempono domianoo naikon Yaku ukume sabab napolalim-lalim.”

³⁵Maka ko TEMENENO lubatene kobalaa doi mianoila sabab yanila pakisaayo Harun mokubaiyo dosaapi maas timbalango.