Read Banggai TOBUATAN 33 Bible Online

TOBUATAN 33 - Banggai bible

TOBUATAN 33

¹ Maka ko TEMENENO bantile doi Musa, “Tinggalemo natampat nia tukon ampakono polainggene ko Israel miano ikoo mo babayomo luwedoi Mesiroo doi lipu Yaku modandikene doi Abraham, Ishak tukon Yakub tukon konapo katulunan.

²Yaku naikon mosumbolii meeng ko malaekat sulano nalolainge komuyu. Yaku naikon siikayo kobangsa Kanaan, Amori, Het, Feris, Hewi tukon Yebus.

³Komuyu pakatuuwo kotano mo kaasa tukon molumbang. Bai Yaku susuunggu aki kumalaing tukon komuyu, sulano komuyu inai kusilakakene doi loloon tangano, sabab komuyu meeng kobangsa matikas konoano.”

⁴Doibundu TEMENENO sumboliiyo Musa mobantile doi Israel miano, “Komuyu bangsa motikas konoano. Kai naikon Yaku malaing tukon komuyu mau tongo budodoiya tolong, tutuu komuyu Kusilakayo kookabuson. Liatemo sasaibino komu sumbang, kulaluk, inoon, maka naikon Kutantukanggene oila naikon Daku linakukon motuuk doikoo.” Salataa lengele ko TEMENENO napanganuukon, yanila susah tuuno buno mian mopoloonggene komatean. Sambuno bunodoiya yanila liatemo donapo sumbang, kulaluk, inoon. Jadi, sambuno yanila otinggale ko Bunggul Sinai, ko Israel miano akimo koidan namapake sumbang, kulaluk, tukon inoon.

⁷Sasamba luunggon, kalu ko Israel miano basandung, Musa mangala Sandung tukon nakekendenge adukon dodoon luwedoi yanila nabasandungan. Do Sandungoo binantil TEMENENO na Sandung, tukon indee komo yase mangkabi TEMENENO naotunggul, ampakon idoo.

⁸Kalu Musa ampakon doi Sandungoo, ko Israel miano kokondong doi yanila nasandung tataapono salaano tukon pateekene Musa polong yana usok.

⁹Sambunolapa Musa usok, buluso kobunom sudongo tukon tade doi Sandungoo tataapono. Luwedoi bunomo ko TEMENENO posalitai tukon Musa.

¹⁰Doi tempo ko Israel kitayo kobunom sudongo doi TEMENENO na Sandung, tataapono, yanila sasaibino kokondong tukon tootuku doi nasandung tataapono suwe-suwele.

¹¹TEMENENO tukon Musa basalita posasalaan, pokakana komian posalitai tukon tulano. Sambunolapa doiya Musa abalimo doi basandungan. Bai Yosua Nun napau, meeng kopaumalane potombonii Musa, tataap dungol doi Sandungoo lalomo.

¹²Daano kooloyo meeng Musa bantile doi TEMENENO, “TEMENENO, Ikoo palentayo yaku moloolainge namian nia doi lipu Ikoo modandikene. Bai Ikoo aki mubantile indee komiano naikon Komu sinumbolii sulano natomboniiyaku. TEMENENO, Ikoo bantile baikon Ikoo tingoniiyo yaku, tukon pokokonoi doiyaku.

¹³Kalu bunodoiya, tadumokai mupailukanaku oila Komutetel, TEMENENO, sulano kumoola leleaniyo Ikoo tukon tataap mosanaanggene Konoamu. Neneekemo koidan baikon namian nia lapamo Ikoo lilike teali Mumian.”

¹⁴TEMENENO nabantilano, “Komuyu naikon Kudagaiyo sulano moola malaat tano Yaku modandikene.”

¹⁵Musa timbiliyo, “Kalu TEMENENO aki nalainge kami, inai mosumbolii kami mootinggale natampat nia.

¹⁶Bulaando komian naikon natoiyo baikon Ikoo pokokonoi doiyaku tukon doi mian nia kalu Ikoo aki mutulungiyo kami? Kalu ko TEMENENO loolainge kami, kami posasala komian-mian bailon doi dunia.”

¹⁷TEMENENO bantile doi Musa, “Komukakabi naikon Kudaanokene, sabab Yaku tingoniiyomo ikoo tukon Yaku pokokonoi doikoo.”

¹⁸Maka Musa kabiyo, “TEMENENO okitakenemo Komudaanoan laango doiyaku.”

¹⁹ TEMENENO timbiliyo, “Yaku naikon alon tukon sasaibino Dakubabasalan doi salaamu, tukon ikoo bantile Kosambunggu mo moliyous. Yakumo ko TEMENENO, tukon Yaku otudoikene konamonondokan konoanggu tukon seang doi mian-mian Yaku molilike.

²⁰Kodudusonggu aki naikon Kuokitakene doikoo, sabab aki namoola komian mokitayo Yaku, tukon tataap tubo.

²¹Doi Sembelenggunia daano kobunggul batuon; ikoo moola mukokondang idoo.

²²Doi tempo Kudaanoan laango naalonan, Kuseekene ikoo doi meeng konggowang lalomo doi bunggul mobatuonoo maka Kusunggupiyo tukon Limanggu polapakon Daku alonan.

²³Maka Kububute Kolimanggu sulano mumoola kitayo Yaku doi tonggulung, bai Kodudusonggu aki mukitayo.”